30 October Friday

പി ടി തോമസ് ഉൾപ്പെട്ട കള്ളപ്പണമിടപാട് ; പരാതി നൽകിയ സിപിഐ എം നേതാവിനെ വധിക്കാൻ ശ്രമം

വെബ് ഡെസ്‌ക്‌Updated: Sunday Oct 18, 2020


സ്വന്തം ലേഖകൻ
പി ടി തോമസ് എംഎൽഎ ഉൾപ്പെട്ട കള്ളപ്പണ ഇടപാടിൽ അന്വേഷണം ആവശ്യപ്പെട്ട്‌ മുഖ്യമന്ത്രിക്ക്‌ പരാതി നൽകിയ സിപിഐ എം നേതാവിനെ വധിക്കാൻ ശ്രമം. വൈറ്റില ഏരിയ കമ്മിറ്റി അംഗവും വെണ്ണല സഹകരണബാങ്ക് പ്രസിഡന്റുമായ അഡ്വ. എ എൻ സന്തോഷിനെയാണ്‌ അജ്ഞാതസംഘം വധിക്കാൻ ശ്രമിച്ചത്‌. ശനിയാഴ്‌ച പ്രഭാതസവാരിക്കിടെ പാടിവട്ടം അർക്കക്കടവ്‌ റോഡിൽ കുഞ്ഞാട്ടുഭാഗത്താണ്‌ സംഭവം. ബൈക്കിലെത്തിയ മൂന്നംഗസംഘം സന്തോഷിനെ കത്തികൊണ്ട്‌ കുത്താൻ പാഞ്ഞടുക്കുകയായിരുന്നു. അക്രമികളെ കണ്ട സന്തോഷ് അതുവഴിവന്ന വാഹനത്തിൽ കയറി രക്ഷപ്പെട്ടു. സന്തോഷ്‌ പാലാരിവട്ടം പൊലീസിൽ പരാതി നൽകി.

നടക്കാനിറങ്ങിയപ്പോൾ മൂന്നംഗ സംഘം ബൈക്കിൽ കടന്നുപോകുകയും നിരീക്ഷിക്കുകയും ചെയ്‌തതായി സന്തോഷ്‌ പറഞ്ഞു.  വിജനമായ സ്ഥലത്തെത്തിയപ്പോൾ ബൈക്കിലെത്തിയ സംഘത്തിൽ ഒരാൾ കത്തിയുമായി വീശിയടുക്കുകയായിരുന്നു. ആളുമാറിയതാണെന്ന് കരുതി മാസ്‌ക്‌ നീക്കി മുഖം കാണിച്ചു. എന്നിട്ടും കുത്താൻ അടുത്തു‌. ഇതോടെ ആസൂത്രിതമായ ആക്രമണമാണെന്ന് മനസ്സിലാക്കി പിന്തിരിഞ്ഞ് ഓടി അതുവഴി വന്ന മാലിന്യ ലോറിയിൽ കയറി രക്ഷപ്പെട്ടു.  അക്രമികളുടെ സിസി ടിവി ദൃശ്യങ്ങൾ ശേഖരിച്ചിട്ടുണ്ട്–-സന്തോഷ്‌ പറഞ്ഞു. 

എൽഡിഎഫ് കൺവീനർ എ വിജയരാഘവൻ സന്തോഷിനെ  സന്ദർശിച്ചു. പ്രതികളെ ഉടൻ പിടികൂടണമെന്നും അദ്ദേഹം ആവശ്യപ്പെട്ടു. സിപിഐ എം ജില്ലാ സെക്രട്ടറി സി എൻ മോഹനനും സംസ്ഥാന കമ്മിറ്റി അംഗം സി എം ദിനേശ് മണിയും വീട്ടിലെത്തി.


ദേശാഭിമാനി വാർത്തകൾ ഇപ്പോള്‍ വാട്സാപ്പിലും ടെലഗ്രാമിലും ലഭ്യമാണ്‌.

വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
ടെലഗ്രാം ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..

മറ്റു വാർത്തകൾ

----
പ്രധാന വാർത്തകൾ
-----
-----
 Top