24 October Thursday

കരുണാകരന്റെ പേരിൽ മറ്റൊരു ട്രസ്‌റ്റും തട്ടിപ്പും

പ്രത്യേക ലേഖകൻUpdated: Sunday Sep 22, 2019


കണ്ണൂർ
അന്തരിച്ച കോൺഗ്രസ്‌ നേതാവ്‌ കെ കരുണാകരന്റെ പേരിൽ ചെറുപുഴയിലെ കോൺഗ്രസ്‌ നേതാക്കൾ രൂപീകരിച്ചത്‌ രണ്ടു ചാരിറ്റബിൾ ട്രസ്‌റ്റുകൾ. 2011ൽ പെരിങ്ങോം ആസ്ഥാനമായാണ്‌ ആദ്യ ട്രസ്‌റ്റ്‌ രൂപീകരണം. കഴിഞ്ഞ ദിവസം അറസ്‌റ്റിലായ കെ കുഞ്ഞികൃഷ്‌ണൻ നായർ ചെയർമാനും റോഷി ജോസ്‌ സെക്രട്ടറിയും അബ്ദുൾ സലീം ട്രഷററും. പിന്നീട്‌ ഇവർതന്നെ ഭാരവാഹികളായി കാസർകോട്ട്‌ മറ്റൊരു കെ കരുണാകരൻ സ്‌മാരക ചാരിറ്റബിൾ  ട്രസ്‌റ്റുകൂടി രൂപീകരിച്ചു.

പരാതിക്കാരായ ജെയിംസ്‌ പന്തമാക്കലും വി പി ദാസനും അറിയാത്ത കള്ളക്കളി പൊലീസ്‌ അന്വേഷണത്തിലാണ്‌ പുറത്തുവന്നത്‌. യഥാർഥത്തിൽ ട്രസ്‌റ്റ്‌ ഭാരവാഹികളെ കുടുക്കിയതും ഈ സംഭവമാണ്‌. ഒരേ ആളുകൾ ഭാരവാഹികളായി കെ കരുണാകരന്റെ പേരിൽ രണ്ട്‌ ട്രസ്‌റ്റുകൾ രൂപീകരിച്ചതെന്തിനെന്ന പൊലീസിന്റെ ചോദ്യത്തിന്‌ ട്രസ്‌റ്റ്‌ ഭാരവാഹികൾക്ക്‌ കൃത്യമായ മറുപടിയുണ്ടായില്ല. ആദ്യം രജിസ്‌റ്റർ ചെയ്‌തപ്പോഴുണ്ടായ ചില അപാകങ്ങൾ പരിഹരിക്കാനാണ്‌ വീണ്ടും രജിസ്‌റ്റർ ചെയ്‌തതെന്നായിരുന്നു മറുപടി. എന്നാൽ, അപാകം പരിഹരിക്കാനാണെങ്കിൽ അതേ സ്ഥലത്തല്ലേ വീണ്ടും ചെയ്യേണ്ടതെന്ന ചോദ്യത്തിനും  തൃപ്‌തികരമായ വിശദീകരണമുണ്ടായില്ല. വൈസ്‌ ചെയർമാന്മാരായിരുന്ന ജയിംസ്‌ പന്തമാക്കലിനെയും വി പി ദാസനെയും ഒഴിവാക്കിയാണ്‌ രണ്ടാമത്തെ ട്രസ്‌റ്റ്‌ രൂപീകരണം. ഇവരെ വിവരം അറിയിക്കുകയോ ആദ്യ ട്രസ്‌റ്റിനായി നൽകിയ ഓരോ ലക്ഷം രൂപ തിരിച്ചുനൽകുകയോ ചെയ്‌തില്ല. അഴിമതിയും വിശ്വാസവഞ്ചനയും ലക്ഷ്യമിട്ടാണ്‌ രണ്ടാമതും ട്രസ്‌റ്റ്‌ രൂപീകരിച്ചതെന്ന്‌ ഇതിൽനിന്ന്‌ വ്യക്തമാണെന്ന്‌ പയ്യന്നൂർ ഒന്നാംക്ലാസ്‌ മജിസ്‌ട്രേട്ട്‌ കോടതിയിൽ സമർപ്പിച്ച പ്രതികളുടെ റിമാൻഡ്‌ റിപ്പോർട്ടിൽ പൊലീസ്‌ പറയുന്നു.

ട്രസ്‌റ്റ്‌ വൈസ്‌ ചെയർമാന്മാരായ തന്നെയും വി പി ദാസനെയും ഒഴിവാക്കി ചെറുപുഴ ഡെവലപ്പേഴ്‌സ്‌ എന്ന സ്വകാര്യ സംരംഭവും പിന്നീട്‌ സിയാദ്‌ എന്ന സ്വകാര്യ കമ്പനിയും രൂപീകരിച്ചത്‌ ചതിയും വഞ്ചനയുമാണെന്നാണ്‌  ജയിംസ്‌ പന്തമാക്കലിന്റെ പരാതിയിൽ പറഞ്ഞിരുന്നത്‌. ഇതുസംബന്ധിച്ച അന്വേഷണത്തിലാണ്‌ രണ്ട്‌ ട്രസ്‌റ്റുതന്നെ രൂപീകരിച്ചതിന്റെ തെളിവുകൾ പൊലീസിന്‌ ലഭിച്ചത്‌. ട്രസ്‌റ്റിൽനിന്ന്‌ ഒഴിവാക്കപ്പെട്ട കാര്യം ജയിംസ്‌ പന്തമാക്കലോ വി പി ദാസനോ അറിഞ്ഞില്ലെന്നു മാത്രമല്ല, തങ്ങൾ ഇപ്പോഴും ഉപാധ്യക്ഷന്മാരാണെന്ന്‌ ധരിച്ചിരിക്കുകയാണ്‌ ഇരുവരും. സംശയം തോന്നാതിരിക്കാൻ രണ്ടോ മൂന്നോ യോഗങ്ങളിൽ ഇവരെ പങ്കെടുപ്പിക്കുകയും ചെയ്‌തിരുന്നു. ഇതെല്ലാം ബോധപൂർവമാണെന്ന്‌ പൊലീസ്‌ കണ്ടെത്തി.
 


പ്രധാന വാർത്തകൾ
 Top