28 November Saturday

പച്ചക്കറി സംഭരണം : കേരളമാതൃക മറ്റിടങ്ങളിലും വേണം

വെബ് ഡെസ്‌ക്‌Updated: Thursday Oct 29, 2020


ന്യൂഡൽഹി
കർഷകർക്ക്‌ ആശ്വാസമായി പച്ചക്കറിക്ക്‌ തറവില നിശ്ചയിച്ച കേരള സർക്കാർ പദ്ധതി മാതൃകാപരമെന്നും രാജ്യം നടപ്പാക്കണമെന്നും ആവശ്യം. 16 ഇനം പച്ചക്കറിക്ക്‌ തറവില നിശ്ചയിച്ച്‌ സംഭരിക്കുന്ന സംസ്ഥാന സർക്കാർ പദ്ധതിയെ ഇംഗ്ലീഷ്‌, ഹിന്ദി ഭാഷകളിലെ ദേശീയമാധ്യമങ്ങൾ പ്രാധാന്യത്തോടെ റിപ്പോർട്ട്‌ ചെയ്‌തു. രാജ്യത്ത്‌ ആദ്യമായാണ്‌ ഇത്തരം പദ്ധതിയെന്നും മറ്റു സംസ്ഥാനങ്ങൾ ഇതു മാതൃകയാക്കണമെന്നും കർഷകസംഘടനകളെ ഉദ്ധരിച്ച്‌ മാധ്യമങ്ങൾ ആവശ്യപ്പെട്ടു.

രാജ്യത്ത്‌ കർഷകർക്ക്‌ ന്യായവില കിട്ടാതിരിക്കുകയും ഉപഭോക്താക്കൾ തീവില കൊടുക്കേണ്ടിവരികയും ചെയ്യുന്ന അവസ്ഥയാണ്‌. ഇടനിലക്കാർ കർഷകരെ ചൂഷണം ചെയ്യുന്നു. ഈയിടെ ഹരിയാനയിൽ കർഷകർ തക്കാളി റോഡിൽ ഉപേക്ഷിച്ച്‌ പ്രതിഷേധിച്ചിരുന്നു. ഉരുളക്കിഴങ്ങ്‌, ഉള്ളി  കർഷകർക്കും പലപ്പോഴും ഉൽപാദനച്ചെലവ്‌ കിട്ടുന്നില്ല.

ഉൽപാദനച്ചെലവും അതിന്റെ 50 ശതമാനവും ചേർത്ത്‌ മിനിമം താങ്ങുവില നടപ്പാക്കുമെന്ന്‌ 2014ൽ ബിജെപി വാഗ്‌ദാനം ചെയ്‌തെങ്കിലും ഇത്‌ പ്രായോഗികമല്ലെന്നാണ്‌ അധികാരം കിട്ടിയശേഷം പറഞ്ഞത്‌.  കർഷകർക്ക്‌ മെച്ചപ്പെട്ട വില ലഭ്യമാക്കാനെന്ന പേരിൽ കാർഷികമേഖല കോർപറേറ്റുവൽക്കരിക്കുകയുമാണ്‌. മഹാരാഷ്ട്ര, പഞ്ചാബ്‌, കർണാടക സംസ്ഥാനങ്ങളിൽ കേരളമാതൃക ഉടൻ നടപ്പാക്കണമെന്ന്‌ കർഷകസംഘടനകൾ ആവശ്യപ്പെട്ടു.


ദേശാഭിമാനി വാർത്തകൾ ഇപ്പോള്‍ വാട്സാപ്പിലും ടെലഗ്രാമിലും ലഭ്യമാണ്‌.

വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
ടെലഗ്രാം ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..


----
പ്രധാന വാർത്തകൾ
-----
-----
 Top