ആയിരം 
നക്ഷത്രമുദിച്ചു ; അർജന്റീന ലോകകപ്പ്‌ ക്വാർട്ടറിലേക്ക്‌

Sunday Dec 4, 2022
image credit FIFA World Cup twitter

ദോഹ
ആയിരാമത്തെ മത്സരത്തിൽ മനോഹര ഗോൾ തൊടുത്ത്‌ ലയണൽ മെസി അർജന്റീനയെ ലോകകപ്പ്‌ ക്വാർട്ടറിലേക്ക്‌ നയിച്ചു. പൊരുതിക്കളിച്ച ഓസ്‌ട്രേലിയയെ  പ്രീക്വാർട്ടറിൽ  2–-1നാണ്‌ അർജന്റീന തോൽപ്പിച്ചത്‌. രണ്ടാമത്തെ ഗോൾ ജൂലിയൻ അൽവാരെസ്‌ നേടി. എൺസോ ഫെർണാണ്ടസിന്റെ പിഴവുഗോളിലാണ്‌ ഓസ്‌ട്രേലിയ വലകണ്ടത്‌.

ക്വാർട്ടറിൽ നെതർലൻഡ്‌സാണ്‌ അർജന്റീനയുടെ എതിരാളികൾ. ഈ മാസം ഒമ്പതിനാണ്‌ മത്സരം. ദേശീയ കുപ്പായത്തിലും ക്ലബ് തലത്തിലും ചേർന്നാണ്‌ മെസി ആയിരം മത്സരം പൂർത്തിയാക്കിയത്‌. 789 ഗോളും നേടി. അർജന്റീനയ്ക്കായി 169–-ാം മത്സരം. 94 ഗോൾ. ബാഴ്‌സലോണ കുപ്പായത്തിൽ 778, പിഎസ്‌ജിക്കായി 53. അർജന്റീന ക്യാപ്‌റ്റൻ കുപ്പായത്തിൽ നൂറാം മത്സരമായിരുന്നു മെസിക്ക്‌. കളിയുടെ 35–-ാം മിനിറ്റിലായിരുന്നു ഗോൾ. നിക്കോളാസ്‌ ഒട്ടമെൻഡി അവസരമൊരുക്കി. ഈ ലോകകപ്പിലെ മൂന്നാംഗോൾ.

അർജന്റീനയുടെ  രണ്ടാമത്തെ ഗോൾ ഓസ്‌ട്രേലിയൻ ഗോൾ കീപ്പർ മാറ്റ്‌ റ്യാന്റെ പിഴവിൽനിന്നായിരുന്നു. റോഡ്രിഗോ ഡി പോൾ ഓടിയെത്തിയപ്പോൾ റ്യാന്‌ നിയന്ത്രണം നഷ്ടമായി. ഈ തക്കത്തിൽ അൽവാരെസ്‌ പന്ത്‌ വലയിലേക്ക്‌ തൊടുത്തു. ഗോൾ വഴങ്ങാതെ മുന്നേറുകയായിരുന്ന മെസിയെയും കൂട്ടരെയും അവസാന ഘട്ടത്തിൽ ഓസ്‌ട്രേലിയ ഞെട്ടിച്ചു. ഗുഡ്--വിന്റെ ഷോട്ട്‌ എൺസോയുടെ ദേഹത്തുതട്ടി സ്വന്തം വലയിൽ പതിച്ചു. അവസാന ഘട്ടത്തിൽ പ്രതിരോധം പിടിച്ചുനിന്നു. ഗോൾകീപ്പർ എമിലിയാനോ മാർടിനെസിന്റെ പ്രകടനവും നിർണായകമായി.

നാലാം ലോകകപ്പ്‌ കളിക്കുന്ന മെസി, നോക്കൗട്ട്‌ ഘട്ടത്തിൽ നേടുന്ന ആദ്യ ഗോളായി ഇത്‌. അർജന്റീനയ്‌ക്കായി അവസാന എട്ടുകളിയിൽ 13–-ാം ഗോളായിരുന്നു മെസിയുടേത്‌. അർജന്റീനയ്‌ക്കായി ലോകകപ്പിൽ കൂടുതൽ ഗോൾ നേടിയ താരങ്ങളിൽ ദ്യേഗോ മാറഡോണയെയും മറികടന്നു. 22 കളിയിൽ ഒമ്പത്‌ ഗോളായി. പത്ത്‌ ഗോളുള്ള ഗബ്രിയേൽ ബാറ്റിസ്‌റ്റ്യൂട്ടയാണ്‌ ഒന്നാമത്‌.