‘ചിരിപ്പിക്കാനായ് ചെയ്ത സിനിമ’; ദേവദത്ത്‌ ഷാജി സംസാരിക്കുന്നു

ഹ്രസ്വചിത്രത്തിന്‌ യുട്യൂബിൽ കാഴ്ചക്കാർ കൂടാത്തതിൽ വിഷമിച്ചിരുന്ന സമയത്ത്‌ കൂട്ടുകാരന്റെ ഫോണിൽ  ആരോ ഒരാൾ ‘നന്നായി’ എന്ന സന്ദേശമയച്ചു. സ്‌ക്രീനിൽ തെളിഞ്ഞ പേര്‌ നോക്കിയപ്പോൾ ഞെട്ടി, ‘മമ്മുക്ക’.- തന്റെ സിനിമാ തുടക്കത്തെക്കുറിച്ച്‌ ദേവദത്ത്‌ ഷാജി ഒരിക്കൽ ഫെയ്‌സ്‌ബുക്കിൽ കുറിച്ചത്‌ ഇങ്ങനെയായിരുന്നു. ആ യാത്ര മലയാള സിനിമയിൽ ഭീഷ്‌മപർവത്തിന്റെ തിരക്കഥാകൃത്ത്‌ എന്ന മേൽവിലാസം നേടിക്കൊടുത്തു. ഇപ്പോഴത്‌ ഒന്നുകൂടി പുതുക്കി.
തിയറ്ററിൽ പ്രേക്ഷകരെ അടിമുടി ചിരിപ്പിച്ച്‌ ഹിറ്റിലേക്ക്‌ നീങ്ങുന്ന ‘ധീരൻ’ സിനിമയുടെ സംവിധായകൻ എന്നുകൂടിയായി വളർന്നു. സിനിമാവഴികളെക്കുറിച്ച്‌ ദേവദത്ത്‌ ഷാജി സംസാരിക്കുന്നു.
ജഡ്‌ജ്‌മെന്റ്‌ തെറ്റിയില്ല
സിനിമയ്‌ക്ക്‌ തിയറ്ററിൽനിന്ന്‌ നല്ല പ്രതികരണമാണ്‌. കൂടുതലും കുടുംബ പ്രേക്ഷകരാണ്‌ എത്തുന്നത്‌. കലയുടെ ഭംഗി പ്രവചനാതീതമാണ്‌. തിരക്കഥ എഴുതുമ്പോൾ എനിക്ക്‌ ചിരി വരുന്നതാണ്‌ ഞാൻ എഴുതിയത്‌. സിനിമ തിയറ്ററിലെത്തുമ്പോൾ അത്‌ വലിയ വിഭാഗം പ്രേക്ഷകരിലേക്കാണ്‌ എത്തുന്നത്‌. പലയിടത്തും ഞാൻ ഒട്ടും പ്രതീക്ഷിക്കാത്ത ഇടങ്ങളിൽ പൊട്ടിച്ചിരി ഉണ്ടായിട്ടുണ്ട്‌. ചിലയിടത്ത്‌ ചെറിയ ചിരിയാണ്‌ ഉണ്ടായത്‌. സിനിമയ്‌ക്ക്‌ നമുക്ക്‌ പ്രവചിക്കാൻ കഴിയാത്ത ഘടകമുണ്ട്‌. പടം തിയറ്ററിലെത്തിക്കുമ്പോൾ നമുക്ക്‌ ഒരുപാട്‌ ജഡ്‌ജ്‌മെന്റുകളുണ്ടാകും. എന്നാൽ, മാറ്റ്‌നി കഴിയുമ്പോഴാണ്‌ കൃത്യമായി അറിയാൻ കഴിയുക. ആ യാഥാർഥ്യം മനസ്സിൽവച്ചാണ്‌ സിനിമ റിലീസ്‌ ചെയ്‌തത്‌. ആദ്യ ഷോ കഴിഞ്ഞപ്പോൾത്തന്നെ നല്ല അഭിപ്രായം വന്നു. രസകരമായി കണ്ട്‌ ഇരിക്കാൻ പറ്റുന്ന സിനിമ എന്നാണ്‌ പൊതുവിൽ ലഭിച്ച പ്രതികരണം. ജഡ്‌ജ്‌മെന്റ്‌ തെറ്റിയില്ല എന്നതിൽ സന്തോഷമുണ്ട്‌.
