24 October Thursday

ആദ്യ വാഹനാപകട മരണത്തിന് 105; മരിച്ചത്‌ കേരളവർമ വലിയ കോയിത്തമ്പുരാൻ

ടി ആർ അനിൽകുമാർUpdated: Sunday Sep 22, 2019


കേരളം ഞെട്ടലോടെ കേട്ട ആദ്യ വാഹനാപകട മരണത്തിന്‌ ഞായറാഴ്‌ച 105 വർഷം. കേരള കാളിദാസൻ കേരളവർമ വലിയ കോയിത്തമ്പുരാന്റേതാണ്‌ ആ മരണം. 1914 സെപ്‌തംബർ 20ന്‌ കായംകുളത്തിനടുത്തായിരുന്നു അപകടം. 22ന്‌ അദ്ദേഹം മരിച്ചു. വൈക്കം ക്ഷേത്രദർശനം കഴിഞ്ഞ്‌ തിരുവനന്തപുരം കൊട്ടാരത്തിലേക്ക്‌ മടങ്ങവേ കായംകുളം കുറ്റിത്തെരുവ്‌ ജങ്‌ഷനിലാണ്‌ കാർ മറിഞ്ഞത്‌. മരുമകൻ കേരള പാണിനി എ ആർ രാജരാജവർമയും കൂടെയുണ്ടായിരുന്നു. 

ചികിത്സയിലിരിക്കെ എ ആർ രാജരാജവർമയുടെ മാവേലിക്കരയിലെ കൊട്ടാരത്തിലായിരുന്നു അന്ത്യം. പട്ടി കുറുകെ ചാടിയതോടെ ഡ്രൈവർ കാർ വെട്ടിച്ചതാണ്‌ അപകടത്തിനിടയാക്കിയത്‌. ‘‘അടുത്ത വീട്ടിലെത്തിച്ച്‌ വെള്ളം നൽകി വിശ്രമിച്ചശേഷമാണ്‌  മാവേലിക്കര കൊട്ടാരത്തിലെത്തിച്ചത്‌’’–- 12 വർഷം മുമ്പ്‌ മരിച്ച മുത്തശി ലക്ഷ്‌മി തമ്പുരാട്ടി പറഞ്ഞ കഥ ഹരിപ്പാട്‌ കൊട്ടാരത്തിലെ ഇളം തലമുറക്കാരൻ വി കെ കേരളവർമ ഓർത്തെടുത്തു. 

എ ആർ രാജരാജവർമയുടെ ഡയറികുറിപ്പിൽ അപകടത്തെക്കുറിച്ച്‌ പറയുന്നതിങ്ങനെ ‘ആണ്ടുതോറുമുള്ള വൈക്കം ക്ഷേത്രദർശനത്തിന്‌ കൊല്ലത്തെത്തിയപ്പോഴേ മടക്കയാത്രയ്‌ക്ക്‌ കാറുമായി വരണമെന്ന്‌ തമ്പുരാൻ പറഞ്ഞു. കുറ്റിത്തെരുവുപാലം കഴിഞ്ഞതോടെ നായ കുറുകെ ചാടി. അമ്മാവൻ ഇരുന്ന ഭാഗത്തേക്ക്‌ കാർ മറിഞ്ഞു. നെഞ്ചിന്റെ വലതുഭാഗം കാറിലോ നിലത്തോ ഇടിച്ചിട്ടുണ്ടാവാം. പുറമെ പരിക്കില്ലായിരുന്നു. പരിചാരകൻ തിരുമുൽപാടിന്റെ കാലൊടിഞ്ഞു. എനിക്കോ ഡ്രൈവർക്കോ പരിക്കേറ്റില്ല. ഉടനെ കൊട്ടാരത്തിലെത്തി വലിയത്താൻ ഡോക്ടറെ കാണിച്ചു. രണ്ടാംദിവസമാണ്‌ ശ്വാസോഛ്വാസത്തിനു വേഗത കൂടിയതും എന്റെ കൈകളിലേക്കു ചാരി അന്ത്യശ്വാസം വലിച്ചതും.’

എ ആറിന്റെ മക്കൾ ഭാഗീരഥി അമ്മ തമ്പുരാനും എം രാഘവവർമ രാജായും ചേർന്നെഴുതിയ ‘എ ആർ രാജരാജവർമ’ പുസ്‌തകത്തിലാണ്‌ ഡയറിക്കുറിപ്പുള്ളത്‌. 

മരണ നിരക്ക്‌ ഉയർന്നുതന്നെ

കേരളത്തിൽ 2001ൽ  വാഹനാപകടത്തിൽ മരിച്ചത്‌ 2674 പേരാണ്‌. 2019 ജനുവരി ഒന്നുമുതൽ  ജൂൺ 30വരെ ആറുമാസത്തിനുള്ളിൽ 2464 പേർ മരിച്ചു. വാഹനാപകടമരണ നിരക്ക്‌ ഓരോവർഷവും ഉയരുകയാണ്‌. 2018ൽ  4303 പേരാണ്‌ മരിച്ചത്‌. 2017ൽ ഇത്‌ 4131 ആയിരുന്നു. കഴിഞ്ഞവർഷം കൂടുതൽ ജീവൻ പൊലിഞ്ഞത്‌ ആലപ്പുഴയിലാണ്‌. 373 പേർ.


പ്രധാന വാർത്തകൾ
 Top