നിതീഷിന്‌ ബിഹാർ ജനത മറുപടി നൽകും
ഫോട്ടോ: പി വി സുജിത്‌
ബിഹാറിൽ നിയമസഭാ തെരഞ്ഞെടുപ്പിന്റെ ആദ്യഘട്ടത്തിന്‌ തുടക്കമാകുകയാണ്‌. ‘ബിഹാർ ജനത നിതീഷ്‌ ഭരണത്തിൽ തികച്ചും അസംതൃപ്‌തരാണ്‌. അഴിമതിയുടെ കേന്ദ്രമായി സംസ്ഥാന ഭരണം മാറി. ഇ‍ൗ സർക്കാരിനെ വലിച്ചുതാഴെയിടാൻ അവസരം നോക്കിയിരിക്കുകയാണ്‌ ജനങ്ങൾ. അതിന്റെ പ്രതിഫലനമാകും ഇത്തവണത്തെ ജനവിധി. ബിഹാർ മാഫിയയുടെ പിടിയിലായി. ക്രമസമാധാന വിഷയത്തിൽ ജെഡിയു–ബിജെപി സർക്കാർ ദയനീയ പരാജയമാണ്‌.’ സിപിഐ എം ബിഹാർ സംസ്ഥാന സെക്രട്ടറി ലലൻ ച‍ൗധ്‌രി ദേശാഭിമാനിക്ക്‌ നൽകിയ അഭിമുഖം. തയ്യാറാക്കിയത്‌: ഡൽഹി ബ്യൂറോയിലെ സീനിയർ റിപ്പോർട്ടർ എം അഖിൽ
നിതീഷിന്റെ ഭരണത്തെ എങ്ങനെ വിലയിരുത്തുന്നു
നിതീഷ്‌കുമാറിന്റെ ഭരണത്തിൽ ബിഹാർ അഴിമതിയുടെ കൂത്തരങ്ങായി മാറി. പൈസ കൊടുക്കാതെ സർക്കാർതലത്തിൽ ചെറിയ കാര്യങ്ങൾപോലും നടത്തിയെടുക്കാൻ പറ്റില്ല. അടുത്തകാലത്ത്‌ വന്ന രസകരമായ വാർത്ത നിങ്ങളുടെ ശ്രദ്ധയിൽപ്പെട്ടിരിക്കും– പൊലീസ്‌ പിടിച്ചെടുത്ത്‌ സ്‌റ്റേഷനിൽ സൂക്ഷിച്ചിരുന്ന ഒരുലക്ഷം ലിറ്റർ മദ്യം ഒറ്റരാത്രികൊണ്ട്‌ കാണാതായി. ‘ഒരു ലക്ഷം ലിറ്റർ മദ്യവും എലികൾ കുടിച്ചു’ – എന്നായിരുന്നു അധികൃതരുടെ വിശദീകരണം. നിതീഷിന്റെ ഭരണത്തിനുകീഴിൽ അഴിമതിയും കെടുകാര്യസ്ഥതയും അരാജകത്വവും എത്രത്തോളമാണെന്ന വസ്‌തുത വ്യക്തമാക്കാനാണ്‌ ഇ‍ൗ സംഭവം ചൂണ്ടിക്കാണിച്ചത്‌. വികസനത്തിന്റെ പേരിലും വലിയ കൊള്ളയാണ്‌ ഇവിടെ നടക്കുന്നത്. ആദ്യം എന്തിനും ഏതിനും കമീഷൻ അടിക്കുന്ന ‘കമീഷൻ രാജ്‌’ ആയിരുന്നു. ഇപ്പോൾ, വലിയ കടലാസ്‌ പദ്ധതികളുടെ പേരിലുള്ള തീവെട്ടിക്കൊള്ളകളാണ്‌ നടക്കുന്നത്. കടലാസ്‌ പദ്ധതികളുടെ പേരിൽ കോടികൾ പല പോക്കറ്റുകളിലേക്കും പ്രവഹിക്കുന്നു. അടിത്തട്ടിലെ ജനങ്ങൾക്ക്‌ അതിന്റെ ഒരു നേട്ടവും കിട്ടുന്നില്ല.
