24 February Monday

ഗ്രാമിയിലെ പെണ്‍കുട്ടി ; ലോകത്തെ ഞെട്ടിച്ച് ബില്ലി ഐലിഷ്

വെബ് ഡെസ്‌ക്‌Updated: Tuesday Jan 28, 2020

സം​ഗീതത്തിന്റെ പരമോന്നത പുരസ്കാരവേദിയില്‍ ലോകത്തെ ഞെട്ടിച്ച് പതിനെട്ടുകാരി. അമേരിക്കന്‍ സം​ഗീതലോകത്തെ ഓസ്കറായി കരുതപ്പെടുന്ന ​​ഗ്രാമിയില്‍ ബില്ലി ഐലിഷ് എന്ന പെണ്‍കുട്ടി വാരിക്കൂട്ടിയത് ഏറ്റവും മഹത്തായ അഞ്ച്‌ പുരസ്കാരം. മികച്ച പുതുമുഖ കലാകാരി,  ഏറ്റവും മികച്ച സം​ഗീത റെക്കോഡ്,  മികച്ച ആല്‍ബം, മികച്ച പാട്ട് എന്നിങ്ങനെ പ്രധാന നാലു പുരസ്കാരം. ഒപ്പം മികച്ച പോപ്പ്‌ സം​ഗീത ആല്‍ബത്തിനുള്ള പുരസ്കാരവും.

ആറ്‌ നാമനിര്‍ദേശമാണ് ലഭിച്ചത്. ഇതില്‍ അഞ്ചിലും പുരസ്കാരം നേടി.  ​ഗ്രാമിപുരസ്കാരത്തിനായി ഈവര്‍ഷം പരി​ഗണിക്കപ്പെട്ടവരില്‍ ഏറ്റവും ഇളയവള്‍, വിശ്വസം​ഗീത‍ജ്ഞരുടെ നിരവധി റെക്കോഡ്‌ പഴങ്കഥയാക്കി. ഏറ്റവും മികച്ച ആല്‍ബത്തിനുള്ള പുരസ്കാരം 20–-ാം വയസ്സില്‍ നേടിയ ടൈലര്‍ സ്വിഫ്റ്റിന്റെ റെക്കോഡും കടപുഴകി.
ബ്രിട്ടീഷ് ​ഗായിക അഡ്ലെ പ്രധാന ​ഗ്രാമിപുരസ്കാരങ്ങള്‍ വാരിക്കൂട്ടിയിട്ടുണ്ടെങ്കിലും അവ മൂന്നു വര്‍ഷത്തെ ഇടവേളയിലായിരുന്നു.

അമേരിക്കയിലെ ലൊസ് ആഞ്ചലസ് ചില്‍ഡ്രൻസ് കോറസില്‍നിന്ന്‌ സം​ഗീത ആല്‍ബവുമായി എത്തിയ ബില്ലി സഹോദരനെ പിന്തുടര്‍ന്നാണ് സം​ഗീതലോകത്ത്‌ എത്തിയത്. ആദ്യ ആല്‍ബം "വെന്‍ വി ഫാള്‍ അസ്ലീപ്, വെയര്‍ ഡു വി ​​ഗോ?' എന്ന ആദ്യ ആല്‍ബം പുറത്തിറങ്ങിയത് കഴിഞ്ഞ മാര്‍ച്ചില്‍. ഇതിലെ ബാ​ഡ് ​ഗൈ എന്ന പാട്ട് ആദ്യ ആ​ഗോള ഹിറ്റായി. യുകെയിലെ ഏറ്റവും മികച്ച ആല്‍ബമായി ഇതുമാറി.

അപ്രതീക്ഷിതമായി വിടപറഞ്ഞ ലോക ബാസ്കറ്റ് ബോള്‍ ഇതിഹാസം കൊര്‍ബി ബ്രയന്റിന് ആദരം അര്‍പ്പിച്ചാണ്‌  ലൊസ് ആഞ്ചലസിലെ സ്റ്റേപില്‍ സെന്ററില്‍ പുരസ്കാരപ്രഖ്യാപനം അരങ്ങേറിയത്.


പ്രധാന വാർത്തകൾ
 Top