21 May Tuesday

ലീഗ് - എസ്ഡിപിഐ ചർച്ച: സ്ഥിരീകരിച്ച് എസ്ഡിപിഐ സംസ്ഥാന പ്രസിഡന്റ്

വെബ് ഡെസ്‌ക്‌Updated: Thursday Mar 14, 2019

മലപ്പുറം> മുസ്ലിംലീഗ‌് ദേശീയ ജനറൽ സെക്രട്ടറിയും മലപ്പുറം ലോക‌്സഭാ മണ്ഡലം സ്ഥാനാർഥിയുമായ പി കെ കുഞ്ഞാലിക്കുട്ടി, പൊന്നാനി മണ്ഡലം യുഡിഎഫ‌് സ്ഥാനാർഥി ഇ ടി മുഹമ്മദ‌് ബഷീർ എന്നിവർ കഴിഞ്ഞ ദിവസം പോപ്പുലർ ഫ്രണ്ട‌് സംസ്ഥാന പ്രസിഡന്റ‌് നസറുദ്ദീൻ എളമരവുമായി കൂടിക്കാഴ‌്ച നടത്തിയെന്ന വാർത്ത സ്ഥിരീകരിച്ച‌് എസ്ഡിപിഐ. ചർച്ച നടത്തിയെന്ന് എസ്ഡിപിഐ സംസ്ഥാന പ്രസിഡന്റ് അബ്ദുൽ മജീദ് ഫൈസി പറഞ്ഞു. ലീഗ് നേതാക്കൾ തങ്ങളോട് സഹായം ആവിശ്യപെട്ടതായി അബ്ദുൽ മജീദ് ഫൈസി പറഞ്ഞു . പൊന്നാനിയിൽ സഹകരിച്ചു പ്രവർത്തിക്കാനാണ് ആവശ്യപെട്ടത്.

കൊണ്ടോട്ടി തുറക്കലിലെ കെടിഡിസിയുടെ ഹോട്ടൽ ടാമറിൻഡിലാണ‌് രാത്രി ഒരുമണിക്കൂറോളം ചർച്ച നടത്തിയത‌്. ചർച്ചക്ക‌് ശേഷം ഇ ടി മുഹമ്മദ‌് ബഷീറും നസറുദ്ദീൻ എളമരവും പുറത്തേക്ക‌് പോകുന്ന വീഡിയോ ആണ‌് പുറത്തുവന്നത‌്. കൂടികാഴ്ചയോട‌് എതിർപ്പുള്ള ഒരു വിഭാഗം പ്രവർത്തകരാണ‌് വീഡിയോ പുറത്തുവിട്ടത‌്.

അതേസമയം ലീഗ് - എസ്ഡിപിഐ ഭാരവാഹികളുമായി ചര്‍ച്ച നടത്തിയെന്ന വാര്‍ത്ത ഇ ടി മുഹമ്മദ് ബഷീര്‍ നിഷേധിച്ചു. കെടിഡിസി ഹോട്ടലില്‍ വച്ച് തീര്‍ത്തും യാദൃശ്ചികമായി പോപ്പുലര്‍ ഫ്രണ്ട് നേതാക്കളെ കണ്ടുമുട്ടുക മാത്രമായിരുന്നു സംഭവിച്ചതെന്നും ബഷീര്‍ പറഞ്ഞു. എസ്ഡിപിഐയുമായി ചര്‍ച്ച ചെയ്യേണ്ട കാര്യം ലീഗിനില്ലെന്നും ബഷീര്‍ വ്യക്തമാക്കി.

മറ്റു വാർത്തകൾ

പ്രധാന വാർത്തകൾ
 Top