മോദിയുടെയും അമിത്‌ഷായുടെയും ‘ജംഗിൾരാജ്‌’ പ്രചാരണത്തിനുള്ള മറുപടി
ആർജെഡിയുടെ മുൻഭരണകാലത്ത്‌ ‘ജംഗിൾരാജ്‌’ ആയിരുന്നെന്നാണ്‌ അവർ ആരോപിക്കുന്നത്‌. അപ്പോൾ ‘ഇപ്പോൾ നടക്കുന്നത് മംഗൾരാജാണോ?’– എന്ന ചോദ്യത്തിന് അവർ ഉത്തരം പറയണം. തെരഞ്ഞെടുപ്പിന്‌ ദിവസങ്ങൾ മാത്രം ശേഷിക്കെ, പട്ടാപ്പകൽ റോഡിലിട്ട്‌ ആളുകളെ വെടിവച്ച്‌ കൊല്ലുന്നതിന്‌ എന്ത്‌ സമാധാനം പറയാനുണ്ട്‌?. നിതീഷിന്റെ കീഴിൽ ‘സുശാസനം’ആണെന്ന പ്രചാരണമാണ്‌ നടക്കുന്നത്. സത്യത്തിൽ, 20 വർഷമായി ഇവിടെ ‘കുശാസനം’ (ദുഷ്ടഭരണം) ആണ്‌ നടക്കുന്നത്. കുറ്റകൃത്യങ്ങളുടെ എണ്ണം വലിയരീതിയിൽ വർധിച്ചു. സ്‌ത്രീകൾക്കും കുട്ടികൾക്കും എതിരായ അതിക്രമങ്ങൾ പെരുകി. ദളിതർക്കും പിന്നാക്കവിഭാഗക്കാർക്കും എതിരായ ആക്രമണങ്ങളും കുതിച്ചുയർന്നു.
എസ്‌ഐആർ സൃഷ്ടിച്ച പ്രശ്‌നങ്ങൾ
എസ്‌ഐആറിലൂടെ സംസ്ഥാനത്ത്‌ ലക്ഷക്കണക്കിന്‌ ആളുകളുടെ വോട്ട്‌ ജനാധിപത്യവിരുദ്ധമായി വെട്ടിക്കളഞ്ഞു. അതിന്‌ എതിരായി ഇവിടെ എല്ലാ പ്രതിപക്ഷ പാർടികളുടെയും നേതൃത്വത്തിൽ വലിയ പ്രക്ഷോഭങ്ങൾ അരങ്ങേറി. നുഴഞ്ഞുകയറ്റക്കാരെ നീക്കാനാണെന്ന പേരിലാണ്‌ എസ്‌ഐആർ നടപ്പാക്കിയത്‌. എന്നാൽ, ഇ‍ൗ തീയതിവരെയും ഒറ്റ നുഴഞ്ഞുകയറ്റക്കാരനെപ്പോലും കണ്ടെത്താൻ അവർക്ക്‌ കഴിഞ്ഞിട്ടില്ല. ഇതേ വോട്ടർപട്ടികയുടെ അടിസ്ഥാനത്തിലാണ്‌ അവർ ഇവിടെ പല തെരഞ്ഞെടുപ്പുകളും നടത്തിയത്‌. അപ്പോൾ,ആ തെരഞ്ഞെടുപ്പുകൾക്ക്‌ ഒന്നും സാധുതയില്ലെന്നാണോ ഇവർ പറയുന്നത്‌?. എസ്‌ഐആറിന്‌ എതിരായ ബിഹാറിലെ പ്രക്ഷോഭം രാജ്യത്തിന്റെ മുഴുവൻ ശ്രദ്ധ ആകർഷിച്ചു. രാജ്യവ്യാപകമായി എസ്‌ഐആർ നടപ്പാക്കാൻ പോകുന്പോൾ ബിഹാറിന്റെ അനുഭവം അറിയാവുന്നവർ അതിനെ നഖശിഖാന്തം എതിർക്കും. രാജ്യമുടനീളം തുടർപ്രക്ഷോഭങ്ങൾ നടക്കും.
