print edition തദ്ദേശ ഉപതെരഞ്ഞെടുപ്പുകൾ ; ജനഹിതം 
എൽഡിഎഫിന്

തിരുവനന്തപുരം

സംസ്ഥാനത്ത്‌ നാലര വർഷത്തിനിടെ തദ്ദേശസ്ഥാപനങ്ങളിലേക്കു നടന്ന ഉപതെരഞ്ഞെടുപ്പുകളിൽ എൽഡിഎഫ്‌ പിടിച്ചെടുത്തത്‌ 49 വാർഡുകൾ. ഇതിൽ 35 എണ്ണവും യുഡിഎഫിന്റെ സിറ്റിങ്‌ സീറ്റുകൾ. ബിജെപിയുടെ 13 സീറ്റുകൾ ഇടതുപക്ഷത്തിന്റെ അക്കൗണ്ടിലായി. ഒരു സീറ്റ്‌ ബിജെപിയിൽ ലയിച്ച കേരള ജനപക്ഷത്തിന്റേതാണ്‌.

2020 ഡിസംബറിൽ തദ്ദേശസ്ഥാപനങ്ങളിലേക്കു നടന്ന തെരഞ്ഞെടുപ്പിനുശേഷം 13 തവണയായി 368 വാർഡുകളിലേക്കാണ് ഉപതെരഞ്ഞെടുപ്പ് നടന്നത്‌. ഇതിൽ 173 ഇടത്തും വിജയം എൽഡിഎഫിന്‌ ഒപ്പമായിരുന്നു. 159 വാർഡുകളിൽ യുഡിഎഫ്‌ ജയിച്ചു. 27 എണ്ണം ബിജെപി നേടി. ഏഴിടത്ത്‌ സ്വതന്ത്രർ വിജയിച്ചപ്പോൾ ഓരോ സീറ്റുകളിൽ എസ്‌ഡിപിഐയും ആംആദ്‌മിയും വിജയിച്ചു. ആദ്യ ഉപതെരഞ്ഞെടുപ്പ്‌ 2021 ആഗസ്‌ത്‌ 11ന്‌ ആയിരുന്നു. എട്ട്‌ സീറ്റുകളിൽ എൽഡിഎഫും ഏഴു സീറ്റുകളിൽ യുഡിഎഫും വിജയിച്ചു. കഴിഞ്ഞ ഫെബ്രുവരി 24ന്‌ നടന്ന അവസാന ഫലം, വരുന്ന തെരഞ്ഞെടുപ്പിലും ജനങ്ങൾ എൽഡിഎഫിനൊപ്പമാണെന്നതിന്റെ സാക്ഷ്യമായി. 30 വാർഡുകളിലേക്കു നടന്ന ഉപതെരഞ്ഞെടുപ്പിൽ 17 ഇടത്തും എൽഡിഎഫ്‌ വിജയിച്ചുകയറി. 12 ഇടത്ത്‌ യുഡിഎഫും ഒരിടത്ത്‌ എസ്‌ഡിപിഐയും ജയിച്ചപ്പോൾ ബിജെപി സംപൂജ്യരായി. എൽഡിഎഫ്‌ നാലു വാർഡുകൾ യുഡിഎഫിൽനിന്ന്‌ പിടിച്ചെടുത്തു.

