ആന്തൂരിലെ വോട്ട്‌ നൃത്തത്തിന്‌ നിറയെ ലൈക്ക്‌

ധർമശാല

ആന്തൂരിലെ വനിതാ സ്ഥാനാർഥികൾ വോട്ടഭ്യർഥിച്ച്‌ നടത്തിയ നൃത്തവും വൈറൽ. നഗരസഭയിലേക്ക്‌ മത്സരിക്കുന്ന 15പേരാണ്‌ മാപ്പിളപ്പാട്ടിന്റെ ഇ‍ൗണത്തിനനുസരിച്ച്‌ ചുവടുകൾവച്ചത്‌. ഇത്‌ സമൂഹമാധ്യമങ്ങളിൽ മിനിറ്റുകൾകൊണ്ട്‌ അരലക്ഷത്തിലേറെപ്പേർ കണ്ടു. പതിനായിരങ്ങൾ ലൈക്കടിച്ചു. മാധ്യമങ്ങളിലും വാർത്തയായതോടെ കാണികൾ ലക്ഷങ്ങളായി. യുഡിഎഫിന്‌ പത്രിക നൽകാൻപോലും ആളില്ലാത്തതിനാൽ അഞ്ചുപേർ എതിരില്ലാതെ ജയിച്ച നഗരസഭയാണ്‌ ആന്തൂർ. രൂപീകരിച്ചതുമുതൽ ഇവിടെ പ്രതിപക്ഷമില്ല. വൈറൽ നൃത്തം ചെയ്‌തവരിൽ മൂന്നുപേർ എതിരില്ലാതെ ജയിച്ചവരാണ്‌. നിലവിലുള്ള ഭരണസമിതിയിലെ വൈസ്‌ ചെയർമാൻ വി സതീദേവി, സ്ഥിരംസമിതി ചെയർമാന്മാരായ എം ആമിന, ഓമന മുരളീധരൻ, എതിരില്ലാതെ വിജയിച്ച കെ രജിത, ഇ രജിത, ടി വി ധന്യ, പുതുതായി മത്സരിക്കുന്നവർ ഉൾപ്പെടെ 15 വനിതാ സ്ഥാനാർഥികളാണ്‌ റിൽസിലൂടെ തിളങ്ങിയത്‌.