വൈക്കം സഹകരണ ബാങ്ക് തെരഞ്ഞെടുപ്പിൽ കോൺഗ്രസ്-ബിജെപി മുന്നണി

വൈക്കം > വൈക്കം അർബൻ സഹകരണ ബാങ്ക് തെരഞ്ഞെടുപ്പിൽ കോൺഗ്രസ്-ബിജെപി മുന്നണി. അർബൻ സഹകരണ ബാങ്ക് (നം.1193) തെരഞ്ഞെടുപ്പിലാണ് കോൺഗ്രസ്-ബിജെപി സ്ഥാനാർത്ഥികൾ ഒരുമിച്ച് മത്സരിക്കുന്നത്. കോൺഗ്രസ്‌ നേതൃത്വം നൽകുന്ന സഹകരണ ജനാധിപത്യ മുന്നണിയുടെ പാനലിൽ വൈക്കത്തെ കോൺഗ്രസിന്റെ രണ്ട് ബ്ലോക്ക് പ്രസിഡന്റുമാർക്കും യുഡിഎഫ് നിയോജക മണ്ഡലം കൺവീനർക്കും ജില്ലാ-മണ്ഡലം നേതാക്കൾക്കുമൊപ്പം ബിജെപിയുടെ വൈക്കത്തെ വനിതാ നേതാവും മത്സര രംഗത്തുണ്ട്.

നഗരസഭയുടെ 26 വാർഡുകളുമുൾപ്പെടുന്ന ബിജെപി വൈക്കം ടൗൺ കമ്മറ്റി പ്രസിഡന്റ് പ്രിയാ ഗിരീഷാണ് കോൺ​ഗ്രസ് പാനലിൽ മത്സരിക്കുന്നത്. പ്രിയാ ഗിരീഷ് കഴിഞ്ഞ നഗരസഭാ തെരഞ്ഞെടുപ്പിൽ ബിജെപിയുടെ സ്ഥാനാർത്ഥിയായിരുന്നു. ഡിസിസി ജനറൽ സെക്രട്ടറിയും രണ്ട് നിയമസഭാ തെരഞ്ഞെടുപ്പുകളിൽ വൈക്കം നിയോജക മണ്ഡലത്തിലെ യുഡിഎഫ് സ്ഥാനാർത്ഥിയുമായിരുന്ന എ സനീഷ്കുമാറും ഇതേ പാനലിൽ ഉണ്ട്. കോൺഗ്രസിന്റെയും ബിജെപിയുടെയും പ്രധാനപ്പെട്ട നേതാക്കൾ  ഒരേ പാനലിൽ മത്സരിക്കുന്നതിനെതിരെ കോൺഗ്രസിൽ തന്നെ അതൃപ്തി പുകയുകയാണ്. ഒത്തുകളി പുറത്തായ ശേഷവും ഇത് സംബന്ധിച്ച് പ്രതികരിക്കാൻ രണ്ട് പാർട്ടികളുടെയും നേതൃത്വം തയ്യാറായിട്ടില്ല.