പായത്തെ വിറപ്പിച്ച്‌ കാട്ടാനകൾ

ഇരിട്ടി

ആറളംപുഴ കടന്നെത്തിയ രണ്ട് കാട്ടുകൊമ്പന്മാർ പായത്തെ മണിക്കൂറുകളോളം ആശങ്കയിലാഴ്‌ത്തി. വനാതിർത്തിയിൽനിന്ന്‌ 20 കിലോമീറ്റർ അകലെ പായം പഞ്ചായത്തിലെ പായം, കരിയാൻ, ജബ്ബാർ കടവ്, വട്ട്യറ ഗ്രാമങ്ങളാണ്‌ രണ്ട് കൊമ്പന്മാരുടെ സാന്നിധ്യത്തിൽ വ്യാഴം പകൽ മുഴുവൻ ഭീതിയിലാക്കിയത്‌. നൂറുപേരുൾപ്പെട്ട വനപാലകസംഘം 12 മണിക്കൂർ നടത്തിയ ശ്രമഫലമായി ആനകളെ കാടുകയറ്റാനായി. മൂന്ന് പഞ്ചായത്തുകളിലെ ഏഴ് വാർഡുകളിൽ നിരോധനാജ്ഞ പ്രഖ്യാപിച്ചും പ്രദേശത്തെ സ്‌കൂളുകൾക്ക് അവധി നൽകിയും റോഡുകൾ അടച്ചും ഇടതടവില്ലാതെ ഉച്ചഭാാഷിയിൽ മുന്നറിയിപ്പ്‌ നൽകിയും ഒരുക്കിയ സുരക്ഷയിലാണ്‌ ആനകളെ തുരത്തിയത്‌. ഇതിനിടയിൽ സ്കൂട്ടിയിൽ എത്തിയ പയഞ്ചേരിയിലെ സനീഷ്‌ ആനക്ക്‌ മുന്നിൽ പെട്ടു. ഓടിരക്ഷപ്പെടുന്നതിനിടെ വീണ്‌ പരിക്കേറ്റു. പേരാവൂർ ഡിവൈഎസ്‌ പിയുടെ നേതൃത്വത്തിൽ ഇരിട്ടി, ആറളം, മുഴക്കുന്ന് സ്‌റ്റേഷനുകളിലെ പൊലീസുകാരും വനം അസിസ്റ്റന്റ് കൺസർവേറ്ററുടെ നേതൃത്വത്തിൽ ആറളം, കൊട്ടിയൂർ, കണ്ണവം, തളിപ്പറമ്പ് റെയിഞ്ചുകളിലെ വനപാലകരും സണ്ണിജോസഫ് എംഎൽഎ, പായം പഞ്ചായത്ത് പ്രസിഡന്റുമാരുടെ നേതൃത്വത്തിൽ ജനപ്രതിനിധികളും ഇരിട്ടി തഹസിൽദാരുടെ നേതൃത്വത്തിൽ റവന്യു സംഘവും പ്രദേശത്ത് തമ്പടിച്ച് കാട്ടാനയെ തുരത്താൻ മുന്നിട്ടിറങ്ങി. പടക്കങ്ങൾ പൊട്ടിച്ചെങ്കിലും പലപ്പോഴും ആന വനപാലകർക്ക് നേരെ പാഞ്ഞടുത്തു. പുലർച്ചെ ആറിന്‌ ദേശാഭിമാനി ഏജന്റ്‌ കെ രമേശനാണ് ആദ്യം ആനയുടെ സാന്നിധ്യമറിഞ്ഞത്‌. കാഴ്ചപരിമിതിയുള്ള രമേശന് ആനയെ നേരിട്ടുകാണാൻ പറ്റിയില്ല. ആന മരക്കൊമ്പ്‌ അടർത്തുന്ന ഒച്ച കേട്ട്‌ സമീപത്തെ വീട്ടിലെത്തി വിവരമറിയിച്ചു. വീട്ടുകാർ നോക്കിയപ്പോൾ പറമ്പിൽ ആനയെ കണ്ടു. നാട്ടുകാരുടെ തിരച്ചിലിൽ രണ്ടാമത്തെ കൊമ്പനെയും കണ്ടെത്തി. വനം, പൊലീസ്‌ അധികൃതരെ അറിയിച്ചു. രാവിലെ ഒമ്പതോടെ പായം ജിയുപി സ്‌കൂളിന് അവധി നൽകി. കാട്ടാനയെ തുരത്താനും ആരംഭിച്ചു. പടക്കം പൊട്ടിച്ചപ്പോൾ ആനകൾ രണ്ട് വഴിക്കായി. ഒന്നിനെ പായം സ്‌കൂളിനടുത്ത പഴശ്ശി പദ്ധതിയുടെ അക്കേഷ്യ മരങ്ങൾക്കിടയിൽ നിർത്തി നിരീക്ഷണമേർപ്പെടുത്തി. രണ്ടാമത്തെ ആനയെ എരുമത്തടത്തിലെ റബർ തോട്ടത്തിൽ നിലയുറപ്പിച്ചു. തുരത്താനുള്ള നീക്കം ഉച്ചവരെ പലതവണ പരാജയപ്പെട്ടു. കരിയാൽ ടൗണിനടുത്ത ഇലവുങ്കൽ ബിനോയിയുടെ വീടിനടുത്ത്‌ എത്തിയ കാട്ടാന വീണ്ടും റബർ തോട്ടത്തിലേക്ക്‌ പാഞ്ഞു. പകൽ ഒന്നോടെ തുരത്തൽ ദൗത്യം നിർത്തി. പിന്നീട്‌ പകൽ മൂന്നിന്‌ ആനയെ തുരുത്തൽ പുനരാരംഭിച്ചു. വൈകിട്ട്‌ ആറരയോടെ ആനകളെ കാടുകയറ്റി.