പാലക്കാട്‌
പാവപ്പെട്ടവർക്ക്‌ കിടപ്പാടമൊരുക്കാനുള്ള ലൈഫ്‌ മിഷൻ 2020 പദ്ധതിയിൽ ജില്ലയിൽ വീടുനിർമാണം തുടങ്ങി. കരാർവച്ച 1991 പേരിൽ 120 പേർക്കാണ്‌ ആദ്യഗഡു നൽകിയത്‌. ഇവർ വീടുനിർമാണം തുടങ്ങി. ഭവനരഹിതരായ 57,835 പേരും ഭൂമിയും വീടുമില്ലാത്ത 24,357 പേരും ഉൾപ്പെടെ 82,192 ഗുണഭോക്താക്കളുണ്ട്‌. പട്ടികയിൽ 895 അതിദരിദ്രരാണുള്ളത്‌. അർഹരായ കൂടുതൽ ഗുണഭോക്താക്കളെ പട്ടികയിൽ ഉൾപ്പെടുത്താൻ സർക്കാർ ഉത്തരവിറക്കിയിട്ടുണ്ട്‌. അവരെക്കൂടി ഉൾപ്പെടുത്തിയാൽ ഗുണഭോക്താക്കളുടെ എണ്ണം ഉയരും. നിലവിൽ ലൈഫ്‌ മാനദണ്ഡപ്രകാരം ഭൂമിയുള്ള അതിദരിദ്രർ മാത്രമാണ്‌ പട്ടികയിൽ ഉൾപ്പെട്ടിട്ടുള്ളത്‌.
കരാർവച്ചവരിൽ 285 പേർ മുൻപട്ടികയിൽ ഉൾപ്പെട്ട്‌ വിവിധ കാരണങ്ങളാൽ കരാർ ഒപ്പിടാൻ സാധിക്കാത്തവരാണ്‌. ഇവരിൽ മിക്കവരും സ്ഥലം വാങ്ങിയശേഷമാണ്‌ കരാർ ഒപ്പിട്ടിരിക്കുന്നത്‌. ആദ്യഘട്ടത്തിൽ നാല്‌ ഘട്ടങ്ങളിലായി 20,235 വീടാണ്‌ പൂർത്തിയാക്കിയത്‌.
അർഹരുടെ പട്ടികയിൽനിന്ന്‌ മുൻഗണന പ്രകാരമാണ്‌ കരാർ ഒപ്പുവയ്‌ക്കുക. മാർച്ച്‌ 31നകം 5,752 കുടുംബവുമായി കരാർ ഒപ്പിടുകയാണ്‌ ലക്ഷ്യം. ഭൂമിയില്ലാത്തവർക്ക്‌ സ്ഥലം കണ്ടെത്തി വീട്‌ നിർമിച്ചുനൽകാൻ ലക്ഷ്യമിടുന്ന ‘മനസോടിത്തിരി മണ്ണ്‌’ പദ്ധതിയിലൂടെ ഏറെപ്പേർ ഭൂമി നൽകുന്നുണ്ട്‌.
ഇതിനൊപ്പം കൊടുമ്പ്‌ പഞ്ചായത്തിലും ചിറ്റൂർ–-തത്തമംഗലം നഗരസഭയിലെ വെള്ളപ്പനയിലും ഫ്ലാറ്റ്‌ നിർമാണം പുരോഗമിക്കുന്നു. ലൈഫ്‌ 2020 പട്ടികയിൽ ഉൾപ്പെട്ടവർക്ക്‌ സർക്കാർ നാലുലക്ഷം രൂപയാണ്‌ നൽകുക. ആദ്യഗഡുവായ 80,000 രൂപ തദ്ദേശ സ്ഥാപനങ്ങളാണ്‌ കൊടുക്കുക. 3.2 ലക്ഷം രൂപ സംസ്ഥാന സർക്കാർ നൽകും. സർക്കാർ നിശ്ചിത തുക ഹഡ്‌കോയിൽനിന്ന്‌ വായ്‌പയെടുത്താണ്‌ പദ്ധതി നടപ്പാക്കുക. ആദ്യഘട്ടത്തിൽ 40,000, രണ്ടാംഘട്ടത്തിൽ 1.6 ലക്ഷം, പിന്നീട്‌ രണ്ടു ഘട്ടങ്ങളിലായി ഒരു ലക്ഷം രൂപ വീതവും ഉപഭോക്താവിന്‌ ലഭിക്കും. ആദിവാസി മേഖലകളിലും മറ്റും സാധനങ്ങൾ എത്തിക്കാൻ ബുദ്ധിമുട്ടുള്ള പ്രദേശങ്ങളിൽ ആറുലക്ഷം രൂപയാണ്‌ വീടുനിർമാണത്തിനായി നൽകുക.
ദേശാഭിമാനി വാർത്തകൾ ഇപ്പോള്‍ വാട്സാപ്പിലും ടെലഗ്രാമിലും ലഭ്യമാണ്‌.
വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
ടെലഗ്രാം ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
