കേരളം കുതിക്കും, മലബാർ അന്താരാഷ്ട്ര തുറമുഖത്തിലൂടെ

കണ്ണൂർ

ഉത്തരകേരളത്തിന്റെ വികസനക്കുതിപ്പിന്‌ ഗതിവേഗം പകരുന്നതാകും മലബാർ അന്താരാഷ്ട്ര തുറമുഖം. വിഴിഞ്ഞം കഴിഞ്ഞാൽ സംസ്ഥാനത്ത്‌ ഏറ്റവുമധികം നിക്ഷേപവും വികസനവും സാധ്യമാക്കുന്ന തരത്തിലാണ്‌ എൽഡിഎഫ്‌ സർക്കാർ മലബാർ അന്താരാഷ്ട്ര തുറമുഖ പദ്ധതി വിഭാവനം ചെയ്‌തിട്ടുള്ളത്‌. വിവിധതലത്തിലുള്ള പ്രാരംഭ പ്രവർത്തനങ്ങൾ നടക്കുന്നതിനൊപ്പം സർക്കാർ തലത്തിലുള്ള നടപടിക്രമങ്ങളും വേഗത്തിലായതോടെ 2026ൽതന്നെ നിർമാണം തുടങ്ങുന്നതിന്‌ വഴിയൊരുങ്ങി. 2031ൽ ഒന്നാംഘട്ടം പൂർത്തിയാക്കുംവിധമാണ് മലബാർ ഇന്റർനാഷണൽ പോർട്ട് ആൻഡ് സെസ് ലിമിറ്റഡിന്റെ രൂപകൽപ്പന. തുറമുഖത്തിന്‌ 14 മീറ്ററാണ് ആഴമുണ്ടാകുക. മൂന്നര കിലോമീറ്റർ പുലിമുട്ടാണ്‌ ആദ്യഘട്ടത്തിൽ ലക്ഷ്യമിടുന്നത്‌. അരക്കിലോമീറ്റർ ബർത്ത് ആദ്യഘട്ടത്തിലൊരുങ്ങും. രണ്ടാംഘട്ടത്തിൽ ഇത്‌ വർധിപ്പിക്കും. വ്യാവസായിക അനുബന്ധ സ‍ൗകര്യങ്ങൾ ഒരുക്കുന്നതിനും ആദ്യഘട്ടത്തിൽതന്നെ പദ്ധതിയുണ്ട്‌. ആദ്യഘട്ടത്തിൽ 3,742 കോടി രൂപയാണ് പദ്ധതിച്ചെലവ്. രണ്ടാംഘട്ടത്തിന് 375 കോടിയും മൂന്നാംഘട്ടത്തിന് 930 കോടിയും ചെലവാകും. ആകെ 5,047 കോടി രൂപ. തുടക്കത്തിൽ 5,000 കണ്ടെയ്നർ വഹിക്കാൻ ശേഷിയുള്ള കപ്പലുകൾക്ക് ഇവിടെ അടുപ്പിക്കാനുള്ള സ‍ൗകര്യങ്ങളാണ്‌ ഒരുക്കുക. നാലുവർഷത്തിനുള്ളിൽ പ്രതിവർഷം 300 കപ്പലും 12 വർഷത്തിനുള്ളിൽ 850 കപ്പലും കൈകാര്യംചെയ്യാനാകുന്ന തരത്തിലാണ്‌ പദ്ധതി വിഭാവനം ചെയ്യുന്നത്‌. ചരക്കുനീക്കം സാധ്യമാക്കുന്ന ഗേറ്റ് വേ തുറമുഖമാകുന്നതോടെ ബ്രേക്ക് ബൾക്ക് ചരക്ക്‌, പെട്രോളിയംപോലുള്ള ദ്രാവക ചരക്ക്‌, കണ്ടെയ്നർ എന്നിവയും കൈകാര്യംചെയ്യാനാകും. മലബാർ അന്താരാഷ്ട്ര തുറമുഖം പൂർണതോതിൽ പ്രവർത്തന സജ്ജമാകുന്നതോടെ പ്രതിവർഷം 51 ശതമാനം വിദേശ കയറ്റിറക്കുമതിയും 49 ശതമാനം ആഭ്യന്തര ചരക്കുനീക്കവും സാധ്യമാകും. തുറമുഖാധിഷ്ഠിത വ്യവസായങ്ങളും ഇതോടനുബന്ധിച്ച് വളർച്ച പ്രാപിക്കും. തീരദേശസാമ്പത്തിക മേഖലയും അഭിവൃദ്ധിപ്പെടും. ഉന്നതനിലവാരമുള്ള റോഡുകൾ, സംഭരണശാലകൾ, ലോജിസ്റ്റിക്സ് തൊഴിലവസരങ്ങൾ, ഹോട്ടൽ, വലിയ കണ്ടെയ്നർ വാഹനങ്ങളുടെ റിപ്പയറിങ്‌ തുടങ്ങിയ മേഖലകളിലെ വളർച്ച എന്നിവ തുറമുഖത്തിന്റെ നേട്ടങ്ങളാണ്. തുറമുഖത്തിനൊപ്പം അനുബന്ധ വ്യവസായ വളർച്ചകൂടി ലക്ഷ്യമിടുന്ന പദ്ധതിയിൽ പ്രത്യേക സാമ്പത്തിക മേഖല രൂപീകരിക്കുന്നതിനായി വെളിയംപറമ്പിൽ 475 ഏക്കറും പനയത്താംപറമ്പിൽ 500 ഏക്കറും ഭൂമി ഏറ്റെടുക്കുന്ന നടപടികൾ അവസാനഘട്ടത്തിലാണ്. തുറമുഖത്തിന്റെ അനുബന്ധമായുള്ള പ്രത്യേക വ്യാവസായിക മേഖലയിൽ 3,000 കോടിയുടെ നിക്ഷേപസാധ്യതയുമുണ്ട്‌. കേന്ദ്രസർക്കാരിന്റെ പരിസ്ഥിതി അനുമതി ലഭിച്ചാലുടൻ പദ്ധതി പ്രവൃത്തി ആരംഭിക്കാനാണ്‌ സർക്കാർ തീരുമാനം.