12 December Thursday
സ്ത്രീകള്‍ക്ക് കടബാധ്യത കൂടുന്നു

കേരളത്തില്‍ ഗ്രാമീണമേഖലയിലെ മുഖ്യ വായ്പാസ്രോതസ് സഹകരണസ്ഥാപനങ്ങളും കുടുംബശ്രീയുമെന്നു പഠനം

വെബ് ഡെസ്‌ക്‌Updated: Wednesday Nov 13, 2019

കൊച്ചി> സംസ്ഥാനത്തെ ഗ്രാമീണമേഖലയിലെ ദരിദ്ര കുടുംബങ്ങൾ വായ്പാവശ്യങ്ങൾക്കായി ഏറ്റവും പ്രധാനമായി ആശ്രയിക്കുന്ന വായ്പാസ്രോതസ്സുകൾ സഹകരണസ്ഥാപനങ്ങളും കുടുംബശ്രീയുമാണെന്ന് പഠനം. കടബാധിതരായിട്ടുള്ള കുടുംബങ്ങളിൽ പകുതിയോളവും പ്രാഥമിക വായ്പാസഹകരണസംഘങ്ങളിൽ നിന്ന് കടമെടുത്തിട്ടുള്ളവരാണ്. ഏകദേശം ഇത്രയും കുടുംബങ്ങൾ തന്നെ കുടുംബശ്രീ ത്രിഫ്‌റ്റ് വായ്പകളുമെടുത്തിട്ടുണ്ട്. മൂന്നിലൊന്ന് കുടുംബങ്ങൾ കുടുംബശ്രീ ലിങ്കേജ് വായ്പ എടുത്തിട്ടുള്ളവരുമാണെന്ന് കൊച്ചിയിലെ സെന്റർ ഫോർ സോഷ്യോ-എക്കണോമിക്ക് ആന്റ് എൻവയണ്മെന്റ് സ്റ്റഡീസ് നടത്തിയ പഠനത്തിൽ പഠനം വ്യക്തമാക്കുന്നു.

ഗ്രാമീണമേഖലയിലെ സാമ്പത്തികമായി പിന്നോക്കം നിൽക്കുന്നവരുടെ ജീവിതത്തിൽ സഹകരണസ്ഥാപനങ്ങൾ വഹിക്കുന്ന പങ്ക് കണക്കിലെടുത്ത്, ബാങ്കിംഗ് മേഖലയിൽ മാത്രം ഒതുങ്ങാതെ അവയെ പ്രാദേശിക സമ്പദ്ഘടന വികസിപ്പിക്കാനുള്ള ഇടപെടലുകൾ നടത്താനായി പ്രോത്സാഹിപ്പിക്കാമെന്നു പഠനം നിര്‍ദേശിയ്ക്കുന്നു.
ഗ്രാമീണദരിദ്രർക്കിടയിൽ കുടുംബശ്രീ അല്ലാത്ത മറ്റ് സ്വയംസഹായ സഹകരണസംഘങ്ങളിൽ നിന്നുള്ള വായ്പകൾക്ക് വലിയ പ്രാധാന്യമില്ല. ബാങ്കിംഗേതര ഫിനാൻഷ്യൽ കമ്പനികൾക്കും സംഘവായ്പകൾ വിതരണം ചെയ്യുന്ന സ്വകാര്യ മൈക്രോഫിനാൻസ് കമ്പനികൾക്കും പഠനവിധേയമാക്കിയ വിഭാഗങ്ങൾക്കിടയിൽ വാണിജ്യബാങ്കുകളെക്കാൾ വേരോട്ടമുണ്ടെന്നും പഠനം കണ്ടെത്തി.

കുടുംബശ്രീക്ക് ഗ്രാമീണമേഖലയിലെ ദരിദ്ര കുടുംബങ്ങൾക്കിടയിലുള്ള സ്വീകാര്യത കണക്കിലെടുത്ത്, കുടുംബശ്രീയുടെ സംരംഭകത്വ വശത്തിന് കൂടുതൽ പ്രാധാന്യം നൽകുക എന്നത് മുൻഗണനാടിസ്ഥാനത്തിൽ തന്നെ ഏറ്റെടുക്കണം -പഠനം നിര്‍ദേശിയ്ക്കുന്നു.

