25 January Saturday

36,545 മെട്രിക്‌ ടൺ ഉൽപ്പാദനം ഹരിതം, സമൃദ്ധം, കോഴിക്കോട്‌

വെബ് ഡെസ്‌ക്‌Updated: Thursday Dec 12, 2019

 

കോഴിക്കോട്‌
നഗര–-ഗ്രാമ മേഖലകളിൽ പച്ചക്കറി ഉൽപ്പാദനത്തിൽ വർധന. ജില്ലയിൽ 2018–-19 വർഷത്തിൽ 36,545 മെട്രിക്‌ ടൺ ആണ്‌ ഉൽപ്പാദനം. വെണ്ട, പയർ, വഴുതന, ചീര തുടങ്ങി എല്ലാതരം പച്ചക്കറിയും അടുക്കളത്തോട്ടത്തിലും മട്ടുപ്പാവിലുമായി കൃഷിചെയ്താണ്‌ ഈ കുതിപ്പ്‌. മുൻവർഷം  33,762 മെട്രിക്‌ ടൺ ആയിരുന്നു ഉൽപ്പാദനം. 2014 മുതൽ ഉൽപ്പാദനം കൂടുകയാണ്‌. 2018–-19 കാലയളവിലുണ്ടായ പ്രളയം മാത്രമാണ്‌ ഇതിന്‌ ചെറിയതോതിൽ തിരിച്ചടിയായത്‌. എങ്കിലും കാർഷികവകുപ്പ്‌ വിത്ത്‌, വളം തുടങ്ങിയവയുടെ വിതരണം ഇരട്ടിപ്പിച്ചതിനാൽ ഉൽപ്പാദനം കൂടി. 
2016–-17, 2015–-16, 2014–-15 വർഷങ്ങളിൽ യഥാക്രമം  35,253, 35,171, 33,301 മെട്രിക്‌ ടൺ ആണ്‌ ഉൽപ്പാദനം. 2014-ൽ ഹെക്ടറിൽ 12.81 മെട്രിക്‌ ടൺ ആയിരുന്നു ഉൽപ്പാദന ക്ഷമത. 2018ൽ 14.87 ആയി ഉയർന്നു. അത്യുൽപ്പാദന ശേഷിയുള്ള വിത്തും തൈകളും ഗ്രോബാഗും നൽകുന്നതിന്‌ പുറമെ ഗുണമേന്മയുള്ള വളങ്ങളും കീടനാശിനികളും കാർഷിക വകുപ്പ്‌ ലഭ്യമാക്കുന്നത്‌ ഉൽപ്പാദന ക്ഷമത വർധിപ്പിക്കുന്നു. ഈ വർഷം ആകെ 4.1 കോടി രൂപയാണ്‌ ജില്ലയിലെ കാർഷിക പദ്ധതികൾക്കായി അനുവദിച്ചത്‌. 
വിത്ത്‌, തൈ, ഗ്രോബാഗ്‌ എന്നിവയുടെ വിതരണം അടിസ്ഥാനപ്പെടുത്തിയാണ്‌ കൃഷിചെയ്യുന്ന ഭൂമി തിട്ടപ്പെടുത്തുക. മുക്കാൽ സെന്റ്‌ ഭൂമിക്ക്‌ 25 ഗ്രോബാഗെന്നാണ്‌ കണക്ക്‌. 
ബ്ലോക്ക്‌ തലങ്ങളിൽ ഈ വർഷം 3100 ഗ്രോബാഗുകളും ആറ്‌ ലക്ഷം വിത്തുകളും നാല്‌ ലക്ഷം തൈകളും വിതരണം ചെയ്‌തു. ക്ലസ്‌റ്ററായി ചെയ്യുന്ന കൃഷിയുടെ എണ്ണവും വർധിച്ചു. സംഘമായി അഞ്ച്‌ ഹെക്ടറിൽ ചെയ്യുന്നതാണ്‌ ഒരു ക്ലസ്‌റ്റർ. കഴിഞ്ഞവർഷം 57 എണ്ണമായിരുന്നെങ്കിൽ ഈ വർഷം 75 ആയി ഉയർന്നു. കൃഷി ഓഫീസിൽ പോയി അപേക്ഷ നൽകിയാൽ ഗ്രോബാഗുകൾ സബ്‌സിഡി നിരക്കിൽ വീട്ടിൽ എത്തും. കൂടാതെ മഴമറ, മാലിന്യ സംസ്‌കരണ പ്ലാന്റുകൾ തുടങ്ങി കൃഷിയെ പ്രോത്സാഹിപ്പിക്കാനുള്ള നിരവധി പദ്ധതികൾ കൃഷി ഓഫീസുകൾ വഴി ലഭ്യമാണ്‌. 2019–- 20ൽ ഹെക്ടറിൽ 12.50 മെട്രിക്‌ ടൺ പച്ചക്കറി ഉൽപ്പാദനം ലക്ഷ്യമിട്ടുള്ള പദ്ധതികളാണ്‌ ആസൂത്രണംചെയ്യുന്നത്‌.  പ്രളയകാലത്ത്‌ നൽകിയ വിത്തുകളും ഗ്രോബാഗുകളും മഴയിൽ നശിച്ചിരുന്നു. ഇരട്ടിയോളം വിത്തും തൈയും  നൽകിയാണ്‌ കൃഷി പുനരുജ്ജീവിപ്പിച്ചത്‌.

 

പ്രധാന വാർത്തകൾ
 Top