print edition പാലക്കാട് ; ചുവപ്പിന്റെ കോട്ട
പാലക്കാട് കിഴക്കഞ്ചേരി പഞ്ചായത്തിലെ ഇളവംപാടത്ത് എൽഡിഎഫ് പ്രവർത്തകർ തെരഞ്ഞെടുപ്പുപ്രചാരണത്തി /ഫോട്ടോ: ശരത് കൽപ്പാത്തി
വേണു കെ ആലത്തൂർ
Published on Nov 29, 2025, 03:45 AM | 1 min read
പാലക്കാട്
വൈവിധ്യങ്ങളുടെ വിശാലതയെ നെഞ്ചിലേറ്റിയ ഭൂമികയാണ്‌ പാലക്കാട്. എത്ര വലിയ കാറ്റിനും ഇളക്കാൻ കഴിയാത്ത ചുവപ്പുകോട്ട. ഇ എം എസ്‌, എ കെ ജി, ഇ കെ നായനാർ, വി എസ്‌ തുടങ്ങിയ കമ്യൂണിസ്റ്റ്‌ നേതാക്കൾ ജനപ്രതിനിധിയായ, പോരാട്ടചരിത്രത്തിന്‌ പുതിയ അധ്യായം കുറിച്ച ജില്ല. നിയമസഭാ മണ്ഡലങ്ങളിൽ 12ൽ പത്തിലും ഇടതുപക്ഷ ജനാധിപത്യമുന്നണി പ്രതിനിധികളാണ്‌.
തദ്ദേശ തെരഞ്ഞെടുപ്പിൽ സന്പൂർണ വിജയമെന്ന ലക്ഷ്യത്തിലാണ്‌ പാലക്കാട്ടെ എൽഡിഎഫ് ക്യാമ്പ്‌. സർക്കാരിന്റെയും തദ്ദേശസ്ഥാപനങ്ങളുടെയും വികസനം മുൻനിർത്തിയാണ്‌ പ്രചാരണം. ബിജെപി ഭരിച്ച്‌ നശിപ്പിച്ച പാലക്കാട് നഗരഭസയുടെയടക്കം അവസ്ഥയും പ്രധാന ചർച്ചാവിഷയമാണ്‌.
നാലര ലക്ഷത്തോളംപേർ സാമൂഹ്യ സുരക്ഷാ പെൻഷൻ വാങ്ങുന്ന ജില്ലയിൽ ഒന്പതര വർഷമായി വൻവികസനമാണ്‌ എൽഡിഎഫ് സർക്കാർ നടപ്പാക്കിയത്‌. ലൈഫ്‌ പദ്ധതിയിൽ 68,101 വീടുകൾ നിർമിച്ചു. ഇതിനായി 2127 കോടി ചെലവഴിച്ചു. എല്ലാ താലൂക്ക്‌ ആശുപത്രികളിലും മികച്ച നിലവാരത്തിലേക്ക്‌ ഉയർത്തി. ജില്ലാ ആശുപത്രി അന്തർദേശീയ നിലവാരത്തിലേക്കുയരുകയാണ്‌. മെഡിക്കൽ കോളേജിനുമാത്രം 817 കോടി ചെലവഴിച്ചു. റോഡ്‌, പാലങ്ങൾ തുടങ്ങി അടിസ്ഥാന സ‍ൗകര്യവികസനവും മികച്ച നിലയിലാണ്‌.
രണ്ട്‌ ജലവൈദ്യുതി പദ്ധതികളാണ്‌ ജില്ലാ പഞ്ചായത്തിന്റെ നേതൃത്വത്തിൽ തുടങ്ങിയത്‌.
മൂന്നാമത്തെത്തിന്റെ നിർമാണവും ആരംഭിച്ചു. തദ്ദേശ സ്ഥാപനങ്ങൾ നടപ്പാക്കിയ വികസനപ്രവർത്തനങ്ങളുടെ തുടർച്ചയ്‌ക്കാണ്‌ എൽഡിഎഫ് വോട്ടഭ്യർഥിക്കുന്നത്‌. എന്നാൽ പരാജയം മുന്നിൽക്കണ്ട യുഡിഎഫും ബിജെപിയും പരസ്‌പരം സഹായിക്കുന്ന പരസ്യ സഖ്യമായി മാറി. കഴിഞ്ഞ തവണ ബിജെപി പ്രതിപക്ഷമായ പുതുനഗരം പഞ്ചായത്തിൽ നാലു വാർഡിൽ സ്ഥാനാർഥികളെ നിർത്താത്തത്‌ ഇതിനുദാഹരണം. പാലക്കാട് നഗരസഭയിൽ ബിജെപിയെ സഹായിക്കുന്ന സമീപനമാണ്‌ കോൺഗ്രസ് സ്വീകരിക്കുന്നത്‌.
പ്രതിപക്ഷ നേതാവ്‌ ഉദ്‌ഘാടനം ചെയ്യുന്ന നഗരസഭ കൺവൻഷനിൽ പോലും ആളില്ലാതിരുന്നതും ഇതിന്റെ പേരിൽ പ്രതിപക്ഷ നേതാവ്‌ വേദിയിൽ നിന്നിറങ്ങിപ്പോയതും കഴിഞ്ഞദിവസമാണ്‌. ലൈംഗിക പീഡനക്കേസിൽ പ്രതിയായ എംഎൽഎയെ മുൻനിർത്തിയായിരുന്നു നഗരസഭയിൽ കോൺഗ്രസ് പ്രചാരണം.
Related News
Dont Miss it
0 comments