23 ശതമാനം കുടുംബങ്ങൾ ബാങ്കിംഗേതര ഫിനാൻഷ്യൽ കമ്പനികളെയും 25 ശതമാനം കുടുംബങ്ങൾ സ്വകാര്യ മൈക്രോഫിനാൻസ് കമ്പനികളെയും ആശ്രയിക്കുമ്പോൾ, 15 ശതമാനം മാത്രമാണ് പൊതുമേഖലാ ബാങ്കുകളെയും 8 ശതമാനം മാത്രമാണ് സ്വകാര്യ ബാങ്കുകളെയും ആശ്രയിക്കുന്നത്. പഠനവിധേയമാക്കിയ കുടുംബങ്ങളിൽ അഞ്ചിലൊന്ന് ഉയർന്ന പലിശനിരക്കിൽ പലിശക്കാരിൽ നിന്നും 29 ശതമാനം ബന്ധുക്കൾ അല്ലെങ്കിൽ സുഹൃത്തുക്കളിൽ നിന്നും കടം വാങ്ങിയിട്ടുണ്ട്. ചിട്ടികൾ, കെ.എസ്.എഫ്.ഇ., ഗ്രാമീണബാങ്കുകൾ (RRBs) എന്നിവയാണ് ഈ വിഭാഗം വായ്പയ്ക്കായി ആശ്രയിക്കുന്ന മറ്റു സ്രോതസ്സുകൾ.

പഠനവിധേയമാക്കിയ കുടുംബങ്ങളിൽ പത്തിൽ ആറും നിലവിൽ ഒരു സ്വർണവായ്പ എങ്കിലുമുള്ളവരാണ്. സംഘവായ്പകൾക്ക് ഈ വിഭാഗത്തിനിടയിലുള്ള, പ്രത്യേകിച്ച് സ്ത്രീകൾക്കിടയിൽ, സ്വാധീനത്തെയും പഠനം വ്യക്തമാക്കുന്നു . കുടുംബശ്രീ, സ്വകാര്യ മൈക്രോഫിനാൻസ് കമ്പനികൾ, സ്വയം സഹായസഹകരണസംഘങ്ങൾ, എൻ.ജി.ഒകൾ, ജാതി/മത സംഘടനകൾ എന്നിവയൊക്കെ കേരളത്തിൽ സംഘവായ്പകൾ നൽകുന്നുണ്ട്.

 ഗ്രാമീണമേഖലയിലെ ദരിദ്ര കുടുംബങ്ങളിൽ മൂന്നിലൊന്നും അമിതകടബാധ്യത അനുഭവിക്കുന്നവരാണെന്നും പഠനം പറയുന്നു. ഇവർ ഓരോ മാസവും വായ്പാതിരിച്ചടവിനായി വിനിയോഗിക്കേണ്ട തുക ഇവരുടെ മാസവരുമാനത്തെക്കാൾ കൂടുതലാണ്. മറ്റൊരു നാലിലൊന്ന് കുടുംബങ്ങൾ അവരുടെ മാസവരുമാനത്തിന്റെ പകുതി വായ്പാതിരിച്ചടവിനായി ഉപയോഗിക്കേണ്ടി വരുന്നു.

ഡോ. രാഖി തിമോത്തി, അശ്വതി റിബേക്ക അശോക്, സ്വാതി മോഹനൻ, ബിബിൻ തമ്പി, റംഷാദ് എം. എന്നിവർ വിശദമായ ഫീൽഡ് ഗവേഷണത്തിന്റെ അടിസ്ഥാനത്തിൽ നടത്തിയ പഠനത്തിൽ കുടുംബ സർവേ, ഫോക്കസ് ഗ്രൂപ്പ് ചർച്ചകൾ, കേസ് സ്റ്റഡികൾ എന്നി മാർഗങ്ങൾ അവലംബിച്ചിട്ടുണ്ട്. കേരളത്തിലങ്ങോളമിങ്ങോളമുള്ള പഞ്ചായത്തുകളിലെ ദരിദ്ര കുടുംബങ്ങളിൽ നിന്ന് സിസ്റ്റമാറ്റിക്ക് റാൻഡം സാമ്പ്ലിങ്ങ് രീതി ഉപയോഗിച്ച് തെരഞ്ഞെടുത്ത 540 കുടുംബങ്ങൾക്കിടയിലാണ് സർവേ നടത്തിയത്.
ഗ്രാമീണമേഖലയിലെ ദരിദ്ര കുടുംബങ്ങളിൽ 88 ശതമാനവും കടബാധിതരാണെന്നും പഠനം പറയുന്നു. അതായത് നിലവിൽ വായ്പകളൊന്നുമില്ലാത്ത 12 ശതമാനം ദരിദ്ര കുടുംബങ്ങളെ കേരളത്തിലെ ഗ്രാമപ്രദേശങ്ങളിലുള്ളൂ.

