പെരളശേരിയിൽ വികസനച്ചർച്ച തുടരും

പെരളശേരി

പുതിയ പേരിലുള്ള ഡിവിഷനാണ്‌ പെരളശേരിയെങ്കിലും അതിലുൾപ്പെടുന്ന പ്രദേശങ്ങൾ എന്നും ഇടതോരംതന്നെയാണ്‌. എകെജിയുടെ മണ്ണിൽ മത്സരംപോലും അപ്രസക്തമെന്ന്‌ പ്രചാരണരംഗത്തെ മുന്നേറ്റം വ്യക്തമാക്കുന്നു. കാൽലക്ഷത്തോളം വോട്ടർമാരാണ്‌ ഡിവിഷനിൽ. പെരളശേരി, കടന്പൂർ, ചെന്പിലോട്‌, മുണ്ടേരി പഞ്ചായത്തുകളിലെ 55 വാർഡുകളാണ്‌ ജില്ലാ പഞ്ചായത്ത്‌ പെരളശേരി ഡിവിഷനിലുള്ളത്‌. കടന്പൂരിലൊഴികെ മൂന്നു പഞ്ചായത്തുകളിലും വ്യക്തമായ ആധിപത്യമാണ്‌ എൽഡിഎഫിന്‌. എടക്കാട് ബ്ലോക്കിലെ മക്രേരി, പെരളശേരി, മാവിലായി, കടമ്പൂർ, ആഡൂർ, കോയ്യോട്‌, ചെമ്പിലോട്, ഏച്ചൂർ ഡിവിഷനുകൾ ചേർന്ന പെരളശേരിയിൽ വികസനനേട്ടങ്ങൾതന്നെയാണ്‌ ചർച്ചാവിഷയം. ധർമടം മണ്ഡലത്തിന്റെ ഭാഗമായുള്ള പ്രദേശങ്ങളാണ്‌ ഡിവിഷനിൽ ഭൂരിഭാഗവും. എൽഡിഎഫ്‌ സർക്കാരിന്റെയും ജില്ലാ പഞ്ചായത്തിന്റെയും നേതൃത്വത്തിൽ നടപ്പാക്കിയ വികസനനേട്ടങ്ങളാണ്‌ കാഴ്‌ചയിലെങ്ങുമെന്നതിനാൽ വോട്ടർമാരും സംതൃപ്‌തർ. ചെറുപട്ടണങ്ങളെല്ലാം സ‍ൗന്ദര്യവൽക്കരിച്ചതിനുപുറമെ ആധുനിക സ‍ൗകര്യങ്ങളോടെ തലയുയർത്തിനിൽക്കുന്ന രണ്ട്‌ ഗവ. ഹയർ സെക്കൻഡറി സ്‌കൂളുകളും ഡിവിഷനിലെ വികസനനേട്ടങ്ങളുടെ നേർസാക്ഷ്യങ്ങളാണ്‌. സിപിഐ എമ്മിലെ ബിനോയ്‌ കുര്യനാണ്‌ എൽഡിഎഫ്‌ സ്ഥാനാർഥി. ജില്ലാ പഞ്ചായത്ത്‌ വൈസ്‌ പ്രസിഡന്റെന്ന നിലയിലും വിദ്യാർഥി യുവജന പ്രസ്ഥാനങ്ങളിലൂടെ ഉയർന്നുവന്ന നേതാവെന്ന നിലയിലും പരിചയപ്പെടുത്തൽ ആവശ്യമില്ലാത്ത സ്ഥാനാർഥിത്വമാണ്‌ ബിനോയ്‌ കുര്യന്റേത്‌. സിപിഐ എം ജില്ലാ കമ്മിറ്റിയംഗമാണ്‌. മുസ്ലിംലീഗ്‌ നേതാവ്‌ ഷക്കീർ മ‍ൗവ്വഞ്ചേരിയാണ്‌ യുഡിഎഫ്‌ സ്ഥാനാർഥിയായി മത്സരിക്കുന്നത്‌. ജിതിൻ രഘുനാഥാണ്‌ ബിജെപി സ്ഥാനാർഥി.