17 September Tuesday

ഐഎഎസുകാര്‍ ദൈവമല്ല, മനുഷ്യര്‍ തന്നെയാണ്; ശ്രീറാം വെങ്കിട്ടരാമനെതിരെ നടപടിയുണ്ടാവും: ജി സുധാകരൻ

വെബ് ഡെസ്‌ക്‌Updated: Sunday Aug 4, 2019

ആലപ്പുഴ > സര്‍വ്വേ ഡയറക്ടര്‍ ശ്രീറാം വെങ്കിട്ടരാമന്‍ മദ്യപിച്ച് വാഹനമോടിച്ച് മാധ്യമ പ്രവർത്തകൻ കെ എം ബഷീർ മരിച്ച സംഭവത്തില്‍ ഐഎഎസ്, ഐപിഎസ് ഉദ്യോഗസ്ഥര്‍ക്കെതിരെ വിമര്‍ശനവുമായി മന്ത്രി ജി സുധാകരന്‍. ശ്രീറാം വെങ്കിട്ടരാമനെ പോലുള്ളവര്‍ സംസ്ഥാനത്ത് ഇനിയുമുണ്ടെന്ന് ജി സുധാകരന്‍ പറഞ്ഞു.

അവര്‍ അര്‍ധരാത്രി മദ്യപിച്ച് വാഹനം ഓടിക്കുന്ന മണ്ടന്മാരാണ്. ഐ.എ.എസുകാര്‍ ദൈവമല്ല, അവര്‍ മനുഷ്യര്‍ തന്നെയാണ്. താനിത് നേരത്തെ പറഞ്ഞതാണെന്നും അദ്ദേഹം പറഞ്ഞു. ആലപ്പുഴയില്‍ മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം. ഐഎഎസ് ഒരു മത്സരപ്പരീക്ഷ മാത്രമാണ്. ശ്രീറാം വെങ്കിട്ടരാമനെതിരെ നടപടിയുണ്ടാവുമെന്നും മന്ത്രി പറഞ്ഞു.

ഇന്നലെ പുലര്‍ച്ചെയായിരുന്ന ശ്രീറാം വെങ്കിട്ടരാമന്‍ മദ്യലഹരിയില്‍ വാഹനമോടിച്ച് അപകടമുണ്ടാക്കിയത്. ശ്രീറാമിന്റെ കാറിടിച്ച് സിറാജ് ബ്യൂറോ ചീഫായിരുന്ന ബഷീര്‍ കൊല്ലപ്പെട്ടിരുന്നു. കേസില്‍ ജാമ്യമില്ലാ വകുപ്പുകളാണ് ശ്രീറാമിനെതിരെ ചുമത്തിയിരിക്കുന്നത്. 14 ദിവസത്തേക്ക് റിമാന്‍ഡ് ചെയ്യപ്പെട്ട ശ്രീറാമിപ്പോള്‍ തിരുവനന്തപുരം മെഡിക്കൽ കോളേജ്‌ ആശുപത്രിയില്‍ ചികിത്സയില്‍ കഴിയുകയാണ്.


പ്രധാന വാർത്തകൾ
 Top