മുന്നിൽ കാട്ടാന : സ്കൂട്ടർ യാത്രികൻ 
രക്ഷപ്പെട്ടത്‌ അത്ഭുതകരമായി

ഇരിട്ടി

പേരട്ട തൊട്ടിപ്പാലത്ത് കാട്ടാനയുടെ മുന്നിൽപ്പെട്ട സ്‌കൂട്ടർ യാത്രികൻ അത്ഭുതകരമായി രക്ഷപ്പെട്ടു. ചിന്നം വിളിച്ച് ആന യാത്രികന് പിന്നാലെ അന്പത്‌ മീറ്റർ പിന്തുടർന്നെങ്കിലും ജീവൻ മുറുകെപ്പിടിച്ച്‌ ഓടിയതിനാൽ രക്ഷപ്പെട്ടു. തൊട്ടിപ്പാലം സ്വദേശി കുന്നക്കാടൻ ഫരീദ് ഹാജിയാ(70 )ണ് കാട്ടാനയിൽനിന്ന്‌ അത്ഭുതകരമായി രക്ഷപ്പെട്ടത്. വ്യാഴം ഒന്നരയോടെയാണ്‌ സംഭവം. പേരട്ടയിലെ റബർ തോട്ടത്തിലേക്ക് ടാപ്പിങ്ങിന്‌ പോകുമ്പോഴാണ് തൊട്ടിപ്പാലം ടൗണിനടുത്ത്‌ ഫരീദ്‌ ഹാജി കാട്ടാനക്ക്‌ മുന്നിൽപ്പെട്ടത്‌. ആനയെക്കണ്ട് ഭയന്ന്‌ സ്‌കൂട്ടർ മുന്നോട്ടെടുക്കാൻ കഴിയാതെ വാഹനം നിർത്തി രക്ഷപ്പെടാൻ ശ്രമിച്ചു. സ്കൂട്ടറുമായി ഹാജി നിലത്തുവീണു. കാട്ടാന വാഹനത്തിനുനേരെ പാഞ്ഞടുത്തു. തുടർന്ന്‌ ചിന്നം വിളിച്ച് റോഡിലൂടെ 50 മീറ്ററോളം ഫരീദിന് പിന്നാലെ ഓടി. ഫരീദ്‌ ഓടി രക്ഷപ്പെട്ടു. കഴിഞ്ഞ മാസം തൊട്ടിപ്പാലത്തിറങ്ങിയ കൊമ്പനാണ്‌ വീണ്ടും എത്തിയതെന്ന്‌ നാട്ടുകാർ പറഞ്ഞു. വീണ്ടും കാട്ടാന എത്തിയതോടെ ജനങ്ങൾ ഭീതിയിലാണ്‌. ‘ തൊട്ടിപ്പാലത്ത്‌ വാഴത്തോട്ടത്തിൽ കാട്ടാന നിൽക്കുന്നത് കണ്ടില്ല. തൊട്ടടുത്ത്‌ എത്തിയപ്പോഴാണ് ആനയെ തിരിച്ചറിഞ്ഞത്‌. പേടിച്ച്‌ വിറച്ചു. സ്കൂട്ടർ ഉപേക്ഷിച്ച്‌ അടുത്ത വീട്ടിലേക്ക് ഓടിക്കയറാമെന്ന് കരുതി. വണ്ടിയും താനും റോഡിൽ വീണതോടെ ആനയും അടുത്തെത്തി. വണ്ടി വീഴുന്ന ഒച്ചയും തന്റെ കരച്ചിലും കേട്ട്‌ ആന പിന്തിരിഞ്ഞതിനാൽ ജീവൻ തിരികെ കിട്ടി’– ഫരീദ്‌ ഹാജി പറഞ്ഞു.