19 September Saturday
നെതർലൻഡ്സ്‌‌ സന്ദർശത്തിന്‌ സഹായിച്ച കമ്പനിയെ റീ ബിൽഡ്‌ കേരളയിൽ തിരുകിക്കയറ്റി

നെതർലൻഡ്‌സ്‌ സന്ദർശനത്തിലും കുത്തിത്തിരിപ്പുമായി മനോരമ

വെബ് ഡെസ്‌ക്‌Updated: Friday Jul 24, 2020


സ്വന്തം ലേഖകൻ
മുഖ്യമന്ത്രിയുടെ നെതർലൻഡ്‌സ്‌ സന്ദർശനവും മനോരമ പത്രം നുണപ്രചാരണത്തിനായി ആയുധമാക്കുന്നു. നെതർലൻഡ്സ്‌‌ സന്ദർശനത്തിന്‌ സഹായിച്ച കമ്പനിയെ റീ ബിൽഡ്‌ കേരളയിൽ തിരുകിക്കയറ്റിയെന്നാണ്‌ പുതിയ വ്യാജപ്രചാരണം.  മുഖ്യമന്ത്രിയുടെ നെതർലൻഡ്‌സ്‌ സന്ദർശനത്തിന്റെ ചെലവ്‌ വഹിച്ചത്‌ ഇന്ത്യൻ എംബസിയാണെന്നത്‌  മറച്ചുവച്ചാണ് ദുഷ്‌പ്രചാരണം.

ജലവിഭവ വകുപ്പിൽ ഏറ്റെടുക്കുന്ന പദ്ധതികൾക്ക്‌ സാങ്കേതിക സഹായ കൺസൾട്ടന്റുമാരെ നിയമിക്കുന്ന ഫയലിനെപ്പറ്റിയാണ് പുതിയ ആരോപണം. കരാർ അടിസ്ഥാനത്തിൽ കൺസൾട്ടൻസി നിയമനത്തിനാണ്‌ ടെൻഡർ ക്ഷണിച്ചത്‌. ടെൻഡർ വിലയിരുത്തൽ സമിതി ആറു സ്ഥാപനങ്ങളുടെ ചുരുക്കപ്പട്ടിക തയ്യാറാക്കി.

കമ്പനികൾ സമർപ്പിച്ച ബിഡ്ഡുകൾ തുറക്കുന്നതിനുമുമ്പ്, അന്താരാഷ്ട്ര പദ്ധതികളുടെ അനുഭവ പരിചയത്തെ ഇന്ത്യൻ പദ്ധതികളുടെ അനുഭവപരിചയമായി പരിഗണിക്കാമോ എന്നതിൽ റീ ബിൽഡ് കേരള ഇനിഷ്യേറ്റീവിൽ (ആർകെഐ)നിന്ന്‌ വിലയിരുത്തൽ സമിതി വ്യക്തത തേടിയിരുന്നു. പരിഗണിക്കാൻ കഴിയില്ലെന്നാണ്‌ ആർകെഐ അറിയിച്ചത്‌.  ഈ അഭിപ്രായം സഹിതമാണ് ഫയൽ  നീങ്ങിയത്‌.

ആറുസ്ഥാപനങ്ങളെയും പരിഗണിക്കണോ, അതോ നിഷ്കർഷിച്ച എല്ലാ മാനദണ്ഡങ്ങളും  പാലിക്കുന്ന നാലുസ്ഥാപനങ്ങളെ പരിഗണിച്ചാൽ മതിയോ എന്ന പ്രശ്‌നം ഫയലിൽ ഉയർന്നുവന്നു. ഈ പ്രശ്‌നവും രേഖപ്പെടുത്തിയ ഫയൽ ജലവിഭവ അഡീഷണൽ ചീഫ് സെക്രട്ടറിയായിരുന്ന ഡോ. വിശ്വാസ് മേത്തയ്‌ക്ക്‌ മുന്നിലെത്തി. ആറു സ്ഥാപനങ്ങളെയും പരിഗണിക്കാമെന്ന്‌  കഴിഞ്ഞ ഫെബ്രുവരി 24ന്‌ അദ്ദേഹം രേഖപ്പെടുത്തി. നെതർലൻഡ്സ് സന്ദർശിച്ചവേളയിൽ ഈ സ്ഥാപനങ്ങൾ ചർച്ചയിൽ പങ്കെടുത്തു എന്നതും അഭിപ്രായത്തിൽ ഉൾപ്പെടുത്തി. ഇവരെ ഒഴിവാക്കുന്നത് ഡച്ച് സർക്കാരുമായുള്ള ബന്ധത്തിന് നല്ല സന്ദേശം നൽകില്ലെന്നും അഡീഷണൽ ചീഫ്‌ സെക്രട്ടറിയുടെ കുറിപ്പിലുണ്ടായി.  ഇതിനെയാണ് യാത്രയെ സഹായിച്ചു എന്ന വ്യാജ ആരോപണമായി മനോരമ ഉയർത്തിയത്‌.  ഉയർന്ന ഉദ്യോഗസ്ഥൻ ഫയലിൽ എഴുതുന്ന അഭിപ്രായത്തെയാണ്‌ മുഖ്യമന്ത്രിയുടെ തീരുമാനമായി വ്യാഖ്യാനിച്ച്‌ ദുഷ്‌പ്രചാരണത്തിന്‌ ഉപയോഗിച്ചത്‌. മുഖ്യമന്ത്രിയുടെയും അനുഗമിച്ചിരുന്നവരുടെയും യാത്രാ, താമസ ചെലവ്‌ തങ്ങളാണ്‌ വഹിച്ചതെന്ന്‌ നെതർലൻഡ്‌സിലെ ഇന്ത്യൻ എംബസിയിൽനിന്ന്‌ സംസ്ഥാന സർക്കാരിന്‌ ലഭിച്ച കത്തിൽ വ്യക്തമാക്കിയിട്ടുണ്ട്‌.


ദേശാഭിമാനി ഇപ്പോള്‍ ടെലഗ്രാമിലും ലഭ്യമാണ്‌. കൂടുതല്‍ വാര്‍ത്തകള്‍ക്കും അപ്ഡേറ്റുകള്‍ക്കുമായി ടെലഗ്രാം ചാനല്‍ സബ്സ്ക്രൈബ് ചെയ്യാം.

മറ്റു വാർത്തകൾ

----
പ്രധാന വാർത്തകൾ
-----
-----
 Top