തൊഴിലാളി–കർഷക സഖ്യം കരിനിയമങ്ങളെ ചെറുക്കും

ഏറ്റവുമധികം തൊഴിൽരഹിതരുള്ള രാജ്യമാണ്‌ ഇന്ത്യ. ഇന്ത്യയിലെ നിർവചനമനുസരിച്ച്‌ ആഴ്‌ചയിൽ ഒരുമണിക്കൂറെങ്കിലും തൊഴിലുള്ളയാൾ തൊഴിൽരഹിതനല്ല. ഇത്ര ഉദാരമായി കണക്കാക്കിയിട്ടുപോലും 2024–-25ൽ നാലുകോടിയോളം ആളുകൾക്ക്‌ തൊഴിലുണ്ടായിരുന്നില്ല എന്നാണ്‌ പീരിയോഡിക്‌ ലേബർ ഫോഴ്‌സ്‌ സർവേയുടെ കണ്ടെത്തൽ. അപ്പോൾ ഒരുവർഷം പകുതിദിവസംപോലും തൊഴിൽ ലഭിക്കാത്തവരുടെ എണ്ണം ഇതിന്റെ പലമടങ്ങ്‌ വരുമെന്നുറപ്പ്‌. അതായത്‌ 95 ശതമാനം രാജ്യങ്ങളിലെ ജനസംഖ്യയേക്കാൾ അധികമായിരിക്കും ഇന്ത്യയിലെ തൊഴിൽരഹിതരുടെ എണ്ണം. ഇത്ര ഭീകരമായ തൊഴിലില്ലായ്‌മയുടെ ഗുണഭോക്താക്കൾ രാജ്യത്തിനകത്തും പുറത്തുമുള്ള മുതലാളിമാർമാത്രമാണ്‌. വളരെ തുച്ഛമായ കൂലിക്ക്‌ തൊഴിലാളികളെ കിട്ടുന്ന അവർക്ക്‌ കേന്ദ്രസർക്കാർ വീണ്ടും നൽകുന്ന സമ്മാനമാണ്‌ കഴിഞ്ഞയാഴ്‌ച പ്രാബല്യത്തിലായ നാലു പുതിയ ലേബർ കോഡുകൾ. ഇന്ത്യൻ മുതലാളിമാരുടെ പ്രതികരണങ്ങളിൽനിന്ന്‌ അത്‌ വ്യക്തമാണ്‌. അത്‌ മനസ്സിലാക്കി ഇന്ത്യൻ തൊഴിലാളിവർഗം കർഷക ജനസാമാന്യത്തിന്റെ പിന്തുണയോടെ നടത്തുന്ന പുതിയ പോരാട്ടത്തിനാണ്‌ ബുധനാഴ്‌ച തുടക്കമായത്‌.

ഉജ്വലമായ സമരപാരമ്പര്യമുള്ള ഇന്ത്യൻ തൊഴിലാളികൾ കേന്ദ്രസർക്കാർ അടിച്ചേൽപ്പിച്ച കരിനിയമങ്ങളെ ചെറുത്തുതോൽപ്പിക്കുമെന്ന്‌ ഞങ്ങൾ രണ്ടുദിവസംമുമ്പ്‌ മുഖപ്രസംഗത്തിൽ മുന്നറിയിപ്പ്‌ നൽകിയിരുന്നു. യഥാർഥത്തിൽ ബുധനാഴ്‌ച രാജ്യവ്യാപകമായി നടന്ന തൊഴിലാളി–-കർഷക പ്രക്ഷോഭം, ലേബർ കോഡുകൾ നടപ്പാക്കുന്നതായി പ്രഖ്യാപിക്കുന്നതിന്‌ മാസങ്ങൾക്കുമുമ്പ്‌ തീരുമാനിച്ചതാണ്‌. എന്നാൽ, വൻകിട മുതലാളിമാരെ പ്രീണിപ്പിക്കുന്നതിന്‌ മോദിസർക്കാർ അഞ്ചുവർഷംമുമ്പ്‌ പാസാക്കിയ തൊഴിലാളിവിരുദ്ധ നിയമങ്ങൾ, ഇപ്പോൾ മുന്നറിയിപ്പില്ലാതെ നടപ്പാക്കാൻ തീരുമാനിച്ചപ്പോൾ പ്രക്ഷോഭത്തിന്‌ പുതിയ മാനം കൈവരികയായിരുന്നു. തൊഴിലാളിവർഗത്തിന്റെ പിന്തുണയോടെ കർഷകർ മോദിസർക്കാരിന്റെ കർഷകദ്രോഹ നിയമങ്ങളെ ചെറുത്തുതോൽപ്പിച്ചതിന്റെ അഞ്ചാംവാർഷികത്തോടനുബന്ധിച്ച്‌ നിശ്ചയിച്ചിരുന്ന പോരാട്ടം അങ്ങനെ മറ്റൊരു മഹാപ്രക്ഷോഭത്തിന്‌ നാന്ദിയായിരിക്കുകയാണ്‌. പുതിയ ലേബർ കോഡുകൾ ചുട്ടുകരിച്ചും കർഷകർക്ക്‌ സർക്കാർ നൽകിയ വാഗ്ദാനങ്ങൾ നടപ്പാക്കണമെന്ന്‌ ആവശ്യപ്പെട്ടും രാജ്യതലസ്ഥാനത്തും സംസ്ഥാനങ്ങളുടെയും ജില്ലകളുടെയും ഭരണ ആസ്ഥാനങ്ങളിലും ഉയർന്ന പ്രതിഷേധം, ജനങ്ങളെ വർഗീയമായി ഭിന്നിപ്പിച്ച്‌ കോർപറേറ്റ്‌ മുതലാളിത്ത സേവ നടപ്പാക്കുന്ന ബിജെപി സർക്കാരിന്‌ താക്കീതാണ്‌.

