17 July Wednesday

തര്‍ക്കം തുടരും, കൗണ്‍സില്‍ 
വിളിച്ച് പാലക്കാട് ന​ഗരസഭ

സ്വന്തം ലേഖകൻUpdated: Saturday Sep 23, 2023

 പാലക്കാട്

ബിജെപിയിലെ തമ്മിലടി രൂക്ഷമായെങ്കിലും പ്രതിപക്ഷ കൗൺസിലർമാരുടെ സമ്മർദത്തിനൊടുവിൽ കൗൺസിൽ യോ​ഗം വിളിച്ച് ന​ഗരസഭ. 26ന് പകൽ 11ന് കൗൺസിൽ ചേരുമെന്ന് ന​ഗരസഭാ വൈസ് ചെയർമാൻ ഇ കൃഷ്ണദാസ് അറിയിച്ചു. കൗൺസിൽ ചേരണമെന്നാവശ്യപ്പെട്ട് സിപിഐ എം കൗൺസിലർമാരടക്കം കഴിഞ്ഞ ദിവസം കത്ത് നൽകിയിരുന്നു. ഇതിന്റെകൂടി പശ്ചാത്തലത്തിലാണ് രണ്ടുമാസത്തിനുശേഷം കൗൺസിൽ ചേരുന്നത്. ചെയർപേഴ്സൺ പ്രിയ അജയൻ അവധിയിലായതിനാൽ വൈസ് ചെയർമാന്റെ അധ്യക്ഷതയിലാണ് യോ​ഗം ചേരുക. ബിജെപിയിലെ തമ്മിലടിയും വികസന പ്രവർത്തനങ്ങൾ മുടങ്ങിയതും പ്രതിപക്ഷം കൗൺസിലിൽ ഉന്നയിക്കും.
വിമതർക്ക് വഴങ്ങില്ലെന്ന നിലപാടിൽ ഉറച്ച് ചെയർപേഴ്സൺ 10 ദിവസത്തെ അവധിയാണ് എടുത്തിരിക്കുന്നത്. ഓണത്തിനുശേഷം കാര്യമായി ന​ഗരസഭയിൽ ചെയർപേഴ്സൺ എത്താത്തത് വിവാദമായതോടെയാണ് അവധിയെടുത്ത്‌ പ്രിയ അജയൻ മാറി നിൽക്കുന്നത്. പ്രിയ അജയന് ആർഎസ്എസ് പിന്തുണകൂടി ഉണ്ടെന്നാണ് വിവരം. മുൻ ന​ഗരസഭാ ചെയർപേഴ്സന്റെയും ഒരുസ്ഥിരം സമിതി ചെയർമാന്റെയും നേതൃത്വത്തിൽ ന​ഗരസഭാ ഭരണത്തിൽ അമിതമായി ഇടപെടുന്നതാണ് ആർഎസ്എസിനെയും പ്രിയയെയും ചൊടിപ്പിച്ചത്. ചെയർപേഴ്സന്റെയും വിമതരുടെയും പക്ഷത്തേക്ക് ബിജെപി കൗൺസിലർമാർ രണ്ടുചേരിയായി തിരിഞ്ഞ് പരസ്യമായാണ് പോര്. ഇത് കൗൺസിൽ യോ​ഗത്തിലും പ്രതിഫലിക്കുമെന്ന് ഉറപ്പാണ്. എന്നാൽ ആരോ​ഗ്യ പ്രശ്നങ്ങളാണ് മാറിനിൽക്കാൻ കാരണമെന്നും മറ്റുള്ള കാര്യങ്ങൾ അഭ്യൂഹം മാത്രമാണെന്നും പ്രിയ അജയൻ പറഞ്ഞു. 
   ന​ഗരസഭാ യോ​ഗം ചേരാത്തതിനാൽ അറ്റകുറ്റപ്പണികളും മറ്റ്‌ വികസനപ്രവർത്തനങ്ങളും താളംതെറ്റിയിരിക്കുകയാണ്. വാർഡുകളിലെ ജോലികൾ മുടങ്ങിയതോടെ ബിജെപി കൗൺസിലർമാരടക്കം പ്രതിഷേധത്തിലാണ്. ജൂലൈ 20നാണ് അവസാനമായി കൗൺസിൽ ചേർന്നത്. ആ​ഗസ്ത് നാലിന് അടിയന്തര കൗൺസിൽ ചേർന്നു. ന​ഗരസഭയിലെ പ്രതിസന്ധിക്കെതിരെ കഴിഞ്ഞ ദിവസം പ്രതിപക്ഷ കൗൺസിലർമാർ കുത്തിയിരിപ്പ് സമരം നടത്തിയിരുന്നു.

ദേശാഭിമാനി വാർത്തകൾ ഇപ്പോള്‍ വാട്സാപ്പിലും ടെലഗ്രാമിലും ലഭ്യമാണ്‌.

വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
ടെലഗ്രാം ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..



----
പ്രധാന വാർത്തകൾ
-----
-----
 Top