വീണ്ടും തോറ്റ് വാരിയേഴ്‌സ്

കണ്ണൂർ ​

സ്വന്തം മണ്ണിലെ അവസാന അങ്കത്തിലും കാലിടറി കണ്ണൂർ വാരിയേഴ്‌സ്. കരുത്തരായ കലിക്കറ്റ് എഫ്‌സിയോട് ഒന്നിനെതിരെ രണ്ടു ഗോളിനാണ് ആതിഥേയർ കീഴടങ്ങിയത്‌. ഇതോടെ സ്വന്തം തട്ടകത്തിൽ ഒരു മത്സരംപോലും ജയിക്കാനാകാതെ മടങ്ങേണ്ടിവന്നു വാരിയേഴ്‌സിന്‌. കലിക്കറ്റ് എഫ്‌സിക്കായി സെബാസ്റ്റ്യൻ റിൻകനും മുഹമ്മദ് ആഷിഖും ഗോൾ നേടി. പെനാൽറ്റിയിലൂടെ അഡ്രിയാൻ സർഡിനേറോയിലൂടെയാണ്‌ കണ്ണൂരിന്റെ ആശ്വാസഗോൾ. ​കഴിഞ്ഞ മത്സരത്തിൽ ഫോഴ്‌സ കൊച്ചിയോട് പരാജയപ്പെട്ട വാരിയേഴ്‌സിന് സെമി സാധ്യത നിലനിർത്താൻ വിജയം അനിവാര്യമായിരുന്നു. കഴിഞ്ഞ മത്സരത്തിലെ ജയത്തിലൂടെ കലിക്കറ്റ് സെമി ബർത്ത്‌ ഉറപ്പിച്ചിരുന്നു. ​​​ആദ്യപകുതിയുടെ 24-–ാം മിനിറ്റിലാണ്‌ കലിക്കറ്റ് എഫ്സിയുടെ ആദ്യ ഗോൾ പിറന്നത്‌. ഇടത്തുവിങ്ങിൽനിന്ന് മുഹമ്മദ് ആഷിഖ് നൽകിയ ക്രോസ് സെക്കൻഡ് പോസ്റ്റിൽ നിലയുറപ്പിച്ച സെബാസ്റ്റ്യൻ റിൻകൻ ടാപ്പ്ചെയ്ത് വലയിലേക്ക് തിരിച്ചുവിട്ടു. രണ്ടാംപകുതിയിൽ പകരക്കാരനായെത്തിയ ഫെഡറിക്കോ ബോസോ ബോക്സിലേക്ക് കയറിനൽകിയ പാസ് മുഹമ്മദ് ആഷിഖ് വലയിലെത്തിച്ചു കലിക്കറ്റിന്റെ ലീഡുയർത്തി. 74–ാം മിനിറ്റിൽ ക്യാപ്റ്റൻ അഡ്രിയാൻ സർഡിനേറോയിലൂടെ കണ്ണൂർ വാരിയേഴ്‌സ്‌ ആശ്വാസഗോൾ കണ്ടെത്തി. ബോക്സിനുള്ളിൽ കലിക്കറ്റ് താരം അലക്സിസ് സോസയുടെ കൈയിൽ പന്ത് തട്ടിയതിനെത്തുടർന്ന്‌ ലഭിച്ച പെനാൽറ്റി അഡ്രിയാൻ വലയിലെത്തിച്ചു. ​ ഒമ്പതുമത്സരങ്ങൾ പൂർത്തിയായപ്പോൾ കണ്ണൂർ വാരിയേഴ്‌സ് എഫ്സി രണ്ടു ജയവും നാലു സമനിലയും മൂന്നു തോൽവിയുമായി പത്ത് പോയിന്റോടെ അഞ്ചാംസ്ഥാനത്ത് തുടരുന്നു. അവസാന മത്സരത്തിൽ കണ്ണൂർ വാരിയേഴ്‌സ് തൃശൂർ മാജിക് എഫ്‌സിയെ നേരിടും. ഡിസംബർ രണ്ടിന്‌ തൃശൂർ കോർപ്പറേഷൻ സ്റ്റേഡിയത്തിലാണ് മത്സരം.