06 February Monday
ഹൗസ്‌ സർജന്മാർ 24 മണിക്കൂർ 
പണിമുടക്ക്‌ തുടങ്ങി

ഇന്റേൺഷിപ് മാർഗനിർദേശം ; വിദേശ മെഡിക്കൽ ബിരുദധാരികൾ പ്രതിസന്ധിയിൽ

വെബ് ഡെസ്‌ക്‌Updated: Thursday Dec 1, 2022


കൊച്ചി
വിദേശ മെഡിക്കൽ ബിരുദം നേടിയവർ ജില്ലാ ജനറൽ ആശുപത്രികളിൽ ചെയ്യുന്ന ഇന്റേൺഷിപ്പിന്‌ നാഷണൽ മെഡിക്കൽ കൗൺസിൽ (എൻഎംസി) അംഗീകാരം പിൻവലിച്ചതിൽ പ്രതിഷേധിച്ച്‌ ഹൗസ് സർജൻമാർ സമരം തുടങ്ങി. മെഡിക്കൽ കോളേജുകളിലോ അംഗീകൃത സ്ഥാപനങ്ങളിലോമാത്രം ഇന്റേൺഷിപ് മതിയെന്ന എൻഎംസി തീരുമാനത്തോടെ ജില്ലാ ജനറൽ ആശുപത്രികളിൽ ഇന്റേൺഷിപ് ചെയ്യുന്ന ആയിരത്തോളം ഹൗസ്‌ സർജൻമാർ പ്രതിസന്ധിയിലായി.

എറണാകുളം ജനറൽ ആശുപത്രിയിൽ ഇന്റേൺഷിപ് ചെയ്യുന്ന 120 ഹൗസ്‌ സർജൻമാരാണ്‌ ബുധൻ രാവിലെ എട്ടുമുതൽ 24 മണിക്കൂർ പണിമുടക്ക്‌ ആരംഭിച്ചത്‌. അത്യാഹിതവിഭാഗത്തെ ഒഴിവാക്കിയാണ്‌ സമരം. എൻഎംസി തീരുമാനത്തോടെ തങ്ങളുടെ ഉന്നതപഠനസാധ്യത ഉൾപ്പെടെ പ്രതിസന്ധിയിലായിരിക്കുകയാണെന്ന്‌ സമരത്തിലുള്ള ഹൗസ്‌ സർജൻമാർ പറഞ്ഞു. ഇന്റേൺഷിപ് മാർഗനിർദേശം പാലിക്കാത്ത സംസ്ഥാന രജിസ്‌ട്രേഷന്‌ അംഗീകാരമുണ്ടാകില്ല. അതിനാൽ അഖിലേന്ത്യാ പരീക്ഷകളെഴുതാനോ ഉന്നതപഠനത്തിന്‌ പോകാനോ കഴിയില്ല.

വിദേശ മെഡിക്കൽ ബിരുദം നേടിയവർ ഇന്ത്യയിൽ പ്രാക്‌ടീസ്‌ ചെയ്യാൻ എൻഎംസിയുടെ എഫ്എംജി സ്ക്രീനിങ് പരീക്ഷ പാസായശേഷം 12 മാസത്തെ നിർബന്ധിത ഇന്റേൺഷിപ് ചെയ്യേണ്ടതുണ്ട്‌. വർഷങ്ങളായി ജില്ലാ ജനറൽ ആശുപത്രികളിൽ ഉൾപ്പെടെ ഇന്റേൺഷിപ് നടക്കുന്നു. 2021 നവംബർ 18ലെ ഉത്തരവുപ്രകാരം എൻഎംസിക്കുകീഴിൽ കംപൽസറി റൊട്ടേറ്ററി മെഡിക്കൽ ഇന്റേൺഷിപ് റഗുലേഷന്റെ പരിധിയിലുള്ള മെഡിക്കൽ കോളജുകളിലും അംഗീകൃത സ്ഥാപനങ്ങളിലുംമാത്രമാണ്‌ ഇന്റേൺഷിപ് ചെയ്യാവുന്നത്‌.

ഈ ഉത്തരവുണ്ടായി 11 മാസത്തിനുശേഷം 2021 ഒക്‌ടോബറിലാണ്‌ ഇന്റേൺഷിപ് ചെയ്യാവുന്ന സ്ഥാപനങ്ങളുടെ പട്ടിക എൻഎംസി പുറത്തിറക്കിയത്‌. അതിൽ ജില്ലാ ജനറൽ ആശുപത്രികളെ ഒഴിവാക്കിയിരുന്നു. പട്ടിക വരുംമുമ്പ്‌ ജില്ലാ ജനറൽ ആശുപത്രികളിൽ ഇന്റേൺഷിപ് ആരംഭിച്ചവരുടെ ഭാവി അതോടെ പ്രതിസന്ധിയിലായി. അവർ വീണ്ടും ഒരുവർഷം ഇന്റേൺഷിപ് ചെയ്യേണ്ടിവരുമോ എന്നാണ്‌ ആശങ്ക. അത്‌ വലിയ സാമ്പത്തിക ബാധ്യതയാകുമെന്ന്‌ ഹൗസ്‌ സർജൻമാർ പറഞ്ഞു. ഇന്റേൺഷിപ് 10 മാസംവരെ പൂർത്തിയാക്കിയവരുണ്ട്‌. ഫീസ്‌ നൽകിയും സ്‌റ്റൈപെൻഡില്ലാതെയുമാണ്‌ ഇന്റേൺഷിപ് ചെയ്യുന്നത്‌.

തീരുമാനങ്ങൾ യഥാസമയം അതത്‌ സംസ്ഥാന മെഡിക്കൽ കൗൺസിലുകളെ അറിയിച്ചിരുന്നതായി എൻഎംസി പറഞ്ഞിരുന്നു. എന്നാൽ, അത്തരമൊരറിയിപ്പും എൻഎംസിയിൽനിന്ന്‌ ലഭിച്ചിട്ടില്ലെന്നാണ്‌ സംസ്ഥാന മെഡിക്കൽ കൗൺസിലിൽനിന്ന്‌ ഹൗസ്‌ സർജൻമാർക്ക്‌ അറിയാനായത്‌.
 


ദേശാഭിമാനി വാർത്തകൾ ഇപ്പോള്‍ വാട്സാപ്പിലും ടെലഗ്രാമിലും ലഭ്യമാണ്‌.

വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
ടെലഗ്രാം ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..




----
പ്രധാന വാർത്തകൾ
-----
-----
 Top