01 March Monday

കാത്തിരിക്കുന്നത് 1.12 ലക്ഷം കോടിയുടെ നിക്ഷേപം; മൂലധനച്ചെലവിനായി എൽഡിഎഫ്‌ നീക്കിവച്ചത്‌ 52,055.16 കോടി

വെബ് ഡെസ്‌ക്‌Updated: Monday Jan 25, 2021

തിരുവനന്തപുരം > അഞ്ചുവർഷത്തിൽ സംസ്ഥാനത്തിന്റെ മൂലധനച്ചെലവിൽ വൻ കുതിപ്പ്‌. 52,055.16 കോടി രൂപയാണ്‌ മൂലധനച്ചെലവിനായി എൽഡിഎഫ്‌ സർക്കാർ ബജറ്റുവഴി നീക്കിവച്ചത്‌. വലിയ പദ്ധതികൾ പ്രഖ്യാപിച്ചുവെന്ന് അവകാശപ്പെട്ട ഉമ്മൻചാണ്ടി സർക്കാരിന്റെ അഞ്ചുവർഷത്തിൽ വകയിരുത്തിയത്‌‌ 29,689.37 കോടിയും. 23,665.79 കോടി രൂപ‌ എൽഡിഎഫ്‌ സർക്കാർ അധികമായി വകയിരുത്തി‌.
ബജറ്റിനുപുറത്തുള്ള മൂലധന നിക്ഷേപവും ചേരുമ്പോൾ സമാനതകളില്ലാത്ത വികസന പ്രവർത്തനങ്ങൾക്കാണ്‌ അഞ്ചുവർഷം സാക്ഷ്യം വഹിച്ചത്‌. വൻകിട മൂലധന നിക്ഷേപവും മെച്ചപ്പെട്ട അടിസ്ഥാന സൗകര്യ വികസനവും ലക്ഷ്യമിട്ട്‌ 60,096.35 കോടി രൂപയുടെ പദ്ധതികളാണ്‌ കിഫ്‌ബി അനുമതിയിൽ മുന്നേറുന്നത്‌.

ഇവയും ചേരുമ്പോൾ 1,12,152 കോടി രൂപയുടെ വികസന പ്രവർത്തനങ്ങൾ‌  സർക്കാർ  രൂപംനൽകി  നടപ്പാക്കി. അഞ്ചുവർഷത്തിൽ 50,000 കോടിയുടെ വികസന പദ്ധതികളാണ്‌ സർക്കാർ പ്രഖ്യാപിച്ചത്‌. കിഫ്‌ബി അംഗീകരിച്ച 821 പദ്ധതിയിൽ അടിസ്ഥാന സൗകര്യ മേഖലയിലെ നിക്ഷേപം 40,096 കോടിയുടേതാണ്‌. ഭൂമി ഏറ്റെടുക്കലിന്‌ 20,000 കോടി രുപ മാറ്റിവച്ചതിലൂടെ വികസനപാതയിലെ ഏറ്റവും വലിയ തടസ്സം‌ നീക്കി‌. പൊതുമരാമത്ത്‌, വിദ്യാഭ്യാസം, ആരോഗ്യ–-കുടുംബക്ഷേമം, ജലസേചനം തുടങ്ങിയ പ്രധാന മേഖലകളിൽ  എല്ലാ നിയമസഭാ  മണ്ഡലത്തിനും പ്രാധാന്യം  ലഭിച്ചു.

അടിസ്ഥാന സൗകര്യ വികസന മുന്നേറ്റം കണ്ണഞ്ചിപ്പിക്കുന്നതാണ്‌. 44,705 ക്ലാസ്‌ മുറി ഹൈടെക്കായി. 292 കോടിയിൽ സ്‌കൂളുകൾക്ക്‌ അത്യാധുനിക ലാബുകളായി. മികവിന്റെ കേന്ദ്രങ്ങളാകുന്ന സ്‌കൂളുകളുടെ കെട്ടിട നിർമാണത്തിന്‌ 1642 കോടിയാണ്‌ നിക്ഷേപം. പൊതുആശുപത്രികൾക്കായുള്ള വകയിരുത്തൽ വിസ്‌മയിപ്പിക്കുന്നു. ഇതുവരെ ചെലവ്‌ 3122 കോടി. 673 കോടിയുടെ കൊച്ചി നഗര  പുനരുജ്ജീവനവും  സമഗ്ര ജലഗതാഗതവും, 5200 കോടിയുടെ  പുതിയ  ട്രാൻസ്‌ഗ്രിഡ്, 1062 കോടിയുടെ കെ–-ഫോൺ, 5374 കോടിയിൽ ദേശീതപാത വികസനത്തിന്‌  സ്ഥലമെടുപ്പ്‌, വ്യവസായ പാർക്കുകൾക്കും ഇടനാഴികൾക്കുമായി 15,000 കോടി, 1652 കോടിയിൽ തീരദേശ ഹൈവേ, 1720 കോടിയിൽ മലയോര ഹൈവേ തുടങ്ങിയ പദ്ധതികളെല്ലാം നടത്തിപ്പിന്റെ വിവിധഘട്ടങ്ങളിലാണ്‌.


ദേശാഭിമാനി വാർത്തകൾ ഇപ്പോള്‍ വാട്സാപ്പിലും ടെലഗ്രാമിലും ലഭ്യമാണ്‌.

വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
ടെലഗ്രാം ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..


----
പ്രധാന വാർത്തകൾ
-----
-----
 Top