20 September Sunday

പുറംജോലി കരാറുകൾ : നാവികസേനയിൽ 7845 തസ്‌തിക നിർത്തലാക്കി; ദക്ഷിണ നാവിക കമാൻഡിലെ 715 തസ്‌തികകൾ ഇല്ലാതാകും

വെബ് ഡെസ്‌ക്‌Updated: Saturday Aug 8, 2020


സ്വന്തം ലേഖകൻ
പുറംജോലി കരാറുകൾ നടപ്പാക്കുന്നതിന്റെ ഭാഗമായി ഇന്ത്യൻ നാവികസേനയിലെ  7,845 തസ്‌തിക നിർത്തലാക്കി. മുംബൈ നാവിക ആസ്ഥാനത്തെയും നാല്‌ കമാൻഡുകളിലെയും പത്തോളം വിഭാഗങ്ങളിലെ തസ്‌തികകളാണ്‌ നിർത്തിയത്‌. ഈ തസ്‌തികകളിൽ ചിലത്‌ സ്ഥിരമായി ഇല്ലാതാക്കാനും മറ്റുള്ളവയിൽ പുറംജോലി കരാർ നൽകാനുമാണ്‌ ഉദ്ദേശിക്കുന്നതെന്ന്‌  ഉത്തരവിൽ പറഞ്ഞു.  കൊച്ചി ആസ്ഥാനമായ ദക്ഷിണ നാവിക കമാൻഡിലെ 715 തസ്‌തികകൾ ഇല്ലാതാകും.

മുംബൈ ആസ്ഥാനമായ പടിഞ്ഞാറൻ കമാൻഡിലാണ്‌ കൂടുതൽ തസ്‌തിക ഇല്ലാതാകുന്നത്‌. 4134. കിഴക്കൻ കമാൻഡിൽ 2439ഉം ആൻഡമാൻ ആൻഡ്‌ നിക്കോബാർ കമാൻഡിൽ 294ഉം ഡൽഹിയിൽ 263ഉം തസ്‌തിക ഇല്ലാതാകും. തസ്‌തിക നിർത്തലാക്കലും പകരം സംവിധാനങ്ങളും അടിയന്തരമായി നടപ്പാക്കുമെന്നും ഉത്തരവിൽ പറയുന്നു. നാവികസേനയുടെ വിവിധ പദ്ധതികളുടെ ഭാഗമായുള്ള നിർമാണങ്ങൾ രൂപകൽപ്പന ചെയ്യുന്ന വിഭാഗത്തിലെ ജീവനക്കാർ, കാന്റീൻ ജീവനക്കാർ, വർക്‌ഷോപ്പുകളിലെ സ്‌കിൽഡ്‌, സെമി സ്‌കിൽഡ്‌ ജീവനക്കാർ, സൂപ്പർവൈസർമാർ, ജലയാനങ്ങളിലെ ജീവനക്കാർ തുടങ്ങിയവരുടെ തസ്‌തികകളാണ്‌ ഇല്ലാതാകുക. ഈ തസ്‌തികകളിൽ നിലവിലുള്ള ജീവനക്കാരെ ഒഴിവാക്കുമോ അതോ മറ്റിടങ്ങളിൽ നിയമിക്കുമോ എന്ന കാര്യത്തിൽ വ്യക്തതയില്ല. ഉത്തരവിൽ ഉൾപ്പെടാത്ത, എന്നാൽ ഒഴിവാക്കേണ്ട തസ്‌തികകൾ വേറെ ഉണ്ടെങ്കിൽ അറിയിക്കാൻ കമാൻഡുകളോട്‌ ആവശ്യപ്പെട്ടു‌. അങ്ങനെ വരുമ്പോൾ തസ്‌തികകളുടെ എണ്ണം ഇനിയും ഉയരും‌. നേരത്തെ മിലിറ്ററി എൻജിനിയറിങ് സർവീസിലെ (എംഇഎസ്‌) 9,304 തസ്‌തിക കേന്ദ്രസർക്കാർ നിർത്തലാക്കിയിരുന്നു. 

പ്രതിരോധമേഖലയിൽ പുറംജോലി കരാറുകൾ നൽകുന്നതിനെ സിവിലിയൻ ജീവനക്കാരുടെ സംഘടനകൾ ശക്തമായി എതിർക്കുന്നുണ്ട്‌. ജീവനക്കാരുടെ സംഘടനകളുമായൊന്നും കൂടിയാലോചിക്കാതെയാണ്‌ ഇതെല്ലാം നടപ്പാക്കുന്നതെന്ന്‌ അവർ പറഞ്ഞു.ഒറ്റയടിക്ക്‌ 7,845 തസ്‌തിക നിർത്തലാക്കി പുറംജോലി കരാർ നൽകുന്നതിനെതിരെ ഓൾ ഇന്ത്യാ ഡിഫൻസ്‌ എംപ്ലോയിസ്‌ ഫെഡറേഷൻ പ്രതിഷേധം അറിയിച്ചു‌.


ദേശാഭിമാനി ഇപ്പോള്‍ ടെലഗ്രാമിലും ലഭ്യമാണ്‌. കൂടുതല്‍ വാര്‍ത്തകള്‍ക്കും അപ്ഡേറ്റുകള്‍ക്കുമായി ടെലഗ്രാം ചാനല്‍ സബ്സ്ക്രൈബ് ചെയ്യാം.

മറ്റു വാർത്തകൾ

----
പ്രധാന വാർത്തകൾ
-----
-----
 Top