15 November Friday

ഞാൻ ധനുഷിന്റെ വലിയ ആരാധിക: മഞ്ജു വാര്യർ

വെബ് ഡെസ്‌ക്‌Updated: Thursday Aug 29, 2019
ധനുഷ് എന്ന നടന്റെ വലിയൊരു ആരാധികയാണ് താനെന്ന് മലയാളത്തിന്റെ സ്വന്തം മഞ്ജു വാര്യർ. ചെന്നൈയിൽ ‘അസുരൻ’ എന്ന ചിത്രത്തിന്റെ ഓഡിയോ ലോഞ്ചിനിടെയായിരുന്നു മഞ്ജുവിന്റെ വാക്കുകൾ. “ധനുഷ്‌ മുമ്പ്‌ തന്നെ നല്ലൊരു സുഹൃത്തായിരുന്നു, ഇപ്പോൾ എന്റെ പ്രിയപ്പെട്ട സഹപ്രവർത്തകനുമാണ്. ഞാൻ ധനുഷിന്റെ ഒരു വലിയ ഫാനാണ്,” മഞ്ജു വാര്യർ പറഞ്ഞു.

മഞ്ജുവിന്റെ ആദ്യ തമിഴ് ചിത്രമാണ് ‘അസുരൻ’. വെട്രിമാരൻ- ധനുഷ് ടീം വീണ്ടുമൊരുമിക്കുന്ന ‘അസുരനി’ലൂടെ തമിഴിൽ അരങ്ങേറ്റം കുറിക്കാനായതിൽ ഏറെ സന്തോഷമുണ്ടെന്നും മഞ്ജു കൂട്ടിച്ചേർത്തു. “ഈ ചിത്രത്തിലെ എന്റെ കഥാപാത്രം നിങ്ങൾക്കും ഇഷ്ടപ്പെടുമെന്ന് കരുതുന്നു. ഇതുപോലൊരു പടത്തിലൂടെ വരാൻ പറ്റിയതിൽ ഏറെ സന്തോഷമുണ്ട്. സെറ്റിൽ എന്നെ കംഫർട്ടാക്കി വെച്ചതിൽ ധനുഷിനോടും വെട്രിമാരനോടും അണിയറപ്രവർത്തകരോടും നന്ദിയും സ്നേഹമുണ്ട്. എല്ലാവരും മലയാളം സിനിമയിലെന്ന പോലെ തന്നെ ഹോംലിയായ അന്തരീക്ഷം ഒരുക്കിതന്നു. ഇനിയും തമിഴ് പടത്തിൽ അഭിനയിക്കാൻ ആഗ്രഹമുണ്ട്.”

‘അസുരനി’ൽ ഡബിള്‍ റോളില്‍ ആണ് ധനുഷ് എത്തുന്നത്‌ എന്നാണ് റിപ്പോർട്ടുകൾ. അച്ഛന്‍-മകന്‍ എന്നിങ്ങനെ വിവിധ പ്രായത്തിലുള്ള കഥാപാത്രമായാവും ധനുഷ് എത്തുക എന്ന് വെട്രിമാരൻ അടുത്തിടെ ഒരു അഭിമുഖത്തില്‍ വെളിപ്പെടുത്തിയിരുന്നു. രണ്ടു ലൂക്കിലും ഉള്ള ധനുഷിന്റെ ഫോട്ടോയും അണിയറ പ്രവര്‍ത്തകര്‍ റിലീസ് ചെയ്തിട്ടുണ്ട്
 
‘അസുരനി’ല്‍ മഞ്ജുവും ധനുഷും ഒന്നിച്ചുള്ള ചിത്രത്തിന്റെ ഫസ്റ്റ് ലുക്ക് മുന്‍പ് തന്നെ റിലീസ് ചെയ്തിരുന്നു. ‘വെക്കൈ’ എന്ന തമിഴ് നോവലിന്റെ സിനിമാ ആവിഷ്കാരമാണ് ‘അസുരൻ’ എന്നു റിപ്പോർട്ടുകളുണ്ട്. എന്നാൽ ചിത്രത്തിന്റെ കഥയെ സംബന്ധിക്കുന്ന കൂടുതൽ വിവരങ്ങളൊന്നും അണിയറ പ്രവർത്തകർ ഇതു വരെ വെളിപ്പെടുത്തിയിട്ടില്ല. വി ക്രിയേഷൻസിന്റെ ബാനറിൽ കലൈപുലി എസ് താനു ആണ് ചിത്രം നിർമ്മിക്കുന്നത്.
മറ്റു വാർത്തകൾ

പ്രധാന വാർത്തകൾ
 Top