കാടിനുള്ളിൽ മരത്തിൽചങ്ങലകൊണ്ട് കെട്ടിയിട്ട നിലയിൽ സ്ത്രീ: രക്ഷപ്പെടുത്തിയത് ആട്ടിടയൻ

മുംബൈ > കാടിനുള്ളിൽ മരത്തിൽ കെട്ടിയിട്ട നിലയിൽ സ്ത്രീയെ കണ്ടെത്തി. മഹാരാഷ്ട്രയിലെ സിന്ധുദുർ​​​​​​​​ഗ് ജില്ലയിലെ കാടിനുള്ളിലാണ് കാലുകൾ ചങ്ങലകൊണ്ട് ബന്ധിച്ച് മരത്തിൽ കെട്ടിയിട്ട് അവസ്ഥയിൽ സ്ത്രീയെ കണ്ടെത്തിയത്. കാട്ടിൽ ആടുമേയ്ക്കാൻ വന്ന ആളാണ്  സ്ത്രീയെ കണ്ട് പൊലീസിൽ വിവരമറിയിച്ചത്. ​ദിവസങ്ങളോളം ഭക്ഷണം കിട്ടാതെ മഴ നനഞ്ഞ് അവശയായ നിലയിലായിരുന്നു ഇവർ.

ലളിത കേയി എന്ന സ്ത്രീയെയാണ് കണ്ടെത്തിയത്. ഇവരിൽ നിന്ന് അമേരിക്കൻ പാസ്പോർട്ടും തമിഴ്നാട് മേൽവിലാസത്തിലുള്ള ആധാർ കാർഡും പൊലീസ് കണ്ടെടുത്തു. ശാരീരിക അവശതകളെ തുടർന്ന് ലളിത കേയിയെ ​ഗോവ മെഡിക്കൽ കോളേജിലേക്ക് മാറ്റി.

ലളിതയുടെ പാസ്പോർട്ട് കാലാവധി കഴിഞ്ഞിരിക്കുകയാണ്. കഴിഞ്ഞ 10 വർഷമായി ഇവർ ഇന്ത്യയിലുണ്ടെന്നാണ് പ്രാഥമികമായി ലഭിക്കുന്ന വിവരങ്ങൾ. മൊഴിയെടുക്കാനുള്ള അവസ്ഥയിലല്ല ലളിതയെന്നും ഭർത്താവായിരിക്കാം ഇവരെ കെട്ടിയിട്ടതെന്നും പൊലീസ് പറഞ്ഞു.