29 May Sunday

നടിയെ ആക്രമിച്ച കേസ്‌: ദിലീപിനെതിരെ ഗുരുതര ആരോപണങ്ങളുമായി പൾസർ സുനിയുടെ കത്ത്‌

വെബ് ഡെസ്‌ക്‌Updated: Thursday Jan 6, 2022

കൊച്ചി > നടിയെ ആക്രമിച്ച സംഭവത്തിൽ നടൻ ദിലീപിനെതിരെ കൂടുതൽ ആരോപണങ്ങളുമായി കേസിലെ ഒന്നാം പ്രതി പൾസർ സുനിയുടെ കത്ത്‌ പുറത്ത്‌. 2018 ൽ പൾസർ സുനി അമ്മയെ ഏൽപ്പിച്ച കത്താണ്‌ ഇപ്പോൾ പുറത്തുവന്നിരിക്കുന്നത്‌. തനിക്ക് എന്തെങ്കിലും സംഭവിച്ചാല്‍ പുറത്തുവിടണമെന്ന് പറഞ്ഞ്‌ സുനി ഏൽപ്പിച്ചതാണ്‌ കത്തെന്ന്‌ സുനിയുടെ അമ്മ പറഞ്ഞു.

ദിലീപിനെ അഭിസംബോധന ചെയ്‌ത്‌ എഴുതിയിരിക്കുന്ന കത്തിൽ ഗുരുതര ആരോപണങ്ങളാണ്‌ സുനിൽകുമാർ ഉന്നയിക്കുന്നത്‌. നടൻ ദിലീപ്‌ ഉൾപ്പെടെ അമ്മയിൽ അംഗങ്ങളായ പല പ്രമുഖർക്കും സെക്‌സ്‌ റാക്കറ്റുമായി ബന്ധമുള്ളതായി സുനി കത്തിൽ ആരോപിക്കുന്നു.  വിദേശത്ത്‌ പരിപാടി അവതരിപ്പിക്കാൻ പോകുന്നത്‌ എന്തിനാണെന്നും പരിപാടിയുടെ ലാഭം എത്ര പേർക്ക്‌ വീതിച്ചു നൽകുന്നുണ്ടെന്ന്‌ അറിയാമെന്നും സുനി കത്തിൽ പറയുന്നുണ്ട്‌.

കേസില്‍ തന്നെ കുടുക്കിയാല്‍ അറിയാവുന്ന എല്ലാകാര്യങ്ങളും പുറത്ത് പറയുമെന്നും പ്രതികളെയും സാക്ഷികളെയും വിലയ്‌ക്കെടുത്ത് സത്യം മറച്ചുവെക്കാമെന്ന് കരുതേണ്ടെന്നും കത്തില്‍ പറയുന്നു. ദിലീപ്‌ പറഞ്ഞിട്ടാണ്‌ സുനി നടിയെ ആക്രമിച്ചതെന്നും നടിയോട്‌ സുനിക്ക്‌ യാതൊരു വൈരാഗ്യവുമുണ്ടായിരുന്നില്ലെന്നും പൾസർ സുനിയുടെ അമ്മ സ്വകാര്യ വാർത്താ ചാനലിനോട്‌ പറഞ്ഞു.

കത്തിലെ പ്രധാന ഭാഗങ്ങൾ

‘അമ്മ എന്ന സംഘടന ചേട്ടൻ എന്ത്‌ ചെയ്‌താലും കൂട്ട്‌ നിൽക്കുമെന്നറിയാം. അബാദ്‌ പ്ലാസയിൽ വച്ച്‌ ഈ കാര്യം പ്ലാൻ ചെയ്‌തപ്പോൾ സിദ്ധിയും മറ്റ്‌ ആരെല്ലാം ഉണ്ടായിരുന്നു എന്നെല്ലാം താൻ ആരോടും പറഞ്ഞില്ല. അമ്മയുടെ പ്രസിഡന്റ് സ്ഥാനം കിട്ടാന്‍ വേണ്ടിയാണോ ചേട്ടന്‍ അറസ്റ്റിലായപ്പോള്‍ സിദ്ദീഖ് ഓടി നടന്നത്. ഈ വിഷയവുമായി ബന്ധപ്പെട്ട് അമ്മയിലെ പലര്‍ക്കും ഒന്നും അറിയാത്തത് ചേട്ടന്‍ അവരുടെ കണ്ണില്‍ പൊടിയിട്ടതുകൊണ്ടല്ലെ’ ‐ സുനി ചോദിക്കുന്നു.

