രാഹുൽ ബ്ലോക്കിൽ 
കുടുങ്ങി യുഡിഎഫ്‌

കണ്ണൂർ

തദ്ദേശ തെരഞ്ഞെടുപ്പിന്റെ പ്രചാരണം മധ്യഘട്ടത്തിലെത്തുന്പോൾ, രാഹുൽബ്ലോക്കിൽപ്പെട്ട്‌ ജില്ലയിലെ യുഡിഎഫ്‌ സംവിധാനം. കോർപറേഷനിലടക്കം വിമതരുടെ എതിർപ്പിൽ വലയുന്ന കോൺഗ്രസിന്‌, രാഹുൽവിഷയത്തിൽ കെ സുധാകരനെടുത്ത പരസ്യമായ നിലപാട്‌ വലിയ തിരിച്ചടിയായി. പ്രചാരണത്തിലടക്കം ഇതുണ്ടാക്കിയ പിന്നോട്ടടിയിൽ മുസ്ലിംലീഗിന്‌ വലിയ അമർഷമുണ്ട്‌. സ്‌ത്രീപീഡനക്കേസിൽ പൊലീസ്‌ അന്വേഷിക്കുന്ന രാഹുൽ മാങ്കൂട്ടത്തിലിനെ പരസ്യമായി ന്യായീകരിച്ച മുതിർന്ന നേതാക്കളിൽ പ്രധാനി കെ സുധാകരനാണ്‌. വീട്ടമ്മമാരോടും മറ്റും വീടുകയറി വോട്ടുചോദിക്കുന്ന യുഡിഎഫ്‌ പ്രവർത്തകർക്ക്‌ വലിയ നാണക്കേടാണ്‌ സുധാകരന്റെ പ്രസ്‌താവനയുണ്ടാക്കിയത്‌. അതറിഞ്ഞാണ്‌ രാജ്‌മോഹൻ ഉണ്ണിത്താൻ വെള്ളി രാവിലെതന്നെ രാഹുലിനെതിരെ പൊട്ടിത്തെറിച്ചത്‌. കോൺഗ്രസിന്റെ ഉൾപ്പാർട്ടി പ്രശ്‌നത്തിൽ റോളെടുക്കാനാണ്‌ ഉണ്ണിത്താൻ ഇ‍ൗ നിലപാട്‌ എടുത്തതെങ്കിലും, ഫലത്തിൽ കണ്ണൂരിലെ സുധാകരൻ അനുയായികളെ ഇത്‌ വിറളിപിടിപ്പിച്ചിട്ടുണ്ട്‌. റിബലുകളുടെ ബാഹുല്യത്താലും സംഘടനാ പ്രശ്‌നത്താലും ജില്ലയിലെ കോൺഗ്രസ്‌ പ്രചാരണം ബഹുദൂരം പിന്നിലാണ്‌. ഇതിനിടയിലാണ്‌ രാഹുൽബോംബ്‌ പതിച്ചത്‌. പ്രവർത്തകരെ പ്രതിരോധത്തിലാക്കിയ വിഷയത്തിൽ കെപിസിസി പ്രസിഡന്റ്‌ സണ്ണി ജോസഫിന്റെ അഴകൊഴമ്പൻ നിലപാടിലും അണികൾക്ക്‌ അമർഷമുണ്ട്‌. അതിനിടെ, പ്രതിപക്ഷനേതാവ്‌ വി ഡി സതീശൻ ശനിയാഴ്‌ച ജില്ലയിലെത്തുന്നുണ്ട്‌. രാഹുൽ വിഷയത്തിൽ കർശന നിലപാട്‌ അദ്ദേഹം കണ്ണൂരിൽ പ്രഖ്യാപിക്കുമോയെന്നാണ്‌ പ്രവർത്തകർ ഉറ്റുനോക്കുന്നത്‌.