സ്വർണവായ്പയ്ക്ക് ഈ വിഭാഗം ജനങ്ങളുടെ ജീവിതത്തിലുള്ള പ്രാധാന്യത്തെയും പഠനം ചൂണ്ടിക്കാണിക്കുന്നു. പഠനവിധേയമാക്കിയ കുടുംബങ്ങളിൽ പത്തിൽ ആറും നിലവിൽ ഒരു സ്വർണവായ്പ എങ്കിലുമുള്ളവരാണ്. സംഘവായ്പകൾക്ക് ഈ വിഭാഗത്തിനിടയിലുള്ള, പ്രത്യേകിച്ച് സ്ത്രീകൾക്കിടയിൽ, സ്വാധീനത്തെയും പഠനം തുറന്നുകാണിക്കുന്നു. കുടുംബശ്രീ, സ്വകാര്യ മൈക്രോഫിനാൻസ് കമ്പനികൾ, സ്വയം സഹായസഹകരണസംഘങ്ങൾ, എൻ.ജി.ഒകൾ, ജാതി/മത സംഘടനകൾ എന്നിവയൊക്കെ കേരളത്തിൽ സംഘവായ്പകൾ നൽകുന്നുണ്ട്.

വീട് പണി, വീട് നവീകരണം, ആരോഗ്യാവശ്യങ്ങൾ, മറ്റു കടങ്ങൾ വീട്ടൽ തുടങ്ങിയവയ്ക്കായാണ് പ്രധാനമായും ഗ്രാമീണമേഖലയിലെ സാമ്പത്തികമായി പിന്നോക്കം നിൽക്കുന്ന കുടുംബങ്ങൾ വായ്പാത്തുക ഉപയോഗിക്കുന്നത്. കടബാധിതരിൽ നാലിലൊന്നിലധികം കുടുംബങ്ങൾ വായ്പാത്തുക മറ്റു കടങ്ങൾ തിരിച്ചടയ്ക്കാൻ ഉപയോഗിച്ചിട്ടുണ്ട് എന്നത് ആശങ്കാജനകമാണെന്ന്പ ഠനം പറയുന്നു.. ഇത്തരം കുടുംബങ്ങൾ കടക്കെണിയിലേക്ക് തള്ളിവീഴപ്പെടാനുള്ള സാധ്യത കൂടുതലാണ്. കൃഷി, വ്യവസായം തുടങ്ങി ഉല്പാദനക്ഷമമായ ആവശ്യങ്ങൾക്കായി വായ്പാത്തുക ചെലവഴിച്ച കുടുംബങ്ങളുടെ എണ്ണം താരതമ്യേന കുറവും, ഉപഭോഗാവശ്യങ്ങൾക്കായി വായ്പാത്തുക ചെലവഴിച്ച കുടുംബങ്ങളുടെ എണ്ണം താരതമ്യേന കൂടുതലുമാണ്.

കുടുംബശ്രീ  ത്രിഫ്‌റ്റ് വായ്പകളുടെ കുറഞ്ഞ തിരിച്ചടവ് നിരക്കും, മുൻവായ്പകൾ തിരിച്ചടയ്ക്കാൻ കുടുംബശ്രീ വായ്പകളെ ഉപയോഗിക്കുന്ന രീതിയും ദീർഘകാലാടിസ്ഥാനത്തിൽ അയൽക്കൂട്ടങ്ങളുടെ സാമ്പത്തിക നിലനിൽപ്പിനെത്തന്നെ ദോഷകരമായി ബാധിക്കുവാനിടയുണ്ടെന്നും പഠനം ചൂണ്ടിക്കാട്ടുന്നു. സ്ത്രീകൾക്കിടയിൽ സംരംഭകത്വം പ്രോത്സാഹിപ്പിക്കുക എന്നതാണ് കുടുംബശ്രീയുടെ ഒരു പ്രധാന ലക്ഷ്യമെങ്കിലും സർവേ നടത്തിയ കുടുംബങ്ങളിലെ കുടുംബശ്രീ അംഗങ്ങളായിട്ടുള്ള സ്ത്രീകളിൽ 12 ശതമാാനം മാത്രമേ തങ്ങളുടെ കുടുംബശ്രീ അയൽക്കൂട്ടം ഉല്പാദനക്ഷമമായ എന്തെങ്കിലും പ്രവർത്തനങ്ങളിൽ ഏർപ്പെടുന്നു എന്ന് റിപ്പോർട്ട് ചെയ്തിട്ടുള്ളൂ.

