കോട്ടയം
-എസ്എഫ്ഐ 46ാമത് ജില്ലാ സമ്മേളനത്തിന് വെള്ളിയാഴ്ച കോട്ടയത്ത് തുടക്കമാകും. പതാകജാഥ രാവിലെ 10ന് മണർകാട് എം സാബുവിന്റെ രക്തസാക്ഷി മണ്ഡപത്തിൽനിന്ന് ആരംഭിക്കും. മുൻ സംസ്ഥാന പ്രസിഡന്റ് ജെയ്ക് സി തോമസ് പതാക കൈമാറും. എസ്എഫ്ഐ സംസ്ഥാന കമ്മിറ്റിയംഗം പി ജെ സഞ്ജയ് ആണ് ജാഥാ ക്യാപ്റ്റൻ. സംസ്ഥാന കമ്മിറ്റിയംഗം വൈഷ്ണവി ഷാജി വൈസ് ക്യാപ്റ്റനും ജില്ലാ ജോയിന്റ് സെക്രട്ടറി വി ആർ രാഹുൽ മാനേജരുമാണ്.
പകൽ 11ന് കലക്ടറേറ്റിനു സമീപം കെ കെ റോഡിൽ വിദ്യാർഥി റാലി ആരംഭിക്കും. പതാകജാഥയും വിദ്യാർഥി റാലിയും പൊതുസമ്മേളനവേദിയായ തിരുനക്കര പഴയ ബസ് സ്റ്റാൻഡ് മൈതാനത്ത്(എം സാബു നഗർ) എത്തിച്ചേരും. സംഘാടകസമിതി ചെയർമാൻ അഡ്വ. കെ അനിൽകുമാർ പതാകയുയർത്തും. തുടർന്ന് ചേരുന്ന പൊതുസമ്മേളനം ഡിവൈഎഫ്ഐ സംസ്ഥാന സെക്രട്ടറി വി കെ സനോജ് ഉദ്ഘാടനം ചെയ്യും.
ശനി രാവിലെ ഒമ്പതിന് അജീഷ് വിശ്വനാഥന്റെ രക്തസാക്ഷി മണ്ഡപത്തിൽനിന്ന് എസ്എഫ്ഐ സംസ്ഥാന കമ്മിറ്റിയംഗം മീനു എം ബിജു ക്യാപ്റ്റനും ജില്ലാ വൈസ് പ്രസിഡന്റ് ഡി കെ അമൽ വൈസ് ക്യാപ്റ്റനും ജില്ലാ വൈസ് പ്രസിഡന്റ് അർജുൻ മുരളി മാനേജരുമായ ദീപശിഖ ജാഥ ആരംഭിക്കും. ജില്ലാ പഞ്ചായത്ത് പ്രസിഡന്റ് കെ വി ബിന്ദു ദീപശിഖ കൈമാറും. കോട്ടയം സിഎസ്ഐ റീട്രീറ്റ് സെന്റർ ഹാളിൽ(അജീഷ് വിശ്വനാഥൻ നഗർ) ചേരുന്ന പ്രതിനിധി സമ്മേളനം രാവിലെ 10ന് എസ്എഫ്ഐ മുൻ സംസ്ഥാന സെക്രട്ടറി എം വിജിൻ എംഎൽഎ ഉദ്ഘാടനം ചെയ്യും.
ജില്ലയിലെ ഒന്നരലക്ഷം വിദ്യാർഥികളെ പ്രതിനിധികരിച്ച് 300 പ്രതിനിധികളാണ് പങ്കെടുക്കുന്നത്. 28ന് സമ്മേളനം സമാപിക്കും.
ദേശാഭിമാനി വാർത്തകൾ ഇപ്പോള് വാട്സാപ്പിലും ലഭ്യമാണ്.
വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
