13 June Sunday

പുതിയ അംഗങ്ങളുടെ സത്യപ്രതിജ്ഞ 24, 25 തീയതികളിൽ; ഇടവേളയിട്ട്‌ നയപ്രഖ്യാപനത്തിനും സഭ ചേരും

റഷീദ്‌ ആനപ്പുറംUpdated: Sunday May 16, 2021

തിരുവനന്തപുരം > മുഖ്യമന്ത്രിയുടെയും മന്ത്രിമാരുടെയും സത്യപ്രതിജ്ഞയ്‌ക്ക്‌ പിന്നാലെ നിയമസഭയിലേക്ക്‌ പുതിയ അംഗങ്ങളുടെ സത്യപ്രതിജ്ഞയ്‌ക്ക്‌ നിയമസഭാ സെക്രട്ടറിയറ്റും ഒരുങ്ങി. 24, 25 തീയതികളിൽ  എംഎൽഎമാരുടെ സത്യപ്രതിജ്ഞയ്‌ക്കും സ്‌പീക്കർ തെരഞ്ഞെടുപ്പിനും ആദ്യസമ്മേളനം ചേരാനിടയുണ്ടെന്ന അനുമാനത്തിലാണ്‌ നിയമസഭാ സെക്രട്ടറിയറ്റ്‌  തയ്യാറെടുപ്പ്‌ നടത്തുന്നത്‌.

20നാണ്‌ മുഖ്യമന്ത്രിയുടെയും മന്ത്രിമാരുടെയും  സത്യപ്രതിജ്ഞ. അന്നുനടക്കുന്ന ആദ്യ മന്ത്രിസഭായോഗം നിയമസഭാ സമ്മേളനം വിളിക്കാൻ തീയതിയും പ്രോട്ടേം സ്‌പീക്കറെയും   തീരുമാനിക്കും.  തുടർന്ന്‌, ഗവർണർക്ക്‌ ശുപാർശ കൈമാറും. അതോടെയാണ്‌ സഭ വിളിച്ചുചേർക്കാൻ ഗവർണർ ഉത്തരവിറക്കുക. ഇതിനുപിന്നാലെ നിയമസഭാ സെക്രട്ടറി, തെരഞ്ഞെടുക്കപ്പെട്ടവർക്ക്‌ രേഖാമൂലം വിവരം നൽകും.

ആദ്യദിവസം അംഗങ്ങളുടെ സത്യപ്രതിജ്ഞയും രണ്ടാംദിവസം സ്‌പീക്കർ തെരഞ്ഞെടുപ്പുമാകും. ഡെപ്യൂട്ടി സ്‌പീക്കർ തെരഞ്ഞെടുപ്പ്‌ ഒരുമാസം കഴിഞ്ഞാകും.  ഈ സമ്മേളനം പിരിഞ്ഞാലുടൻ  ഗവർണറുടെ നയപ്രഖ്യാപനത്തിനും ബജറ്റിനും വീണ്ടും സഭാസമ്മേളനം വിളിച്ചുചേർക്കും.  മെയ്‌ മാസംതന്നെ ഇതെല്ലാം പൂർത്തിയാക്കിയേക്കും.   സത്യപ്രതിജ്ഞ കഴിഞ്ഞാൽ ഇവർക്കുള്ള താമസ സൗകര്യവും എൽഎൽഎ ഹോസ്‌റ്റലിൽ ഒരുക്കും. ഇതിനായി നിലവിലെ അംഗങ്ങൾക്ക്‌ മുറി  ഒഴിയാനുള്ള നോട്ടീസ്‌ നൽകിയിട്ടുണ്ട്‌. പുതിയ അംഗങ്ങൾക്ക്‌ പരിശീലനവും നൽകും. കോവിഡ്‌ പശ്‌ചാത്തലത്തിൽ ഓൺലൈനിലാകും പരിശീലനം.


ദേശാഭിമാനി വാർത്തകൾ ഇപ്പോള്‍ വാട്സാപ്പിലും ടെലഗ്രാമിലും ലഭ്യമാണ്‌.

വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
ടെലഗ്രാം ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..




----
പ്രധാന വാർത്തകൾ
-----
-----
 Top