അനുഭവം കരുത്താകും
ഫോട്ടോ: എ ആർ അരുൺരാജ്‌
മുന്‍ ചീഫ് സെക്രട്ടറിയും നിലവിൽ ഇൻസ്‌റ്റി‌റ്റ്യൂട്ട് ഓഫ് മാനേജ്‌മെന്റ് ഇൻ ഗവൺമെന്റ് (ഐഎംജി) ഡയറക്‌ടറുമായ കെ ജയകുമാറാണ്‌ തിരുവിതാംകൂർ ദേവസ്വം ബോർഡിന്റെ പുതിയ പ്രസിഡന്റ്‌. ഭരണമികവിനൊപ്പം, തുഞ്ചത്തെഴുത്തച്ഛൻ മലയാള സർവകലാശാലയുടെ വൈസ് ചാൻസലർ, കവി, ഗാനരചയിതാവ്, വിവർത്തകൻ, ചിത്രകാരൻ, തിരക്കഥാകൃത്ത് എന്നിങ്ങനെ വിവിധ മേഖലകളിൽ തിളങ്ങിയ വേറിട്ട വ്യക്തിത്വം. ഇ‍ൗ അനുഭവങ്ങളെല്ലാം പുതിയ ചുമതലയിൽ അദ്ദേഹത്തിന്‌ കരുത്താകുമെന്നുറപ്പ്‌. സ്ഥാനമേൽക്കാൻ പോകുന്ന ജയകുമാർ ദേശാഭിമാനിയോട്‌ സംസാരിക്കുന്നു. തയ്യാറാക്കിയത്‌: തിരുവനന്തപുരം ബ്യൂറോയിലെ റിപ്പോർട്ടർ വൈഷ്ണവ്‌ ബാബു
പുതിയ ഉത്തരവാദിത്വത്തെക്കുറിച്ച്‌
വലിയൊരു അവസരമായാണ്‌ കാണുന്നത്‌. മുൻകാലങ്ങളിൽ കൃത്യമായി സംസ്ഥാനത്തെ സേവിച്ച ഉദ്യോഗസ്ഥനെന്ന നിലയിലെ അനുഭവങ്ങൾ ദേവസ്വം ബോർഡിൽ പ്രയോജനപ്പെടുത്താനാകുമെന്നാണ്‌ പ്രതീക്ഷ. ബോർഡിനുകീഴിലുള്ള ക്ഷേത്രങ്ങളെ ഭംഗിയായി പരിപാലിക്കുക, വിശ്വാസികളുടെ പ്രശ്നങ്ങൾ പരിഹരിക്കുക, സംസ്ഥാന സർക്കാരുമായുള്ള ഭരണഘടനാപരമായ ഉത്തരവാദിത്വം നിർവഹിക്കുക തുടങ്ങിയവയാണ്‌ പ്രധാന ലക്ഷ്യം. ക്ഷേത്രങ്ങളിലെ ആചാരാനുഷ്ഠാനങ്ങളിൽ അനാവശ്യമായി ഇടപെടേണ്ട കാര്യം ബോർഡിനില്ല. എന്നാൽ, ആചാരമോ അനുഷ്ഠാനമോ മനുഷ്യവിദ്വേഷപരമോ ഭരണഘടനയ്ക്ക് വിരുദ്ധമോ ആണെങ്കിൽ ബോർഡ് ഇടപെടേണ്ടതുണ്ട്‌. എന്നുവച്ചാൽ വിശ്വാസികൾക്ക്‌ ബുദ്ധിമുട്ട്‌ ഉണ്ടാകാതെ സൗകര്യം ഒരുക്കുക എന്നതായിരിക്കും പ്രാഥമിക ഉത്തരവാദിത്വം.