തിയറ്ററിനായി ചെയ്‌ത സിനിമ
മൂന്നു വർഷമായി മനസ്സിലുള്ള കഥയാണ്‌ ധീരന്റേത്‌. ഒറ്റയ്‌ക്ക്‌ ഒരാൾക്ക്‌ സിനിമയെടുക്കാൻ കഴിയില്ലെന്ന്‌ വിശ്വസിക്കുന്ന ആളാണ്‌ ഞാൻ. കൂട്ടായ്‌മയിൽനിന്നാണ്‌ സിനിമ ഉണ്ടാകുക. പല സമയത്തും നമുക്ക്‌ ആശയക്കുഴപ്പവും നമ്മുടെ ധാരണകളിൽ പ്രശ്‌നവും ഉണ്ടാകും. ഒരു ടീമായി, സുഹൃത്തുക്കൾക്കും മറ്റുള്ളവർക്കും ഒപ്പം ചേരുമ്പോഴാണ്‌ അതെല്ലാം പരിഹരിക്കാൻ കഴിയുക. എന്തിനും ഒപ്പംനിൽക്കുന്ന പ്രൊഡക്‌ഷൻ കമ്പനിയും ഉണ്ടായിരുന്നു. ഇതെല്ലാം ഗുണം ചെയ്‌തു. ധീരൻ ആ നാട്ടുകാരുടെകൂടി കഥയാണ്‌. ധീരനാകാൻ ഞാൻ സമീപിക്കുന്ന അഞ്ചാമത്തെ ആളാണ്‌ രാജേഷ്‌ മാധവൻ. ധീരൻ തിയറ്ററിനുവേണ്ടിത്തന്നെ ചെയ്‌ത സിനിമയാണ്‌. ബജറ്റ്‌ തിരിച്ചുപിടിക്കണം. ലാഭം കിട്ടണമെന്ന്‌ ഉദ്ദേശിച്ചുതന്നെയാണ്‌ ചെയ്‌തത്‌.
തിരക്കഥയെഴുത്ത്‌
ഭീഷ്‌മപർവത്തിന്റെ ‘Godfather meets Mahabharata’ എന്നത്‌ അമൽ നീരദിന്റെ മനസ്സിലുണ്ടായിരുന്ന ആശയമാണ്‌. അത്‌ എഴുതാൻ അദ്ദേഹം പറഞ്ഞതാണ്‌. പലരും എഴുത്തിന്റെ ഭാഗമായിട്ടുണ്ട്‌. ഒരുപാട്‌ കൊടുക്കൽ വാങ്ങലുകൾ നടന്നാണ്‌ തിരക്കഥ ഉണ്ടാകുന്നത്‌. കോവിഡിന്റെ ആദ്യ ലോക്‌ഡൗൺ സമയത്താണ്‌ എഴുത്ത്‌ നടന്നത്‌. അതേസമയം ധീരൻ ഒറ്റയ്‌ക്ക്‌ എഴുതിയ തിരക്കഥയാണ്‌. ചുറ്റുമുള്ള സുഹൃത്തുക്കൾ, സ്‌നേഹിതർ അവരുമായുള്ള കൂട്ടായ ചർച്ചകൾ അതിലൂടെയെല്ലാമാണ്‌ പൂർത്തിയാക്കിയത്‌.
സെമി റിയലിസ്റ്റിക്‌
മഹേഷിന്റെ പ്രതികാരം ഇറങ്ങിയ സമയത്ത്‌ വളരെ റിയലിസ്റ്റിക്കായ സിനിമകൾ അതിന്റെ ചുവടുപിടിച്ച്‌ ഉണ്ടായി. ധീരൻ സെമി റിയലിസ്റ്റിക്‌ സിനിമയാണ്‌. കഥാപാത്രങ്ങളും അവരുടെ പെരുമാറ്റവുമെല്ലാം അതുപോലെയാണ്‌. സംഭവങ്ങളും സാഹചര്യങ്ങളും പോലെയാണ്‌ ആദ്യം എഴുതിയത്‌. പിന്നെയാണ്‌ കഥയിലേക്ക്‌ എത്തിയത്‌. 11–-ാം വയസ്സിൽ നാടിന്റെ ധീരനായ ഒരാൾ, പിന്നീട്‌ അയാൾക്ക്‌ സംഭവിക്കുന്നതാണ്‌ സിനിമ. എല്ലാ കഥാപാത്രങ്ങളെയും ആദ്യം പ്ലേസ്‌ ചെയ്‌തു. അതിലേക്ക്‌ അവരുടെ ബാക്ക്‌ സ്‌റ്റോറി കൊടുത്ത്‌ വികസിപ്പിക്കുകയാണ്‌ ചെയ്‌തത്‌.
സാങ്കേതികത
പ്രേക്ഷകർ എല്ലാതരം സിനിമകളും കാണുന്നവരാണ്‌. ഒടിടിയിൽ ഇതര ഭാഷ സിനിമകളെല്ലാം അവർ കാണുന്നുണ്ട്‌. അവർ വളരെയധികം അപ്ഡേറ്റഡുമാണ്‌. അവരുടെ പ്രതീക്ഷകൾക്ക്‌ മുകളിൽ എന്ത്‌ കൊടുക്കാൻ കഴിയുമെന്നാണ്‌ നോക്കേണ്ടത്‌. ആർട്ട്‌ വർക്കും സൗണ്ട്‌ ഡിസൈനുമൊക്കെ ആ രീതിയിൽ ധീരനിൽ ഉപയോഗിച്ചിട്ടുണ്ട്‌. ഒരിക്കലും പ്രേക്ഷകരെ കുറച്ചു കാണരുത്‌. അത്രയും പരിശ്രമം നമ്മൾ എടുക്കണം. ചിരിപ്പിക്കുകയെന്ന പ്രധാന ഉദ്ദേശ്യത്തോടെ തന്നെയാണ്‌ ധീരൻ എടുത്തത്‌. ചിരിയിലൂടെ മാത്രമല്ലാതെയും ഇംപാക്ട്‌ ഉണ്ടാക്കാൻ ശ്രമിച്ചിട്ടുണ്ട്‌.
