ആനവണ്ടിയിൽ പിന്നിട്ട ആനന്ദയാത്രകൾ

തളിപ്പറന്പ്‌

കോവിഡ്‌ പത്തിമടക്കിത്തുടങ്ങിയ കാലം‍. ര‍ൗദ്രഭാവങ്ങൾ ഒഴിഞ്ഞിരുന്നെങ്കിലും ഭീതി അതുപോലെ തുടർന്നു. യാത്രികരെ ആകർഷിക്കാൻ 2022 ജനുവരി 10ന്‌ വയനാട്ടിലേക്ക്‌ കണ്ണൂർ കെഎസ്‌ആർടിസി ഒരു വിനോദയാത്ര പ്രഖ്യാപിച്ചു. വൈകിട്ടാകുന്പോഴേക്ക്‌ രണ്ട്‌ ബസിലേക്കുള്ള ബുക്കിങ്ങായി. എന്നാൽ കോവിഡ്‌ വീണ്ടും വില്ലനായതോടെ യാത്ര മുടങ്ങി. ഒരു മാസംകഴിഞ്ഞ്‌ ഫെബ്രുവരിയിലെ അവസാന ദിവസങ്ങളിലൊന്നിലേക്ക്‌ യാത്ര മാറ്റിയപ്പോഴേക്കും സഞ്ചാരികൾ പാതിയായി. പക്ഷേ അതൊരു തുടക്കമായിരുന്നു. രാത്രിബസിൽ ക്യാംപ്‌ചെയ്‌തു തുടങ്ങിയ യാത്രകൾ പിന്നീടങ്ങോട്ട്‌ ഒരു ആഘോഷമായി. മൂന്നുവർഷത്തിനിപ്പുറം നവംബർ 23ന്‌ കരിയാത്തുംപാറയിലേക്ക്‌ കണ്ണൂർ ഡിപ്പോയിൽനിന്ന്‌ ബസ്‌ പുറപ്പെട്ടപ്പോൾ യാത്രകളുടെ എണ്ണം 900 തൊടുന്നു. വരുമാനം നാലുകോടിയും. ‘ആനവണ്ടി’ക്കൊപ്പം ജില്ലയിൽ അരലക്ഷത്തോളംപേർ വിനോദയാത്ര പോയിക്കഴിഞ്ഞു. താണ്ടിയത്‌ പതിനായിരത്തിലേറെ മൈലുകൾ. പയ്യന്നൂർ ഡിപ്പോയുടെ 80ഉം തലശേരിയുടെ 40 യാത്രകളും ചേരുന്പോൾ സർവീസ്‌ ആയിരംകടന്നു. വൃത്തിയുള്ള ഭക്ഷണവും മികച്ച താമസ സ‍ൗകര്യവും വിശ്വാസ്യതയുമാണ്‌ കെഎസ്‌ആർടിസിയുടെ യാത്രകളെ പ്രിയപ്പെട്ടതാക്കുന്നത്‌. ആരംഭിച്ച്‌ നാലുവർഷത്തിൽ യാത്രാരീതികൾ മാറുകയാണ്‌. തീർഥാടന ടൂറിസത്തിലേക്കും അന്തർ സംസ്ഥാന സഞ്ചാരങ്ങളിലേക്കും കാലൂന്നുകയാണ്‌ കോർപറേഷൻ. മന്ത്രി ഗണേഷ്‌കുമാറിന്റെ നിർദേശപ്രകാരം അന്പലങ്ങളിലേക്കുള്ള യാത്രകൾക്ക്‌ ദേവസ്വങ്ങളുമായി ധാരണയായി. ശബരിമല സീസൺ കഴിഞ്ഞാലുടൻ ഇവ ആരംഭിക്കും. വിവാഹയാത്രകൾ, ചാർട്ടേഡ്‌ ട്രിപ്പുകൾ, പഠനയാത്രകൾ എന്നിവയ്‌ക്കൊക്കെയായി ആനവണ്ടിക്ക്‌ ആവശ്യക്കാരേറെയയാണ്‌. ​കൊറിയറിലും ഹിറ്റ്‌ ​കെഎസ്‌ആർടിസി ആരംഭിച്ച കൊറിയർ സർവീസിനും പൊതുജനങ്ങളിൽനിന്ന്‌ മികച്ച പ്രതികരണമാണ്‌. ചെറിയ ദൂരങ്ങളിലേക്കുൾപ്പെടെ സാധനങ്ങൾ അയക്കാനാകും. തമിഴ്‌നാട്ടിലെ ഹൊസൂരിലേക്ക്‌ സ്വിഫ്‌റ്റ്‌ ഡീലക്‌സ്‌ സർവീസ്‌ ആരംഭിച്ചതും ബംഗളൂരു– തിരുവനന്തപുരം – മധുര ദീർഘദൂര റൂട്ടുകളിലും പുതിയ ബസുകളെത്തി. ദിവസ വരുമാനത്തിൽ സർവകാല റെക്കോർഡ്‌ നേടി അരക്കോടിവരെ കലക്ഷനെത്തിക്കാനും കണ്ണൂർ യൂണിറ്റിനായി. മന്ത്രി രാമചന്ദ്രൻ കടന്നപ്പള്ളി മുഖേന യാർഡിനുള്ള ഫണ്ട്‌ അനുവദിച്ച്‌ പൂർത്തീകരിച്ചതുൾപ്പെടെ ഒട്ടേറെ വികസന പ്രവർത്തനങ്ങളും സാധ്യമായി. ​ഹിറ്റായ യാത്രകളിതാ കൊല്ലൂർ– മൂകാംബിക–കുടജാദ്രി, റാണിപുരം ഹിൽസ്റ്റേഷൻ, ബേക്കൽ ഫോർട്ട്‌, ബേക്കൽ ബീച്ച്‌ ആൻഡ് പാർക്ക്‌, ഏഴരക്കുണ്ട് വെള്ളച്ചാട്ടം, വൈതൽമല പാലക്കയംതട്ട്, കോഴിക്കോട്‌ ജാനകിക്കാട്‌, പെരുവണ്ണാമുഴി ഡാം, കരയത്തുംപാറ, തോണിക്കടവ് ടവർ, തുഷാരഗിരി, എൻ ഊര്, ഹണി മ്യൂസിയം, പൂക്കോട് തടാകം, ആതിരപ്പള്ളി – വാഴച്ചാൽ വെള്ളച്ചാട്ടങ്ങൾ, മലക്കപ്പാറ ജംഗിൾ സവാരി, ആലപ്പുഴ കയർ മ്യൂസിയം, വേഗ ബോട്ടിന്റെ എസി ബർത്തിൽ കുട്ടനാടൻ ജലയാത്ര, ആലപ്പുഴ ബീച്ച്‌, മൂന്നാർ ടോപ് സ്റ്റേഷൻ, ബോട്ടാനിക്കൽ ഗാർഡൻ, ഫ്ലവർ ഗാർഡൻ, ഷൂട്ടിങ്‌ പോയിന്റ്, ഗ്യാപ് റോഡ് വ്യൂ പോയിന്റ്, ചതുരംഗപാറ, കുമളി,- രാമക്കൽമേട്, കാന്തല്ലൂർ, മറയൂർ, വാഗമണിലെ അഡ്വഞ്ചർ പാർക്ക്‌, മൊട്ടക്കുന്നുകൾ, പൈൻ വാലി ഫോറസ്റ്റ്.