ഗ്രാമീണമേഖലയിലെ ദരിദ്ര കുടുംബങ്ങളിലെ സ്ത്രീകൾ സ്വകാര്യ മൈക്രോഫിനാൻസ് കമ്പനികളെ വായ്പാവശ്യങ്ങൾക്കായി ആശ്രയിക്കുന്നതായി പഠനം നിരീക്ഷിക്കുന്നു. ഇത്തരം കമ്പനികളിൽ നിന്ന് കടം വാങ്ങുന്ന പാവപ്പെട്ട സ്ത്രീകളുടെ അറിവില്ലായ്മയുടെയും പണത്തിനായുള്ള അവരുടെ അടിയന്തിരാവശ്യങ്ങളുടെയും പശ്ചാത്തലത്തിൽ, ഈ സ്ഥാപനങ്ങളുടെ പ്രവർത്തനങ്ങൾ നിയന്ത്രിക്കേണ്ടതിന്റെ ആവശ്യകതയെ പഠനം ചൂണ്ടിക്കാണിക്കുന്നു.

എല്ലാ പഞ്ചായത്തുകളിലും കടക്കെണിയിലകപ്പെട്ടിരിക്കുന്ന കുടുംബങ്ങളെ കണ്ടെത്തി അവരെ രക്ഷിക്കാനായി പ്രത്യേക പാക്കേജുകൾക്ക് രൂപം നൽകാവുന്നതാണെന്നും നിര്‍ദേശമുണ്ട് . കുടുംബങ്ങളുടെ കടബാധ്യതയും, വരുമാനവും, സ്വത്തുക്കളും ഒക്കെ കണക്കിലെടുത്തുകൊണ്ട് കുടുംബങ്ങളുടെ കടബാധ്യത കണക്കാക്കുന്നതിനുള്ള ഒരു മാനദണ്ഡം വികസിപ്പിക്കണമെന്ന് പഠനം നിർദേശിക്കുന്നു.

കേരളത്തിന്റെ ഗ്രാമീണമേഖലയിലെ സാമ്പത്തികമായി പിന്നോക്കം നിൽക്കുന്ന കുടുംബങ്ങളിൽ സ്ത്രീകളുടെ പേരിൽ പുരുഷന്മാരുടെ പേരിലുള്ളതിനേക്കാൾ 2.5 ഇരട്ടി വായ്പകൾ ഉണ്ടെന്ന് പഠനം പറയുന്നു. കുടുംബശ്രീ, സ്വകാര്യ മൈക്രോഫിനാൻസ് കമ്പനികൾ തുടങ്ങിയവയുടെ സംഘവായ്പകൾ സ്ത്രീകൾക്ക് മാത്രമേ ലഭ്യമാകുന്നുള്ളൂ എന്നതുകൊണ്ടാകാം ഇത്ര വലിയൊരു വ്യത്യാസം നിലനിൽക്കുന്നത്. പക്ഷേ സ്ത്രീകൾക്ക് മാത്രമായി ലഭ്യമാകുന്ന ഇത്തരം വായ്പകൾ പോലും എങ്ങനെ വിനിയോഗിക്കണമെന്ന് തീരുമാനിക്കുന്നതിൽ സ്ത്രീകൾക്ക് കുറഞ്ഞ അധികാരം മാത്രമേയുള്ളൂവെന്നത് ആശങ്കാജനകമായ കാര്യമാണ് -പഠനം പറയുന്നു. 


പ്രധാന വാർത്തകൾ
 Top