കുതിക്കുന്നു

ജില്ലയിൽ കോവിഡ് സ്ഥിരീകരണ നിരക്ക് (ടിപിആർ) അമ്പതിനോടടുക്കുന്നു. ഏതാനും മാസങ്ങൾക്ക് ശേഷമാണ് നിരക്ക് അമ്പതിനോടടുക്കുന്നത്. വെള്ളിയാഴ്ച 42 ശതമാനമാണ് രോ​ഗ സ്ഥിരീകരണ നിരക്ക്. ദിവസവും പരിശോധിക്കുന്നവരിൽ 42 ശതമാനം കോവിഡ് രോ​ഗബാധിതരാണെന്ന് തെളിയുന്നു. 

രണ്ടാഴ്ച മുമ്പ് വരെ പത്തു ശതമാനത്തോളം മാത്രമായിരുന്നു രോ​ഗ സ്ഥിരീകരണ നിരക്ക്. കൂടുതൽ നിയന്ത്രണങ്ങൾ ജില്ലയിൽ നടപ്പാക്കുന്നതിനെ സംബന്ധിച്ച്  ആരോ​ഗ്യ വകുപ്പിന്റെയും ബന്ധപ്പെട്ട മറ്റു വകുപ്പുകളുടെയും യോ​ഗം ശനിയാഴ്ച ചേരും. ആശുപത്രികളിൽ അത്യാഹിത വിഭാ​ഗത്തിൽ പ്രവേശിപ്പിക്കുന്നവരുടെ എണ്ണത്തിലും നേരിയ വർധനയുണ്ടായിട്ടുണ്ടെന്ന് ആരോ​ഗ്യവകുപ്പ് അധികൃതർ പറഞ്ഞു. എന്നാൽ ആശങ്കപ്പെടടേണ്ട സാഹചര്യമില്ലെന്നും എല്ലാ  ചികിത്സാ സജ്ജീകരണങ്ങളും ഒരുക്കിയിട്ടുണ്ടെന്നും അധികൃതർ അറിയിച്ചു. 

നിലവിലെ രണ്ടു പ്രാഥമിക ചികിത്സാ കേന്ദ്രങ്ങളിലും രോ​ഗികൾ കുറവാണ്. സർക്കാർ ആശുപത്രികൾക്ക് പുറമെ ജില്ലയിലെ ഒമ്പതു സ്വകാര്യ ആശുപത്രികളിലും കോവിഡ് രോ​ഗികൾക്കായി ചികിത്സാ സംവിധാനം ഒരുക്കിയിട്ടുണ്ട്. ജില്ലയിൽ കൺട്രോൾ റും സജ്ജീകരിച്ചിട്ടുണ്ട്. മരുന്നിനോ, ഓക്സിജൻ അടക്കമുള്ള സംവിധാനങ്ങൾക്കോ ജില്ലയിൽ ക്ഷാമം ഇല്ലെന്നും അധികൃതർ അറിയിച്ചു. ഒന്നാം തരം​ഗ സമയത്ത് എല്ലാ പിഎച്ച്സികളിലും കോവിഡ് ബ്രി​ഗേഡ് വിഭാ​ഗത്തിൽ ധാരാളം വളന്റിയർമാർ പ്രവർത്തിച്ചിരുന്നു. സംസ്ഥാന  സർക്കാർ മുൻകൈയെടുത്താണ് ആ സംവിധാനം രൂപപ്പെടുത്തിയത്. സന്നദ്ധ പ്രവർത്തകർക്ക് കേന്ദ്രഫണ്ടിൽ നിന്നും സഹായവും നൽകി. എന്നാൽ കേന്ദ്ര സർക്കാർ പിന്നീട് ഫണ്ട് നൽകുന്നത് നിർത്തി. ഇതിനെ തുടർന്ന് കോവിഡ് ബ്രി​ഗേഡിന്റെ പ്രവർത്തനം ഇടയ്ക്ക് വച്ച് നിർ‍ത്തേണ്ടി വന്നു. എന്നാൽ  കേന്ദ്ര സർക്കാർ ഫണ്ട് അനുവദിച്ചില്ലെങ്കിലും തദ്ദേശ സ്ഥാപനങ്ങളുടെ സഹായത്തോടെ സന്നദ്ധപ്രവർത്തകരുടെ സഹായം തേടാനും സർക്കാർ തീരുമാനിച്ചിട്ടുണ്ട്.