21 February Thursday
മലയാളിജീവിതത്തിന്റെ നേര്‍ക്കാഴ്ചയായി

'ഒഴിവുദിവസത്തെ കളി'

സ്വന്തം ലേഖകന്‍Updated: Wednesday Mar 2, 2016

'ഒഴിവുദിവസത്തെ കളി' ചിത്രത്തില്‍ നിന്നുള്ള രംഗം

തിരുവനന്തപുരം > പരിഷ്കൃതമെന്ന് അഭിമാനിക്കുന്ന  മലയാളി സമൂഹത്തിന്റെ കാപട്യങ്ങള്‍ ലളിതമായ ആഖ്യാനത്തിലൂടെ തുറന്ന് കാട്ടിയാണ് സനല്‍കുമാര്‍ ശശിധരന്റെ ഒഴിവുദിവസത്തെ കളി ശ്രദ്ധേയമാകുന്നത്. കാര്യമായ മത്സരമില്ലാതെയാണ് സംസ്ഥാന ചലച്ചിത്ര അവാര്‍ഡ് നിര്‍ണയത്തില്‍ ഈ ചിത്രത്തെ മികച്ച ചിത്രമായി തെരഞ്ഞെടുത്തത്. വര്‍ത്തമാനകാല സാമൂഹ്യ– രാഷ്ട്രീയ ജീവിതത്തിന്റെ സത്യസന്ധമായ നേര്‍ക്കാഴ്ചയാണ് ചിത്രമെന്ന് ജൂറി വിലയിരുത്തി. ജാതീയതയും സ്ത്രീവിരുദ്ധതയും ഊറിക്കിടക്കുന്ന മലയാളിയുടെ ആണ്‍ ജീവിതങ്ങളിലേക്കുള്ള അഗാധമായ ഉള്‍പ്പിരിവുകളാല്‍ സമ്പന്നമാണ് ഈ ചിത്രമെന്നും ജൂറി വിലയിരുത്തി.


ഭരണസംവിധാനവും അതിന്റെ മര്‍ദനോപാധികളും എങ്ങനെ ദളിതനും സ്ത്രീക്കും പരിസ്ഥിതിക്കുംമേലെ കടന്നുകയറുന്നു എന്നതിന്റെ സൂക്ഷ്മാവിഷ്കാരം കൂടിയാണ് ഈ ചിത്രം. ഉണ്ണി ആറിന്റെ ഇതേ പേരിലുള്ള ചെറുകഥയുടെ ചലച്ചിത്രാവിഷ്കാരമാണ് ചിത്രം. അരുവിക്കര ഉപതെരഞ്ഞെടുപ്പ് ദിവസം നഗരത്തിലെ സുഹൃത്തുക്കളായ ഒരുകൂട്ടം ചെറുപ്പക്കാര്‍ തിരക്കുകള്‍ മറന്ന് ഉല്ലസിക്കാനായി വനത്തിലേക്ക് യാത്ര പോകുന്നതും അവിടെയുള്ള സംഭവവികാസങ്ങളുമാണ് ചിത്രത്തില്‍ കടന്നുവരുന്നത്. മദ്യപാനം തുടങ്ങുന്നതോടെ ഓരോരുത്തരും അവരുടെ തനിനിറം പുറത്തെടുക്കുന്നു. ബുദ്ധിജീവി വര്‍ത്തമാനം പറയുന്നവന്റേതടക്കം ഉള്ളിലിരിപ്പ് എത്ര സ്ത്രീവിരുദ്ധവും ദളിത് വിരുദ്ധവുമാണെന്ന് ചിത്രം തുറന്നുകാട്ടുന്നു. മദ്യപിച്ച സംഘം നേരമ്പോക്കിനായി കള്ളനും പൊലീസും കളിക്കുന്നതും കൂട്ടത്തില്‍ കള്ളനാകുന്ന ദാസന്‍ എന്ന ദളിത് യുവാവിനെ തൂക്കിലേറ്റി ശിക്ഷ നടപ്പാക്കുന്നതുമാണ് ചിത്രം. അരാഷ്ട്രീയ അജന്‍ഡകളില്‍ മുങ്ങിപ്പോകുന്ന കേരളീയന്‍ ഇന്നും ഉള്ളില്‍ സൂക്ഷിക്കുന്ന സവര്‍ണ ജാതിബോധത്തിനെതിരായ വിമര്‍ശംകൂടിയാണ് ഈ ചിത്രം. പുതുമുഖങ്ങളുടെ കൃത്രിമത്വമില്ലാത്ത അഭിനയവും തുടക്കംമുതലുള്ള വൈഡ് ഷോട്ടുകളും ചിത്രത്തെ പുതുമയുള്ളതാക്കി. ചിത്രം ഉടന്‍ തിയറ്ററുകളിലെത്തും.


ആദ്യ ചിത്രം ഒരാള്‍പ്പൊക്കത്തിലൂടെ കഴിഞ്ഞ വര്‍ഷത്തെ മികച്ച സംവിധായകനുള്ള പുരസ്കാരവും സനല്‍കുമാറിനെ തേടിയെത്തിയിരുന്നു. ഇത്തവണത്തെ രാജ്യാന്തര ചലച്ചിത്രമേളയില്‍ മികച്ച മലയാള ചിത്രത്തിനുള്ള ഫിപ്രസി പുരസ്കാരം ഒഴിവുദിവസത്തെ കളി നേടിയിരുന്നു. പുതിയ ചിത്രം 'സെക്സി ദുര്‍ഗ' യുടെ പണിപ്പുരയിലാണിപ്പോള്‍ സനല്‍കുമാര്‍.

പ്രധാന വാർത്തകൾ
 Top