ബ്രിട്ടീഷ്‌ ഭരണകാലത്തും സ്വാതന്ത്ര്യാനന്തരവും ഇന്ത്യൻ തൊഴിലാളിവർഗം പോരാടി നേടിയ അവകാശങ്ങളുടെ സാക്ഷ്യമായ 29 തൊഴിൽനിയമങ്ങൾ ഇല്ലാതാക്കിക്കൊണ്ടാണ്‌ നാല്‌ ലേബർ കോഡുകൾ ബിജെപി സർക്കാർ 2019, 2020 വർഷങ്ങളിൽ പാർലമെന്റിൽ പാസാക്കിയത്‌. തോന്നിയപോലെ തൊഴിലാളികളെ പിരിച്ചുവിടാനും കമ്പനികൾ പൂട്ടാനും മുതലാളിമാരെ അനുവദിക്കുന്ന കോഡുകളെ സഭയിൽ എതിർക്കാൻ സിപിഐ എം അടക്കം ഇടതുപക്ഷ പാർടികൾമാത്രമാണ്‌ ഉണ്ടായത്‌. പാർലമെന്റ്‌ പാസാക്കിയെങ്കിലും പുറത്ത്‌ തൊഴിലാളിസംഘടനകളുടെ ചെറുത്തുനിൽപ്പിന്റെയും കർഷകപ്രക്ഷോഭവിജയത്തിന്റെയും സാഹചര്യത്തിൽ കോഡുകൾ നടപ്പാക്കാൻ കേന്ദ്രസർക്കാർ അനുകൂലസാഹചര്യത്തിന്‌ കാക്കുകയായിരുന്നു. ബിഹാറിൽ ബിജെപിസഖ്യം വഴിവിട്ട മാർഗങ്ങളിലൂടെ നേടിയ വൻ തെരഞ്ഞെടുപ്പുവിജയമാണ്‌, ഇനി എന്തും ചെയ്യാമെന്ന അഹങ്കാരത്തിലേക്ക്‌ സർക്കാരിനെ നയിച്ചത്‌. രാജ്യത്തിന്റെ യഥാർഥ സ്ഥിതി വ്യക്തമാക്കുന്ന കണക്കുകൾ മറച്ചുവച്ചാണ്‌ മോദിസർക്കാർ കഴമ്പില്ലാത്ത അവകാശവാദങ്ങൾ ഉയർത്തി ഇത്തരത്തിൽ പല ‘പരിഷ്‌കാര’ങ്ങളും നടപ്പാക്കുന്നത്‌. നാഷണൽ സാമ്പിൾ സർവേ ഓർഗനൈസേഷന്റെ അവസാന റിപ്പോർട്ട്‌ 2017–-18ൽ നടത്തിയ സർവേയുടേതാണ്‌. അതുപോലും ഇതുവരെ പുറത്തുവിട്ടിട്ടില്ല. സർക്കാരിന്റെയും മുതലാളിമാരുടെയും തൊഴിലാളികളുടെയും പ്രതിനിധികളടങ്ങുന്ന ഇന്ത്യൻ ലേബർ കോൺഫറൻസ്‌ 10 വർഷമായി വിളിച്ചുചേർത്തിട്ടില്ല. 1942നും 2015നും ഇടയിൽ 46 തവണ ചേർന്നിട്ടുള്ളതാണ്‌ ഈ ത്രികക്ഷി സംവിധാനം.

​ഈ സാഹചര്യത്തിലാണ്‌ അധ്വാനിക്കുന്ന ജനവിഭാഗങ്ങളുടെ അവകാശങ്ങൾ കവർന്നെടുക്കുന്നതിനെ കാണേണ്ടത്‌. കോൺഗ്രസിനേക്കാൾ മുതലാളിത്ത പക്ഷപാതമുള്ള ആർഎസ്‌എസിന്‌ നിർണായക സ്വാധീനമുണ്ടായിരുന്ന ജനതാസർക്കാരാണ്‌ 1978ൽ കുപ്രസിദ്ധമായ വ്യവസായബന്ധ നിയമത്തിലൂടെ തൊഴിലാളികളുടെ അവകാശങ്ങൾ കവരാൻ ആദ്യശ്രമം നടത്തിയത്‌ എന്ന്‌ ഈ സന്ദർഭത്തിൽ ഓർക്കാവുന്നതാണ്‌. ഇന്ത്യൻ മുതലാളിത്തത്തിന്റെ ആസ്ഥാനമായ മുംബൈയിലെ വ്യവസായലോബിയുടെ വിശ്വസ്‌തസേവകനായിരുന്ന മൊറാർജി ദേശായിയുടെ സർക്കാരിന്റെ കരിനിയമത്തെ തൊഴിലാളികൾ യോജിച്ച പോരാട്ടത്തിലൂടെ ചെറുത്തുതോൽപ്പിക്കുകയായിരുന്നു. തുടർന്നിങ്ങോട്ട്‌ 47 വർഷത്തിനിടെ, വിശേഷിച്ച്‌ 1991ൽ കോൺഗ്രസ്‌ സർക്കാർ ആരംഭിച്ച നവ ഉദാരനയങ്ങളുടെ മറവിൽ, കൊണ്ടുവന്ന പല ജനവിരുദ്ധനിയമങ്ങൾക്കും എതിരായ പോരാട്ടത്തിന്‌ നേതൃത്വം നൽകിയവരാണ്‌ ഇന്ത്യയിലെ തൊഴിലാളികൾ. കർഷകരടക്കമുള്ള ബഹുജനങ്ങളുടെ പിന്തുണയോടെ ലേബർ കോഡുകളെയും അവർ പരാജയപ്പെടുത്തും.