19 October Saturday
പതിനായിരം പേർക്ക് നേരിട്ട് ജോലി ലഭിക്കും

വ്യവസായ ഇടനാഴി: നടപടികള്‍ വേഗത്തിലാക്കാന്‍ മുഖ്യമന്ത്രിയുടെ നിര്‍ദേശം

സ്വന്തം ലേഖകൻUpdated: Sunday Sep 22, 2019


ചെന്നൈ-–-ബംഗളൂരു വ്യവസായ ഇടനാഴി കോയമ്പത്തൂർ വഴി കൊച്ചിയിലേക്ക് നീട്ടാനുള്ള തുടർനടപടി വേഗത്തിലാക്കാൻ മുഖ്യമന്ത്രി പിണറായി വിജയൻ ബന്ധപ്പെട്ട വകുപ്പുകളോടും ഏജൻസികളോടും നിർദേശിച്ചു. കേരളത്തിന്റെ നിർദേശം കേന്ദ്രസർക്കാർ അംഗീകരിച്ച സാഹചര്യത്തിൽ ഇക്കാര്യം ചർച്ചചെയ്യാൻ മുഖ്യമന്ത്രിയുടെ അധ്യക്ഷതയിൽ ഉന്നതതല യോഗം ചേർന്നു.

വ്യവസായ ഇടനാഴിയുടെ ഭാഗമായ നിർമാണ ക്ലസ്റ്ററിനായി തൃശൂർ-–-പാലക്കാട് മേഖലയിൽ 1860 ഏക്കറാണ് ഏറ്റെടുക്കുന്നത്. ഇത്‌ വേഗത്തിലാക്കാൻ പാലക്കാട്, തൃശൂർ കലക്ടർമാരോട്‌ മുഖ്യമന്ത്രി നിർദേശിച്ചു. 2000 മുതൽ 5000 ഏക്കർവരെ വേണമെന്നാണ്‌ ദേശീയ വികസന ഇടനാഴി വികസന ട്രസ്റ്റിന്റെ (നിക്ഡിറ്റ്) നിബന്ധന. കേരളത്തിൽ ഭൂമി ലഭിക്കാനുള്ള പ്രയാസം ബോധ്യപ്പെടുത്തിയപ്പോൾ 1800 ഏക്കറായി കുറച്ചു. ഭൂമി പാലക്കാട്, കണ്ണമ്പ്ര, ഉഴലപ്പതി, പുതുശ്ശേരി എന്നിവിടങ്ങളിലായി സർക്കാർ കണ്ടെത്തിയിട്ടുണ്ട്. ഇതിൽ ഒരു ഭാഗം കിൻഫ്രയുടെ കൈവശമാണ്. ബാക്കി ഏറ്റെടുക്കാൻ നോട്ടീസ് നൽകി.

കൊച്ചി മേഖലയിലും വ്യവസായ കേന്ദ്രങ്ങൾക്ക്‌   അനുയോജ്യമായ ഭൂമി കണ്ടെത്തും. കോറിഡോർതല അതോറിറ്റി രൂപീകരണം, നിക്ഡിറ്റുമായി ഓഹരി കരാർ ഒപ്പിടൽ തുടങ്ങിയ നടപടികളും വേഗത്തിലാക്കും.

യോഗത്തിൽ ചീഫ് സെക്രട്ടറി ടോം ജോസ്, വ്യവസായ പ്രിൻസിപ്പൽ സെക്രട്ടറി ഡോ. കെ ഇളങ്കോവൻ, റവന്യൂ പ്രിൻസിപ്പൽ സെക്രട്ടറി ഡോ. വി വേണു, കെഎസ്ഐഡിസി എംഡി സഞ്ജയ് കൗൾ തുടങ്ങിയവർ പങ്കെടുത്തു.

കൊച്ചി–--സേലം ദേശീയപാതയുടെ ഇരുവശവുമായി 100 കിലോമീറ്റർ ദൈർഘ്യത്തിലാണ്‌  കേരളത്തിന്റെ സംയോജിത നിർമാണ ക്ലസ്റ്റർ വരുന്നത്. പതിനായിരം പേർക്ക് നേരിട്ട് ജോലി ലഭിക്കും. സ്വകാര്യമേഖലയിൽനിന്ന് പതിനായിരം കോടി രൂപയുടെ നിക്ഷേപമാണ് പ്രതീക്ഷിക്കുന്നത്.

 

മറ്റു വാർത്തകൾ

പ്രധാന വാർത്തകൾ
 Top