18 September Saturday

കള്ളപ്പണം: തങ്ങളെ ചോദ്യം ചെയ്‌തതല്ല, ഇ ഡി വ്യക്തത തേടിയതാണെന്ന് കുഞ്ഞാലിക്കുട്ടി

വെബ് ഡെസ്‌ക്‌Updated: Wednesday Aug 4, 2021

തിരുവനന്തപുരം >കള്ളപ്പണക്കേസില്‍ എന്‍ഫോഴ്‌സ്‌മെന്റ് ഡയറക്ടേറ്റ് പാണക്കാട്ടെത്തിയത് സ്ഥിരീകരിച്ച് പി കെ കുഞ്ഞാലിക്കുട്ടി എംഎല്‍എ. എന്നാല്‍ ഹൈദരലി ശിഹാബ് തങ്ങളെ ഇ ഡി ചോദ്യം ചെയ്തിട്ടില്ലെന്നും ചില കാര്യങ്ങളില്‍ വ്യക്തത തേടുകയായിരുന്നുവെന്നും കുഞ്ഞാലിക്കുട്ടി ന്യായീകരിച്ചു. മുസ്ലീം ലീഗ് നേതാക്കളുടെ സാമ്പത്തിക ക്രമക്കേടുകള്‍ ഡോ.കെ ടി ജലീല്‍ വാര്‍ത്താസമ്മേളനത്തില്‍ വെളിപ്പെടുത്തിയതിനുപിന്നാലെയായിരുന്നു കുഞ്ഞാലിക്കുട്ടിയുടെ പ്രതികരണം.

ലീഗ് മുഖപത്രമായ ചന്ദ്രികയില്‍ 10 കോടി രൂപ നിക്ഷേപിച്ച കേസില്‍ ശിഹാബ് തങ്ങളെ ഇഡി ചോദ്യം ചെയ്തുവെന്ന് ജലീല്‍ വാര്‍ത്താസമ്മേളനത്തില്‍ പറഞ്ഞിരുന്നു. ഹാജരാകാതിരുന്നതിനാല്‍ ഇഡി പാണക്കാട്ടെത്തി ചോദ്യം ചെയ്യുകയായിരുന്നു. ഇഡി നല്‍കിയ നോട്ടീസും ജലീല്‍ വാര്‍ത്താ സമ്മേളനത്തില്‍ പുറത്തുവിട്ടു.

ഇതിനുപിന്നാലെയാണ് പ്രതിപക്ഷ നേതാവ് വി ഡി സതീശനൊപ്പം കുഞ്ഞാലിക്കുട്ടി വാര്‍ത്താസമ്മേളനം നടത്തിയത്. ചന്ദ്രികയില്‍ വന്ന പണത്തിന് പാലാരിവട്ടം അഴിമതിയുമായി ബന്ധമുണ്ടോയെന്ന് അന്വേഷിച്ചുവെന്ന് കുഞ്ഞാലിക്കുട്ടി പറഞ്ഞു. എല്ലാ ഇടപാടുകളും നടത്തിയത് ബാങ്ക് മുഖേന നിയമപരമായാണ്. നിക്ഷിപ്ത താല്‍പര്യക്കാര്‍ വിഷയത്തെ വൈകാരികമാക്കി വലുതാക്കുകയാണെന്നും കുഞ്ഞാലിക്കുട്ടി പറഞ്ഞു.


ദേശാഭിമാനി വാർത്തകൾ ഇപ്പോള്‍ വാട്സാപ്പിലും ടെലഗ്രാമിലും ലഭ്യമാണ്‌.

വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
ടെലഗ്രാം ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..



മറ്റു വാർത്തകൾ

----
പ്രധാന വാർത്തകൾ
-----
-----
 Top