22 October Thursday

മോഡി സർക്കാർ കർഷകരെ വഞ്ചിച്ചു: കെഎസ്‌കെടിയു

വെബ് ഡെസ്‌ക്‌Updated: Monday Sep 21, 2020


തിരുവനന്തപുരം
രാജ്യത്തെ കാർഷിക മേഖലയെ കോർപറേറ്റുകൾക്ക് തീറെഴുതുന്ന കാർഷിക ബില്ലുകൾ ഇരുസഭകളിലും പാസാക്കിയ മോഡി സർക്കാരിന്റെ നടപടി അങ്ങേയറ്റം അപലപനീയവും പ്രതിഷേധാർഹവുമാണെന്ന്  കെഎസ്‌കെടിയു പ്രസ്താവനയിൽ പറഞ്ഞു. 

ബില്ലുകൾ പാർലമെന്ററി സെലക്ട് കമ്മിറ്റിക്ക് വിടണമെന്ന ആവശ്യം തള്ളി വോട്ടെടുപ്പില്ലാതെ ശബ്ദവോട്ടിന്റെ പിൻബലത്തിലാണ്‌ ബില്ലുകൾ പാസാക്കിയത്. കാർഷിക മേഖലയിലെ നിയന്ത്രണങ്ങൾ ഒഴിവാക്കാനും കരാർ കൃഷിക്കുമുള്ള ബില്ലുകളാണ് കോർപറേറ്റുകൾക്കുവേണ്ടി ബിജെപി സർക്കാർ പാസാക്കിയത്.

മോഡിസർക്കാർ രാജ്യത്തെ കൃഷിക്കാരെയും കർഷകത്തൊഴിലാളികളെയും വഞ്ചിച്ചു. ബിജെപി നേതൃത്വം നൽകുന്ന മുന്നണിയിൽ പോലും എതിർപ്പുണ്ട്. ബില്ലിൽ പ്രതിഷേധിച്ച് ഒരു കേന്ദ്രമന്ത്രിതന്നെ രാജിവച്ചു. വിളകൾക്കുള്ള താങ്ങുവില നിയമപരിഷ്‌കരണത്തോടെ ഇല്ലാതാകും. കോർപറേറ്റുകൾക്ക് പരിധിയില്ലാതെ വിള സംഭരിക്കാൻ അനുമതി നൽകുന്ന മൂന്ന് ബില്ലിലും താങ്ങുവിലയെക്കുറിച്ച് പരാമർശമില്ല. ജനങ്ങൾക്ക്‌ നൽകിയ വാക്കിന്‌ വിലനൽകാത്ത പ്രധാനമന്ത്രി നൽകുന്ന ഉറപ്പ് വിശ്വാസയോഗ്യമല്ല. നരേന്ദ്ര മോഡി സർക്കാരിന്റെ കാർഷിക വിരുദ്ധ നീക്കങ്ങൾക്കെതിരെയും കോർപറേറ്റ് ദാസ്യ മനോഭാവത്തിനെതിരെയും ശക്തമായ പ്രതിഷേധമുയർത്താൻ യൂണിയന്റെ മുഴുവൻ പ്രവർത്തകരും തയ്യാറാകണമെന്ന് സംസ്ഥാന പ്രസിഡന്റ്‌ എം വി ഗോവിന്ദനും ജനറൽ സെക്രട്ടറി എൻ ആർ ബാലനും അഭ്യർഥിച്ചു.
 


ദേശാഭിമാനി വാർത്തകൾ ഇപ്പോള്‍ വാട്സാപ്പിലും ടെലഗ്രാമിലും ലഭ്യമാണ്‌.

വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
ടെലഗ്രാം ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..


----
പ്രധാന വാർത്തകൾ
-----
-----
 Top