‘അമ്മയില്‍ ചേട്ടന്‍ ഉള്‍പ്പെടെ എത്രപേര്‍ക്ക് സെക്‌സ് റാക്കറ്റുമായി ബന്ധമുണ്ടെന്നും ചേട്ടന്‍ പുറത്തുപോയി പരിപാടി ചെയ്യുന്നത് എന്തിനാണെന്നും എനിക്കറിയാം. പരിപാടിയുടെ ലാഭം എത്രപേര്‍ക്ക് നല്‍കണമെന്നതും ഇക്കാര്യങ്ങള്‍ പുറത്തുവന്നാല്‍ എന്താകും ഉണ്ടാവുകയെന്നും എനിക്കറിയാം. പക്ഷെ എന്നെ ജീവിക്കാന്‍ എവിടെയും സമ്മതിക്കില്ല എന്ന തീരുമാനത്തിലാണെങ്കില്‍ ചേട്ടന്‍ ഇക്കാര്യങ്ങളെല്ലാം ഓര്‍ക്കുന്നത് നല്ലതായിരിക്കും'‐ കത്തിൽ പറയുന്നു.

‘എനിക്ക് ശിക്ഷ കിട്ടിയാലും പരിഭവമോ വിഷമമോ ഇല്ല. കാരണം ഞാന്‍ തെറ്റ് ചെയ്തിട്ടുണ്ട്. പക്ഷെ അത് എനിക്ക് വേണ്ടിയല്ല എന്നെങ്കിലും ഓര്‍ക്കണം. മൂന്ന് വര്‍ഷം മുമ്പ് പറഞ്ഞ കാര്യം പുറത്ത് പറഞ്ഞാല്‍ ജനം ആരാധിക്കുകയില്ല. തല്ലിക്കൊല്ലും. സ്വന്തം കുഴി ചേട്ടന്‍ തന്നെ തോണ്ടിയതല്ലേ.’

‘യജമാനന്‍ നായയെ പോറ്റുന്നത് വിശ്വസ്തനായ കാവല്‍ക്കാരനായതിനാലാണ്. യജമാനനോടുള്ള സ്നേഹത്താല്‍ മുരളുകയും കുരക്കുകയും ചെയ്യും. പക്ഷെ അതിനെക്കൊണ്ട് ഇനി ആവശ്യമില്ലെന്ന് കണ്ടാല്‍ ഒന്നിനും പറ്റില്ലെന്ന് കണ്ടാല്‍ കൊല്ലുകയോ ഉപേക്ഷിക്കുകയോ ചെയ്യും. ഇതറിയാവുന്ന ഞാന്‍ എല്ലാം കോടതിയില്‍ തുറന്ന് പറഞ്ഞ് ചെയ്ത തെറ്റിന് മാപ്പിരന്ന് കിട്ടാവുന്ന ശിക്ഷ വാങ്ങി അനുഭവിച്ച് തീര്‍ക്കാം.’ -സുനി കത്തിൽ പറയുന്നു.


 


ദേശാഭിമാനി വാർത്തകൾ ഇപ്പോള്‍ വാട്സാപ്പിലും ടെലഗ്രാമിലും ലഭ്യമാണ്‌.

വാട്സാപ്പ് ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..
ടെലഗ്രാം ചാനൽ സബ്സ്ക്രൈബ് ചെയ്യുന്നതിന് ക്ലിക് ചെയ്യു..



മറ്റു വാർത്തകൾ

----
പ്രധാന വാർത്തകൾ
-----
-----
 Top