ശബരിമല സ്പെഷ്യൽ ഓഫീസറായി പ്രവർത്തിച്ചിരുന്നല്ലോ? അതേക്കുറിച്ച്‌
ശബരിമല എനിക്ക്‌ അപരിചിതമായ സ്ഥലമല്ല. ആറു വർഷത്തോളം മാസ്റ്റർ പ്ലാൻ കമ്മിറ്റിയുടെ ചെയർമാനായും ശബരിമല സ്പെഷ്യൽ ഓഫീസറായും സേവനമനുഷ്ഠിച്ചിട്ടുണ്ട്‌. ശബരിമലയുടെ നടത്തിപ്പും ഭാവിയും വളരെ വിശദമായി പഠിച്ചു എന്ന പ്രതീക്ഷയുമുണ്ട്‌. അവിടുത്തെ പ്രായോഗിക ബുദ്ധിമുട്ടുകൾ, പ്രശ്നങ്ങൾ, സാധ്യതകൾ എന്നിവയെക്കുറിച്ച്‌ ധാരണയുണ്ട്‌. ദേവസ്വം ബോർഡിന്റെ ചുമതലയിലേക്ക് വരുമ്പോൾ ഈ അനുഭവം ഉപയോഗിച്ചുകൊണ്ട്‌, ഇപ്പോഴത്തെ അന്തരീക്ഷത്തിൽ ആളുകൾക്കിടയിലുള്ള ആശങ്കകൾ ഇല്ലാതാക്കാൻ ശ്രമിക്കും. ദേവസ്വം ബോർഡ് പ്രൊഫഷണൽ സംവിധാനമായിത്തന്നെ തുടരാനുള്ള പ്രവർത്തനങ്ങൾ ഏറ്റെടുക്കും. അഴിമതിയും കൊള്ളരുതായ്മകളും നടക്കാൻ അനുവദിക്കില്ല. എല്ലാ സ്ഥാപനത്തിലും കള്ളം ചെയ്യുന്ന ആളുകൾ ഉണ്ടായേക്കാം. പക്ഷേ, ഒരു സ്ഥാപനത്തിന്റെ മേന്മ എന്നത്‌ എത്ര ബുദ്ധിമാനാണെങ്കിലും കൊള്ളരുതായ്മ ചെയ്യാൻ സാധിക്കാത്ത സംവിധാനം ഉണ്ടാകണമെന്നതാണ്‌.
ചുമതലയേറ്റെടുത്ത ശേഷമുള്ള പ്രാഥമിക പ്രവർത്തനത്തെക്കുറിച്ച്‌
17ന്‌ ആരംഭിച്ച്‌ ജനുവരി 15ന്‌ സമാപിക്കുന്ന മണ്ഡലകാലം ഭംഗിയായി പൂർത്തിയാക്കുകയാണ്‌ പ്രാഥമിക ചുമതല. തീർഥാടകർക്ക്‌ ഒരു ബുദ്ധിമുട്ടുമുണ്ടാകില്ലെന്ന്‌ ഉറപ്പുവരുത്തും. സൗഹൃദപരവും സൗകര്യപ്രദവുമായ അന്തരീക്ഷമൊരുക്കും. ഇതൊന്നും അത്ര എളുപ്പമല്ലെന്നുമറിയാം. രാജ്യത്തിന്റെ വിവിധ ഭാഗങ്ങളിൽനിന്നുള്ള പതിനായിരക്കണക്കിന്‌ വിശ്വാസികളാണ്‌ എത്തുന്നത്‌. പല ഏജൻസികളാണ് അതിനകത്ത് ബന്ധപ്പെട്ടിരിക്കുന്നത്. ഇവരെയെല്ലാം ഒരേ മനസ്സോടെ കൊണ്ടുപോകാൻ സാധിക്കണം. വാട്ടർ അതോറിറ്റി, ഇലക്ട്രിസിറ്റി ബോർഡ്, പൊലീസ് തുടങ്ങി ശബരിമലയിൽ ബന്ധപ്പെടുന്ന എല്ലാവരുടെയും ലക്ഷ്യം ഒന്നായിരിക്കണം.