മഹാസഖ്യത്തിന്റെ സാധ്യതകൾ
കോൺഗ്രസിന്റെ ഭാഗത്തുനിന്നും ചില പ്രശ്‌നങ്ങൾ തുടക്കത്തിലുണ്ടായിരുന്നു. അവർക്ക്‌ കൂടുതൽ സീറ്റുകളിൽ മത്സരിക്കണമെന്ന്‌ താൽപ്പര്യമുണ്ടായിരുന്നു. അതിന്റെ പേരിൽ ചില പ്രശ്‌നങ്ങളുണ്ടായിരുന്നു. രാഷ്ട്രീയശത്രുക്കൾക്ക്‌ എതിരായ ഒറ്റക്കെട്ടായ പോരാട്ടത്തിൽ ചില വിട്ടുവീഴ്‌ചകൾ അനിവാര്യമാണ്‌. പാർടിയും ഇ‍ൗ രീതിയിൽ വീട്ടുവീഴ്‌ചകൾ നടത്തിയിട്ടുണ്ട്‌. മഹാസഖ്യത്തിന്റെ ഐക്യം നിലനിർത്താൻ അത്‌ ആവശ്യമായിരുന്നു. മഹാസഖ്യം ഇപ്പോൾ ഒറ്റക്കെട്ടായാണ്‌ പോരാടുന്നത്‌. അതിന്റെ ഗുണം എല്ലാ പാർടികൾക്കുമുണ്ടാകും. ഇക്കുറി മഹാസഖ്യം അധികാരത്തിലെത്തും. അതിൽ ചെറിയ സംശയത്തിനുപോലും ഇടയില്ല.
ഇ‍ൗ തെരഞ്ഞെടുപ്പിൽ സിപിഐ എമ്മിന്റെ സാധ്യതകൾ
വിഭൂതിപുരും മാഞ്ചിയും സിപിഐ എം സിറ്റിങ് സീറ്റുകളാണ്‌. ഹയാഘട്ടും പിപ്രയുമാണ്‌ മറ്റ്‌ രണ്ട്‌ സീറ്റുകൾ. ഹയാഘട്ടിലും അടുത്തുള്ള മണ്ഡലമായ ബഹാദുർപുരിലും സിപിഐ എമ്മിന്റെയും വർഗബഹുജന സംഘടനകളുടെയും നേതൃത്വത്തിൽ വലിയ പ്രക്ഷോഭങ്ങൾ നടന്നിട്ടുണ്ട്‌. പിപ്രയിൽ കഴിഞ്ഞ തവണ നമുക്ക്‌ 80,000 വോട്ടുകൾ സമാഹരിക്കാൻ കഴിഞ്ഞിട്ടുണ്ട്‌. ഏറ്റവും സാധ്യതയുള്ള നാല്‌ മണ്ഡലങ്ങളിൽ തന്നെയാണ്‌ ഇക്കുറി സിപിഐ എം മത്സരിക്കുന്നത്‌. ദളിത്‌, പിന്നാക്ക, മുസ്ലിം വിഭാഗങ്ങൾ പാർടിക്കൊപ്പമുണ്ട്‌. മഹാസഖ്യത്തിന്റെ പൂർണ പിന്തുണയും ഇ‍ൗ മണ്ഡലങ്ങളിൽ നമുക്കുണ്ട്‌. നാലിടത്തും മികച്ച ഭൂരിപക്ഷത്തോടെ ജയിക്കാനാകുമെന്ന ശുഭപ്രതീക്ഷയാണുള്ളത്‌.
ബിഹാറിൽ സിപിഐ എം ഇടപെടലുകളെക്കുറിച്ച്‌
കഴിഞ്ഞ അഞ്ച്‌ വർഷമായി കേന്ദ്രത്തിലെയും സംസ്ഥാനത്തിലെയും ദുർഭരണത്തിന്‌ എതിരായി ഏറ്റവും കൂടുതൽ സമരങ്ങൾ നടത്തിയിട്ടുള്ളത്‌ സിപിഐ എമ്മാണ്‌. സർക്കാരിന്റെ തെറ്റായ നയങ്ങൾക്കും തീരുമാനങ്ങൾക്കും എതിരെ നിയമസഭയ്‌ക്കുള്ളിലും തെരുവിലും സർവശക്തിയും സമാഹരിച്ച്‌ പാർടി പോരാട്ടങ്ങൾ നടത്തി. ദുർഭരണത്തിനും വർഗീയതയ്‌ക്കും എതിരെ പോരാടാനും ഭരണഘടനയെയും മനുഷ്യാവകാശത്തെയും സംരക്ഷിക്കാനും സിപിഐ എമ്മാണ്‌ ഏറ്റവും ഫലപ്രദമായ ഇടപെടലുകൾ നടത്തുന്നത്‌. ഇതിന്റെ ഫലമായി യുവതലമുറയും പാർടിയിൽ വലിയരീതിയിൽ അണിചേരുന്നുണ്ട്‌. ഭാവികാലങ്ങളുടെ പോരാട്ടങ്ങൾക്കായി ബിഹാറിലെ പാർടി പൂർണസജ്ജമാണ്‌.