കോൺഗ്രസും ലീഗും നേർക്കുനേർ , 39 വാർഡിൽ മത്സരം

ഐക്യമുന്നണിയെന്നാണ്‌ പേരെങ്കിലും യുഡിഎഫിലെ പ്രധാന കക്ഷികളായ കോൺഗ്രസും മുസ്ലിംലീഗും മിക്ക ജില്ലകളിലും പരസ്‌പരം പോരടിക്കുകയാണ്‌. പത്തു ജില്ലകളിലായി 39 വാർഡുകളിൽ കോൺഗ്രസും ലീഗും നേർക്കുനേർ മത്സരിക്കുന്നു. മലപ്പുറത്തെ പൊൻമുണ്ടം പഞ്ചായത്തിൽ യുഡിഎഫ്‌ സംവിധാനമേയില്ല. ഇവിടെ ലീഗിനെതിരെ രൂപീകരിച്ച ജനകീയ മുന്നണിയിലാണ്‌ കോൺഗ്രസുള്ളത്‌. കോൺഗ്രസ്‌ 11 വാർഡുകളിൽ ലീഗിനെ എതിരിടുന്നു. പെരുമണ്ണ ക്ലാരിയിൽ രണ്ടിടത്തും കോൺഗ്രസും ലീഗും നേർക്കുനേർ പോരാട്ടമാണ്‌. ഇതുകൂടാതെ ഒട്ടേറെ വാർഡുകളിൽ പരസ്‌പരം വിമതരായും സ്ഥാനാർഥികളുണ്ട്‌.

തിരുവനന്തപുരത്ത്‌ മൂന്നു നഗരസഭാ വാർഡിലും കോർപറേഷനിൽ ഒരു ഡിവിഷനിലും ഏറ്റുമുട്ടുന്നു. കൊല്ലത്ത്‌ മൂന്നു നഗരസഭാ വർഡുകളിൽ മത്സരമുണ്ട്‌. പഞ്ചായത്തിൽ ഒരിടത്തും. ഇടുക്കിയിൽ ഒരു നഗരസഭാ വാർഡിലും പഞ്ചായത്തിൽ രണ്ടിടത്തും. കണ്ണൂരിൽ ഒരു കോർപറേഷൻ ഡിവിഷനിലും പഞ്ചായത്തിൽ അഞ്ചിടത്തും പാലക്കാട്ട്‌ നഗരസഭയിലും പഞ്ചായത്തിലും ഓരോ വാർഡിലും നേർക്കുനേർ വരുന്നു. കോട്ടയത്ത്‌ മൂന്നു പഞ്ചായത്ത്‌ വാർഡുകളിലും ആലപ്പുഴയിൽ രണ്ടിടത്തും വയനാടും കാസർകോടും ഒരിടത്തുമാണ്‌ മത്സരം.

മുണ്ടക്കൈ 
വാർഡില്ല

ഉരുൾപൊട്ടി തകർന്ന മുണ്ടക്കൈ വാർഡ്‌ ഇല്ലാതെയാണ്‌ ഇത്തവണ തദ്ദേശ തെരഞ്ഞെടുപ്പ്‌. മേപ്പാടി പഞ്ചായത്തിലെ 11–ാം വാർഡായിരുന്നു മുണ്ടക്കൈ. വാർഡ്‌ പുനർവിഭജനത്തിൽ 12–ാം വാർഡായ ചൂരൽമലയുമായി കൂട്ടിച്ചേർത്തു. ദുരന്തംകൂടി പരിഗണിച്ചായിരുന്നു കൂട്ടിച്ചേർക്കൽ. ഇതോടെ ചൂരൽമല 11–ാം വാർഡായി. 2212 വോട്ടർമാരുണ്ട്‌. തൊട്ടടുത്ത ചുളിക്ക പുതിയ 12–-ാം വാർഡായി. ഉരുൾ ബാധിച്ച പത്താം വാർഡ്‌ അട്ടമലയിൽ കാര്യമായ മാറ്റങ്ങളില്ല. ഉരുൾപൊട്ടലിൽ 298 പേരുടെ ജീവനാണ്‌ നഷ്‌ടമായത്‌. കുടുംബങ്ങളിൽ ഭൂരിഭാഗവും സർക്കാർ ഒരുക്കിയ വാടകവീടുകളിലാണ്‌. ദുരന്തബാധിതർക്കുള്ള ട‍ൗൺഷിപ്പിന്റെ നിർമാണം കൽപ്പറ്റയിൽ പുരോഗമിക്കുകയാണ്‌. ജനുവരിയിൽ പുനരധിവസിപ്പിക്കും.