print edition അങ്ങനെ ബാപ്പുജി നഗറായി

തൃശൂർ

‘ഇതൊരു കുടുസു വഴിയായിരുന്നു. ഓട്ടോപോലും വരില്ല. എല്ലാം ചുമന്ന്‌ നടക്കണം. ഇപ്പോൾ നോക്കൂ. മികച്ച കോൺക്രീറ്റ് റോഡായി. വാഹനങ്ങൾ വീട്ടുമുറ്റത്ത് എത്തും. വീട്‌ മനോഹരമായി പണികഴിപ്പിച്ച് സർക്കാർ തന്നു. ഇതിൽപ്പരം സന്തോഷമില്ല’. താന്ന്യം പഞ്ചായത്തിലെ പൈന്നൂർ ചന്ദ്രപുരയ്ക്കൽ മെറ്റിൽഡയുടെ വാക്കുകളിൽ നിറയുന്നത് ബാപ്പുജി നഗറിന്റെയാകെ സന്തോഷം.

പട്ടികജാതി വികസന വകുപ്പിന്റെ അംബേദ്‌കർ ഗ്രാമവികസന പദ്ധതിയിൽ ഒരുകോടിയുടെ വികസന പ്രവർത്തനങ്ങളാണ്‌ നടപ്പാക്കിയത്‌. ആളുകൾ മരിച്ചാൽ മൃതദേഹം ചുമന്നുപോകേണ്ട ഗതികേടായിരുന്നുവെന്ന്‌ ബാപ്പുജി നഗറിലെ സരിമ ചാഴുവീട്ടിൽ പറഞ്ഞു. 50 കുടുംബങ്ങൾ താമസിക്കുന്ന ബാപ്പുജി നഗറിലേക്ക്‌ കൊച്ചുവഴിയായിരുന്നു. നാട്ടുകാരുടെ സഹായത്തോടെ സ്ഥലമേറ്റെടുത്ത് വീതികൂട്ടി കോൺക്രീറ്റ് ചെയ്‌ത് ഗതാഗതസജ്ജമാക്കി. വൈദ്യുതിതൂണുകൾ മാറ്റി. കാന പുതുക്കി, കലുങ്ക് നിർമിച്ചു. ഇതോടെ വീടുകളിലെ വെള്ളക്കെട്ട്‌ ഒഴിഞ്ഞു. നഗറിലെ 17 വീടുകളുടെ അറ്റകുറ്റപ്പണികളും പൂർത്തിയാക്കി.