22 September Tuesday

ദുരന്തത്തിന്‌ കാരണം ലാൻഡിങ്‌ തെറ്റിയത്‌; റൺവേയിലിറക്കിയത്‌ ശരിയായ രീതിയിലല്ല

ബഷീർ അമ്പാട്ട്‌Updated: Sunday Aug 9, 2020

കരിപ്പൂർ > ദുരന്തത്തിന്‌ കാരണം ലാൻഡിങ്‌ തെറ്റിയതാണെന്ന്‌ ഡയറക്ടർ ജനറൽ ഓഫ്‌ സിവിൽ എവിയേഷൻ (ഡിജിസിഎ). ശരിയായ രീതിയിലല്ല വിമാനം റൺവേയിലിറക്കിയത്‌. കനത്ത മഴയും മഞ്ഞും പൈലറ്റിന്റെ കാഴ്‌ചയെ ബാധിച്ചുവെന്നും ഡിജിസിഎയുടെ പ്രാഥമിക റിപ്പോർട്ടിലുണ്ട്‌. പൈലറ്റ് ദീപക്‌ വസന്ത്‌ സാഠെയുടെ ധീര ഇടപെടൽ അപകടത്തിന്റെ കാഠിന്യം കുറച്ചു.

പത്താം നമ്പർ റൺവേയിൽ വിമാനം ഇറക്കാനാണ്‌ എയർ ട്രാഫിക്‌ കൺട്രോൾ വിഭാഗം നിർദേശിച്ചത്‌. എന്നാൽ 13–-ാം നമ്പർ റൺവേയിലായിരുന്നു‌ ലാൻഡിങ്‌‌. ടച്ച്‌ ഡൗൺ സോണിൽ തൊടാതെയാണ്‌‌ വിമാനം ലാൻഡ്‌ ചെയ്‌തത്‌. റൺവേയിൽനിന്ന്‌ തെന്നിമാറി നിയന്ത്രണംവിട്ട്‌ താഴേക്ക്‌ പതിച്ചു.

പൈലറ്റിന്റെ ആദ്യ ലാൻഡിങ് ശ്രമംപാളിയെന്നും രണ്ടാംശ്രമത്തിലാണ്‌ അപകടമെന്നതും എയർ ഇന്ത്യയും ശരിവച്ചു. വിമാനത്തിൽനിന്ന്‌ പുക ഉയർന്നതായി കണ്ടെത്തി. രാത്രി സമയത്ത് നടന്ന അപകടമായതിനാൽ വേണ്ടത്ര നിരീക്ഷണം ഉണ്ടായില്ലെന്നും കണ്ടെത്തി. വിമാനത്തിന്റെ രണ്ട് ചക്രങ്ങൾക്കിടയിലുള്ള ഭാഗം പല തവണ നിലത്ത് തട്ടി. എൻജിനും ഇന്ധനടാങ്കുമായുള്ള ബന്ധം പൈലറ്റ്‌ വിച്ഛേദിച്ചതാണ്‌ തീപിടിത്തം ഒഴിവാകാൻ കാരണമെന്നും പറയുന്നു. എന്നാൽ, ശാസ്‌ത്രീയ അന്വേഷണത്തിലേ ഇക്കാര്യത്തിൽ വ്യക്തത വരൂ.


ദേശാഭിമാനി ഇപ്പോള്‍ ടെലഗ്രാമിലും ലഭ്യമാണ്‌. കൂടുതല്‍ വാര്‍ത്തകള്‍ക്കും അപ്ഡേറ്റുകള്‍ക്കുമായി ടെലഗ്രാം ചാനല്‍ സബ്സ്ക്രൈബ് ചെയ്യാം.


----
പ്രധാന വാർത്തകൾ
-----
-----
 Top