ദേവസ്വം ബോർഡ് പണം ചെലവഴിക്കുന്നതുമായി ബന്ധപ്പെട്ട്‌
ദേവസ്വം ബോർഡിൽ ഗവൺമെന്റിന്‌ പ്രധാന്യമേറിയ സ്ഥാനമാണുള്ളത്‌. മറ്റ് വകുപ്പുകളുമായിട്ടുള്ള സംയോജനത്തിന് ബോർഡിനെ സഹായിക്കാനും എല്ലാവരെയും ഒരുമിച്ചു കൊണ്ടുപോകുന്നതിനും ഗവൺമെന്റിന്‌ സാധിക്കുന്നുണ്ട്‌. ബോർഡിന്റെ ദൈനംദിന പ്രവർത്തനങ്ങളിലോ പണമിടപാട്‌ ഉൾപ്പെടെയുള്ള ആഭ്യന്തര കാര്യങ്ങളിലോ ഗവൺമെന്റ് ഒരിക്കലും ഇടപെടാറില്ല. ദേവസ്വം ബോർഡിന്റെ പണം സർക്കാർ ഖജനാവിലേക്ക്‌ പോകുന്നില്ല, പകരം ബോർഡിനെ സഹായിക്കുന്ന നിരവധി കാര്യങ്ങൾ ഗവൺമെന്റ് ചെയ്യുന്നുണ്ട്‌ എന്ന് നാം മനസ്സിലാക്കണം. ശബരിമല സമഗ്ര വികസന പ്രവർത്തനങ്ങൾ, ക്ഷേത്രങ്ങളിലെ അടിസ്ഥാന സ‍ൗകര്യങ്ങളുടെ മെച്ചപ്പെടുത്തൽ എന്നിവയ്ക്കൊക്കെ ഗവൺമെന്റിന്റെ പണം ചെലവഴിക്കുകയാണ്‌. ഇങ്ങനെയാണ്‌ ശബരിമലയിൽ ഓരോ മണ്ഡലകാലത്തും മികച്ച സ‍ൗകര്യങ്ങളൊരുക്കാൻ സാധിക്കുന്നത്‌.
ദേവസ്വം ബോർഡ് ചെലവഴിക്കുന്ന ഓരോ പൈസക്കും അതിന്റെ ഫലം ലഭിക്കുന്നുണ്ടെന്ന്‌ ഉറപ്പാക്കും. ഓരോ പദ്ധതികളും ആത്യന്തികമായി ഗുണമുള്ളതാണോ എന്ന് പരിശോധിച്ചുകൊണ്ടാണ്‌ തുടങ്ങുക. നിലവിൽ ഇതിനൊക്കെ കൃത്യമായ സംവിധാനം ശബരിമലയിലുണ്ട്‌. ടെൻഡർ വിളിക്കുകയും നിയമനടപടികൾ എല്ലാം പാലിച്ചുകൊണ്ടുമാണ്‌ പ്രവൃത്തികൾ നടത്തുന്നത്‌. അത് ആധികാരികമാണെന്നും കൃത്യതയോടെയാണെന്നും ഉറപ്പുവരുത്തും. ഏറെക്കാലത്തെ പരിചയംകൊണ്ട്‌ അതൊക്കെ ശ്രദ്ധിക്കാൻ കഴിയും എന്നാണ്‌ വിശ്വാസം.
ആഗോള അയ്യപ്പസംഗമത്തെക്കുറിച്ച്‌
ശബരിമലയുടെ സമഗ്ര വികസനം ലക്ഷ്യമിട്ടുള്ള ആഗോള അയ്യപ്പ സംഗമത്തിന്റെ മാസ്റ്റർ പ്ലാൻ കമ്മിറ്റിയുടെ ആദ്യ ചെയർമാനായി പ്രവർത്തിച്ചിട്ടുണ്ട്‌. സംഗമത്തിന്റെ പ്രാധാന്യവും അതിന്റെ ഭാവികാര്യങ്ങളെക്കുറിച്ചും പഠിക്കാൻ സാധിച്ചു. എല്ലാ വിശ്വാസികൾക്കും ഒത്തുചേരാനും തീർഥാടനത്തിന്റെ സുരക്ഷയെക്കുറിച്ചും സാധ്യതകളെക്കുറിച്ചും ചർച്ചചെയ്യാനായി. മാസ്റ്റർ പ്ലാൻ, പിൽഗ്രിം ടൂറിസം തുടങ്ങി സുപ്രധാന വിഷയങ്ങൾ വിശദമായി പ്രതിപാദിച്ചു. ഇനി ഇതിന്റെ പ്രവർത്തനത്തിലേക്ക്‌ പോകണം. ലോകമെമ്പാടുമുള്ള വിശ്വാസികൾക്ക്‌ ഇതിലൂടെ വലിയ ഗുണമുണ്ടാകുമെന്നാണ്‌ പ്രതീക്ഷ.