ഹ്രസ്വ ചിത്രം
2013ൽ എൻജിനിയറിങ്‌ ആദ്യ സെമസ്റ്ററിന്റെ ബ്രേക്കിലാണ്‌ ആദ്യ ഹ്രസ്വ ചിത്രം ചെയ്യുന്നത്‌. ഒരു സെമസ്റ്റർ ബ്രേക്കിൽ ഒരു ഹ്രസ്വ ചിത്രം എന്നതായിരുന്നു ഐഡിയ. എട്ട്‌ സെമസ്റ്റർ ബ്രേക്കിൽ എട്ട്‌ ഹ്രസ്വചിത്രം ചെയ്യണം എന്നായിരുന്നു മനസ്സിലുണ്ടായിരുന്നത്‌. അതിൽ പുറത്തു കാണിക്കാൻ തോന്നിയത്‌ ‘എന്റെ സ്വന്തം കാര്യം’ മാത്രമാണ്‌. അത്‌ കണ്ടാണ്‌ ദിലീഷ്‌ പോത്തൻ വിളിക്കുന്നത്‌. അദ്ദേഹം നിർമിച്ച കുമ്പളങ്ങി നൈറ്റ്‌സിൽ സംവിധാന സഹായിയായി. അമൽ നീരദിന്‌ ഹ്രസ്വ ചിത്രം കാണിച്ച്‌ കൊടുക്കുന്നതും ദിലീഷേട്ടനാണ്‌. അങ്ങനെയാണ്‌ ഭീഷ്‌മപർവത്തിൽ അവസരം കിട്ടിയത്‌. അതുവഴിയാണ്‌ ധീരൻ സാധ്യമായത്‌.
സംവിധാനം
അച്ഛൻ ഷാജി സരിഗയ്‌ക്ക്‌ കൊച്ചിൻ രസിക എന്ന മിമിക്‌സ്‌ ട്രൂപ്പും കൊച്ചിൻ സംഘവേദി എന്ന നാടക ട്രൂപ്പും ഉണ്ടായിരുന്നു. ചെറുപ്പംമുതൽ നാടകങ്ങളും സ്‌റ്റേജ്‌ പരിപാടികളും അച്ഛന്റെ ഒപ്പം പോയി കാണുന്ന ഓർമയുണ്ട്‌. 2004ൽ ഇ കെ നായനാരുടെ ജീവിതാവിഷ്‌കാരമായിട്ടുള്ള ‘ജനനായകൻ’ നാടകമൊക്കെ അച്ഛന്റെ സംഘാടനത്തിൽ വന്നതാണ്‌. ചെറുപ്പം തൊട്ട്‌ ചെറുകഥ എഴുതുമായിരുന്നു. 12–-ാം ക്ലാസിൽ പഠിക്കുമ്പോൾ ചെറുകഥാസമാഹാരം എഴുതി. കഥ, തിരക്കഥ, സംഭാഷണം, സംവിധാനം എന്നത്‌ അങ്ങനെ മനസ്സിൽ കയറിയതാണ്‌. ബേസിൽ ജോസഫ്‌ ഹ്രസ്വ ചിത്രം ചെയ്‌ത്‌ സ്റ്റാറായി നിൽക്കുന്ന കാലമാണ്‌. ഡിഎസ്‌എൽആറുമായി ഇറങ്ങുന്നു. ഏറ്റവും ഇഷ്ടമുള്ള ജോണർ തമാശയാണ്‌. തമാശ പടങ്ങളോട്‌ താൽപ്പര്യം. അമൽ സാർ എഴുതി നോക്കാൻ പറഞ്ഞപ്പോൾ സാറിന്റെ ശ്രമത്തിന്റെ ഭാഗമായായി എഴുതിയതാണ്‌ ഭീഷ്‌മപർവം. അതിന്റെ  കാര്യങ്ങൾ 2‐3 വർഷം എടുത്തു. പടം ഇറങ്ങി കഴിഞ്ഞപ്പോൾ,  പിന്നീട്‌ ആ ജോണറിനോട്‌ ഇഷ്ടം തോന്നി. അടുത്തത്‌ എഴുതുന്നത്‌ ബി ഉണ്ണികൃഷ്ണനുവേണ്ടിയാണ്‌. അത്‌ കുടുംബ പശ്ചാത്തലത്തിലുള്ള ആക്‌ഷൻ ചിത്രമാണ്‌.