"ഉന്നതവിദ്യാഭ്യാസരംഗത്ത് എഐയുടെ ഭാവിസാധ്യതകൾ': അന്താരാഷ്ട്ര കോൺക്ലേവ് രണ്ടാം എഡിഷൻ തിരുവനന്തപുരത്ത്

തിരുവനന്തപുരം > നിർമിതബുദ്ധി ഉന്നതവിദ്യാഭ്യാസരംഗത്ത് തുറന്നിടുന്ന ഭാവിസാധ്യതകൾ ചർച്ചചെയ്യാനായി അന്താരാഷ്ട്ര കോൺക്ലേവിന്റെ രണ്ടാം എഡിഷൻ ഡിസംബർ 8, 9, 10 തീയതികളിൽ നടക്കുമെന്ന് ഉന്നതവിദ്യാഭ്യാസമന്ത്രി ഡോ. ആർ ബിന്ദു അറിയിച്ചു. തിരുവനന്തപുരത്ത് കനകക്കുന്ന് കൊട്ടാരത്തിലും അനുബന്ധ വേദികളിലുമായാണ് കോൺക്ലേവ് നടക്കുക. ഉന്നതവിദ്യാഭ്യാസ വകുപ്പിന്റെ നേതൃത്വത്തിൽ ഐഎച്ച്ആർഡിയാണ് അന്താരാഷ്ട്ര നിർമ്മിതബുദ്ധി കോൺക്ലേവ് - The International Conclave on Generative AI & the Future of Education 2.0 (ICGAIFE 2.0) ഒരുക്കുന്നത്.  

നിർമിതബുദ്ധിയും ഉന്നതവിദ്യാഭ്യാസ ഭാവിയും എന്ന വിഷയം ചർച്ചചെയ്യുന്ന കോൺക്ലേവിൽ ദേശീയ, അന്തർദേശീയ തലങ്ങളിൽ പ്രവർത്തിക്കുന്ന സാങ്കേതികവിദഗ്ദ്ധരും സർക്കാർ- സ്വകാര്യമേഖലകളിലെ ഉന്നതോദ്യോഗസ്ഥരും ഒത്തുചേരും. കഴിഞ്ഞ വർഷം കൊച്ചിയിലായിരുന്നു കോൺക്ലേവിന്റെ ആദ്യ പതിപ്പ്.

നിർമിതബുദ്ധിയുടെ ശക്തിയും വിവിധ മേഖലകളിൽ എങ്ങനെ പ്രയോജനപ്പെടുത്താമെന്നതും കോൺക്ലേവ് ചർച്ചചെയ്യും. വിവിധ വിഷയങ്ങളിൽ വിവിധ ഐഐടികൾ, ഐഐഎസ്സി, വിദേശ സർവകലാശാലകൾ അടക്കമുള്ള ലോകോത്തര വിദ്യാഭ്യാസ സ്ഥാപനങ്ങൾ, ബഹുരാഷ്ട്ര കമ്പനികൾ എന്നിവയിൽ നിന്നെല്ലാമുളള സാങ്കേതിക വിദഗ്ദ്ധർ എന്നിവരുടെ പ്രബന്ധങ്ങളും അവതരണങ്ങളും ഉണ്ടാകും. വിദ്യാഭ്യാസരംഗത്തും തൊഴിലിടങ്ങളിലും ആർട്ടിഫിഷ്യൽ ഇന്റലിജൻസ് ചെലുത്താവുന്ന സ്വാധീനം, തുറന്നുതരുന്ന തൊഴിൽ സാദ്ധ്യതകൾ എന്നിവയെല്ലാം വിശദമായ ചർച്ചയാവും. അന്താരാഷ്ട്ര ഏജൻസിയായ ഐഇഇഇ (IEEE)യുടെ ആഭിമുഖ്യത്തിലുള്ള വട്ടമേശ ചർച്ചകൾ, എഐ അന്താരാഷ്ട്ര കോൺഫറൻസ്, എഐ ഹാക്കത്തോൺ, വിദ്യാർത്ഥികൾക്കുള്ള എഐ ക്വിസുകൾ, എഐ റോബോട്ടിക് എക്സിബിഷനുകൾ എന്നിവയും നടക്കുമെന്ന് മന്ത്രി വാർത്താസമ്മേളനത്തിൽ പറഞ്ഞു.

നിർമിതബുദ്ധിയും നീതിന്യായ വ്യവസ്ഥിതിയും (AI and Judicial system), നിർമിതബുദ്ധിയും മാധ്യമങ്ങളും (AI and Media), നിർമിതബുദ്ധിയും നിയമനിർവ്വഹണവും (AI and Law Enforcement), നിർമിതബുദ്ധിയും യുവജന ശാക്തീകരണവും (AI and Youth Empowerment), നിർമിതബുദ്ധിയും ആരോഗ്യ പരിപാലനവും (AI and Health care), നിർമിതബുദ്ധിയും വിദ്യാഭ്യാസവും കേരള സാഹചര്യത്തിൽ (AI and Kerala Education), നിർമിതബുദ്ധിയും സിനിമയും (AI and Cinema) എന്നീ സെഷനുകൾ നടക്കും. സെഷനുകളിലേക്കുള്ള പ്രവേശനം സൗജന്യമായിരിക്കും. ഇതോടൊപ്പം തന്നെ വിവിധ വകുപ്പുകളും സ്ഥാപനങ്ങളും ഒരുക്കുന്ന എക്സിബിഷൻ സ്റ്റാളുകൾ, കല-സാംസ്‌കാരിക പരിപാടികൾ, ഫുഡ് കോർട്ട് എന്നിവയും കോൺക്ലേവിന്റെ ഭാഗമായുണ്ടാകും.