14 July Tuesday

എയർപോർട്ടുകളിൽ 8 ഇൻഫ്രാറെഡ് വാക്ക് ത്രൂ തെർമ്മൽ സ്‌‌കാനറുകൾ

വെബ് ഡെസ്‌ക്‌Updated: Thursday May 21, 2020

തിരുവനന്തപുരം > നാല് പ്രധാന എയർപോർട്ടുകളിലും ഒരു റെയിൽവേ സ്റ്റേഷനിലും ആർട്ടിഫിഷ്യൽ ഇന്റലിജൻസ് ഉപയോഗപ്പെടുത്തിയ 8 വാക്ക് ത്രൂ തെർമൽ സ്‌കാനറുകൾ കെഎംഎസ്‌സിഎൽ. മുഖാന്തരം വാങ്ങിയതായി ആരോഗ്യ വകുപ്പ് മന്ത്രി കെ കെ ശൈലജ അറിയിച്ചു. തിരുവനന്തപുരം വിമാനത്താവളം (അന്താരാഷ്ട്രം, ആഭ്യന്തരം) നെടുമ്പാശേരി വിമാനത്താവളം, കോഴിക്കോട് വിമാനത്താവളം (അന്താരാഷ്ട്രം, ആഭ്യന്തരം), കണ്ണൂർ വിമാനത്താവളം (അന്താരാഷ്ട്രം, ആഭ്യന്തരം), കോഴിക്കോട് റെയിൽവേ സ്റ്റേഷൻ എന്നിവിടങ്ങളിലാണ് വാക്ക് ത്രൂ തെർമൽ സ്‌കാനറുകൾ സ്ഥാപിക്കുന്നത്. കോവിഡ്-19 വ്യാപന കാലത്ത് തിരക്കേറിയ എയർപോർട്ട്, റെയിൽവേ സ്റ്റേഷൻ, മറ്റ് പ്രധാന ഓഫീസ് സമുച്ചയങ്ങൾ തുടങ്ങിയ സ്ഥലങ്ങളിൽ വരുന്ന ഓരോരുത്തരുടേയും ശരീര ഊഷ്മാവ് പ്രത്യേകം ടെസ്റ്റ് ചെയ്യുന്നതിന് സാങ്കേതികമായി ബുദ്ധിമുട്ടുണ്ട്. ഇത് പരിഹരിക്കാനാണ് നൂതന സാങ്കേതികവിദ്യയുള്ള തെർമ്മൽ സ്‌കാനറുകൾ സ്ഥാപിക്കുന്നതെന്നും മന്ത്രി വ്യക്തമാക്കി.

ആർട്ടിഫിഷ്യൽ ഇന്റലിജൻസ് ഉപയോഗപ്പെടുത്തി വാക്ക് ത്രൂ തെർമൽ സ്‌കാനറുകൾ ഉപയോഗിച്ച് ഒരു വഴിയിലൂടെ കടന്നുപോകുന്ന ഒന്നിൽ കൂടുതൽ ആളുകളുടെ ശരീര ഊഷ്മാവ് ഒരേ സമയം പരിശോധിക്കാനാകും. ഈ ഉപകരണത്തിന്റെ കപ്പാസിറ്റി അനുസരിച്ച് 3 മീറ്റർ ചുറ്റളവിൽ ഏകദേശം 10 ആൾക്കാരുടെ വരെ ശരീര ഊഷ്മാവ് വേർതിരിച്ച് കാണുവാൻ സാധിക്കും. കൂടാതെ ഓരോരുത്തരുടേയും മുഖം പ്രത്യേകം ക്യാമറയിൽ ചിത്രീകരിക്കാനും കഴിയും. ആളുകളുടെ ശരീരത്തിൽ സ്പർശിക്കാതെ ശരീര ഊഷ്മാവ് കണ്ടെത്തുന്നതിന് ഇൻഫ്രാറെഡ് ക്യാമറയാണ് ഉപയോഗിക്കുന്നത്. ആളുകൾ ഏകദേശം 3.2 മീറ്റർ ദൂരത്ത് എത്തുമ്പോൾ തന്നെ ശരീര ഊഷ്മാവും മുഖചിത്രവും ലഭ്യമാകും. തുടർന്ന് താപവ്യതിയാനമുള്ള ഓരോ ആളിനേയും നിമിഷങ്ങൾക്കുള്ളിൽ തിരിച്ചറിയാനും തുടർന്ന് മറ്റ് പരിശോധനകൾക്ക് മാറ്റുവാനും സാധിക്കുന്നു.

ഈ മെഷീനോടൊപ്പം ലഭ്യമായ ആർട്ടിഫിഷ്യൽ ഇന്റലിജൻസ് സോഫ്റ്റ് വെയർ ശരീര ഊഷ്മാവ് സാധാരണ നിലയിലുള്ളവരുടേയും വ്യതിയാനമുള്ളവരുടേയും ചിത്രം തനിയെ പകർത്തുന്നു. കൂടാതെ ഈ ഉപകരണത്തിലൂടെ കടന്നുപോകുന്ന ആളുകളുടെ എണ്ണവും തനിയെ കണക്കാക്കപ്പെടുകയും ചെയ്യും. മറ്റ് താപനില കൂടിയ ഉപകരണങ്ങളെ തിരിച്ചറിയുകയും അവയെ ആളുകളുടെ എണ്ണത്തിൽ നിന്നും ഒഴിവാക്കുകയും ചെയ്യുന്നു. താപനില കൂടിയ ആൾക്കാരെ കണ്ടുപിടിച്ചാലുടൻ ഉപകരണം ശബ്ദ മുന്നറിയിപ്പും നൽകും. ആളുകൾ കൂടുതലായി വന്നുപോകുന്ന ഏത് സ്ഥലത്തും ഓരോരുത്തരുടേയും ശരീര ഊഷ്മാവ് പ്രത്യേകം കണ്ടെത്തുന്നതിന് ഈ തെർമൽ സ്‌കാനർ ഉപയോഗിക്കാൻ സാധിക്കുന്നതാണ്.  

മറ്റു വാർത്തകൾ

പ്രധാന വാർത്തകൾ
 Top