28 February Sunday

എല്ലാവരുമെത്തും , ഉത്സവമാകും

സ്വന്തം ലേഖകന്‍Updated: Monday Jan 25, 2021

ഫിനിഷ് ലെെൻ ആലപ്പുഴ ബെെപാസിന്റെ അവസാവട്ട മിനുക്കുപണിയിലേർപ്പെട്ടിരിക്കുന്ന തൊഴിലാളികൾ

ആലപ്പുഴ

ആലപ്പുഴ ബൈപാസ് ഉദ്ഘാടന ചടങ്ങിൽ ജനപ്രതിനിധികളെല്ലാം  പങ്കെടുക്കും. സംസ്ഥാനത്തിന്റെ നിർദേശപ്രകാരം ജനപ്രതിനിധികളെല്ലാവരെയും ഉൾപ്പെടുത്തി കേ​ന്ദ്രസർക്കാർ പുതിയപട്ടിക പുറത്തുവിട്ടു.  

 ഉദ്‌ഘാടകരായ മുഖ്യമന്ത്രി പിണറായി വിജയൻ, കേന്ദ്ര ഉപരിതല ഗതാഗത മന്ത്രി നിതിൻ ഗഡ്കരി എന്നിവരെ കൂടാതെ ഗവർണർ ആരിഫ്​ മുഹമ്മദ്​ ഖാൻ, കേന്ദ്ര ഉപരിതല ഗതാഗതസഹമന്ത്രി വി കെ സിങ്, കേ​ന്ദ്രമന്ത്രി വി മുരളീധരൻ, മന്ത്രിമാരായ ജി സുധാകരൻ,  ടി എം തോമസ്​ ഐസക്ക്​, പി തിലോത്തമൻ, എംപിമാരായ എ എം ആരിഫ്​,  കെ സി വേണുഗോപാൽ, ആലപ്പുഴ നഗരസഭാധ്യക്ഷ സൗമ്യരാജ്​, ദേശീയപാത സെക്രട്ടറി ഗിരിധർ അർമാനെ, സംസ്ഥാന പൊതുമരാമത്ത്​ സെക്രട്ടറി പ്രണബ് ജ്യോതിനാഥ് എന്നിവരുടെ പേരുകളാണ്​ പുതിയപട്ടികയിൽ. 

  നേരത്തെ തയാറാക്കിയ പട്ടികയിൽ എംപിമാരായ എ എം ആരിഫ്, കെ സി വേണുഗോപാൽ എന്നിവർ ഉൾപ്പെട്ടിരുന്നില്ല.  പട്ടികയിൽ തിരുത്തൽ വേണമെന്ന്​ ആവശ്യപ്പെട്ട്​ സംസ്ഥാനം കേന്ദ്രത്തിന്​ കത്തയച്ചതിന്​ പിന്നാലെയാണ്​ പുതിയപട്ടിക​. 

കളർകോട്​ ജങ്​ഷനിൽ പകൽ​ ഒന്നിന്​ വീഡിയോകോൺ​ഫറൻസ്​ വഴി ആരംഭിക്കുന്ന ഉദ്​ഘാടനചടങ്ങ് 2.11ന് അവസാനിക്കുന്ന രീതിയിലാണ് ക്രമീകരിച്ചിരിക്കുന്നത്​. കേന്ദ്ര ഉപരിതല ഗതാഗതാവകുപ്പ് മന്ത്രി നിതിൻ ഗഡ്കരിയും മുഖ്യമ​ന്ത്രി പിണറായി വിജയനും ചേർന്നാണ്​ ഉദ്​ഘാടനം​. 

പ​ങ്കെടുക്കുന്ന ജനപ്രതിനിധികൾക്ക്​ നാല് മിനിറ്റ് വീതം സംസാരിക്കാൻ സമയവും അനുവദിച്ചിട്ടുണ്ട്​. 

  വിവാദങ്ങളില്ലെന്നും അന്തിമലിസ്​റ്റിൽ എല്ലാവരും ഉണ്ടാകുമെന്നാണ്​ പ്രതീക്ഷയെന്നും മന്ത്രി ജി സുധാകരൻ ഞായറാഴ്ച പ്രതികരിച്ചു.  കേന്ദ്രം വിട്ടുകളഞ്ഞ പേരുകൾ ഉൾപെടുത്തി കേന്ദ്രത്തിന്​ അയച്ചുകൊടുത്തിരുന്നെന്നും മന്ത്രി പറഞ്ഞു.


ദേശാഭിമാനി വാർത്തകൾ ഇപ്പോള്‍ വാട്സാപ്പിലും ടെലഗ്രാമിലും ലഭ്യമാണ്‌.

വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
ടെലഗ്രാം ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..

----
പ്രധാന വാർത്തകൾ
-----
-----
 Top