വീണ്ടും വിജയക്കൊടി പാറിക്കാൻ

പന്ന്യന്നൂർ

താഴെചന്പാട്‌ ഓട്ടോസ്‌റ്റാൻഡിൽ ജില്ലാപഞ്ചായത്ത്‌ പന്ന്യന്നൂർ ഡിവിഷൻ എൽഡിഎഫ്‌ സ്ഥാനാർഥി പി പ്രസന്ന എത്തുന്പോൾ സമയം ഉച്ചയോട്‌ അടുത്തിരുന്നു. സ്ഥാനാർഥിയെ കണ്ടതോടെ ഓട്ടോതൊഴിലാളികൾ ചുറ്റുംകൂടി. എല്ലാവരോടും വോട്ട്‌ ചോദിച്ചും കുശലാന്വേഷണം നടത്തിയും സ്ഥാനാർഥി. ഇവിടെ പരിചയപ്പെടുത്തലോ മുഖവുരയോ ആവശ്യമില്ലാത്ത നേതാവാണ്‌ പി പ്രസന്ന. മുൻ പന്ന്യന്നൂർ പഞ്ചായത്തംഗവും അങ്കണവാടി അധ്യാപികയുമാണ്‌. പതിറ്റാണ്ടുകൾ നീണ്ട പൊതുപ്രവർത്തനത്തിന്റെ അനുഭവക്കരുത്തുമായാണ്‌ ജനവിധി തേടുന്നത്‌. ജില്ലാ പഞ്ചായത്തംഗമായ മുതിർന്ന സിപിഐ എം നേതാവ്‌ ഇ വിജയൻ വിജയക്കൊടി പാറിച്ച ഡിവിഷനിൽ വികസനത്തുടർച്ചക്ക്‌ വോട്ടഭ്യർഥിച്ച്‌ സ്ഥാനാർഥിയെത്തുന്പോൾ മികച്ച പ്രതികരണമാണ്‌ എങ്ങും. ദിനേശ്‌ബീഡി കന്പനിയിൽ വോട്ടഭ്യർഥിച്ചാണ്‌ പര്യടനം തുടങ്ങിയത്‌. തൊഴിലാളികളുടെ സ്‌നേഹവാത്സല്യം ഏറ്റുവാങ്ങി താഴെചന്പാട്ടെ കടകളിലേക്ക്‌. മുഴുവൻ വ്യാപാര സ്ഥാപനങ്ങളിലും കയറി പരിചയം പുതുക്കി. പന്ന്യന്നൂർ പഞ്ചായത്തിലെ വിവിധ സ്ഥാപനങ്ങളും ഇതിനിടയിൽ സന്ദർശിച്ചു. എൽഡിഎഫ്‌ സ്ഥാനാർഥികളായ നസീർ ഇടവലത്ത്‌, എൻ പി രജനി, കെ പി ലീല ടീച്ചർ, കെ കെ ജിനിഷ, ജസീല ന‍ൗഷാദ്‌, സി എച്ച്‌ ഖാദർ, കെ കെ മണിലാൽ, എം സുജാത, കെ കെ മോഹൻകുമാർ എന്നിവരും എൽഡിഎഫ്‌ നേതാക്കളായ ഇ വിജയൻ, കെ ജയരാജൻ, കെ കെ ബാലൻ എന്നിവരും വിവിധ കേന്ദ്രങ്ങളിൽ സ്ഥാനാർഥിക്കൊപ്പമുണ്ടായി. എൽഡിഎഫ്‌ സർക്കാരിന്റെ വികസനനേട്ടങ്ങൾ അനുഭവിച്ച പ്രദേശങ്ങളിലൂടെയായിരുന്നു സ്ഥാനാർഥിയുടെ യാത്ര. ഒയപ്രകുന്നിൽ 6.25 കോടി രൂപ ചെലവഴിച്ചുള്ള ഐടിഐ കെട്ടിട നിർമാണം അവസാനഘട്ടത്തിലാണ്‌. മേലെചന്പാട്‌ ഇൻഡോർ സ്‌റ്റേഡിയം ഉൾപ്പെടെ നേട്ടങ്ങൾ നിരവധി. സർക്കാരിന്റെ പെൻഷൻ വർധനയുടെയും ലൈഫ്‌ വീടുകളുടെയും ഗുണം ലഭിച്ചവരടക്കം ഇടതുപക്ഷവിജയത്തിനായി സ്ഥാനാർഥിക്കൊപ്പം രംഗത്തിറങ്ങുന്നു. ഉച്ചക്കുശേഷം കുടുംബയോഗങ്ങളിലും സ്ഥാനാർഥിയെത്തി. കുടുംബാംഗത്തെപോലെ നാട്‌ ഹൃദയത്തോടുചേർത്ത്‌ സ്ഥാനാർഥിയെ സ്വീകരിക്കുന്ന കാഴ്‌ച. മറുപടിയായി നാട്‌ കൈവരിച്ച വികസന നേട്ടങ്ങൾ പരാമർശിച്ചുള്ള ഹ്രസ്വമായ പ്രസംഗം. അങ്കണവാടി വർക്കേഴ്‌സ്‌ ആൻഡ്‌ ഹെൽപ്പേഴ്‌സ്‌ അസോസിയേഷൻ ജില്ലാ ജോയന്റ്‌സെക്രട്ടറിയും മഹിളാ അസോസിയേഷൻ വില്ലേജ്‌ സെക്രട്ടറിയും സിപിഐ എം ചന്പാട്‌ ലോക്കൽകമ്മിറ്റി അംഗവും കിഴക്കെ ചന്പാട്‌ ബ്രാഞ്ച്‌ സെക്രട്ടറിയുമാണ്‌ പി പ്രസന്ന. പന്ന്യന്നൂർ, ചൊക്ലി പഞ്ചായത്തുകളും ന്യൂമാഹി പഞ്ചായത്തിലെ 12വാർഡും ഉൾപ്പെടുന്നതാണ്‌ പന്ന്യന്നൂർ ഡിവിഷൻ.