വികസനത്തുടർച്ചയ്‌ക്ക്‌ കൂത്തുപറമ്പ്

കൂത്തുപറമ്പ്

കൂത്തിന്റെയും കൂടിയാട്ടത്തിന്റെയും നാടാണ്‌ കൂത്തുപറമ്പ്. സമരപാരന്പര്യമുള്ള വിപ്ലവകാരികളുടെ മണ്ണ്‌. സാമൂഹ്യപരിഷ്‌കർത്താക്കളുടെ ഉശിരാർന്ന പ്രവർത്തനവും ദേശീയപ്രസ്ഥാനം പകർന്ന ദിശാബോധവും കരുത്താക്കി ഇടതുപക്ഷ രാഷ്‌ട്രീയത്തെ മനസാവരിച്ച നാടിന്റെ പേരുകൂടിയാണ്‌ കൂത്തുപറന്പ്‌. നഗരസഭ രൂപംകൊണ്ട 1990 മുതൽ കൂത്തുപറന്പിൽ എൽഡിഎഫ്‌ ഭരണമാണ്‌. 1937ൽ പഞ്ചായത്തായ കൂത്തുപറന്പിൽ 1963ൽ കമ്യൂണിസ്‌റ്റ്‌ സ്വതന്ത്രനായ കെ കെ നായർ പ്രസിഡന്റായതും ചരിത്രം. നഗരസഭയിൽ ഇത്തവണയും ഇടതുപക്ഷം വർധിച്ച ഭൂരിപക്ഷത്തോടെ അധികാരത്തിലെത്തുമെന്ന കാര്യത്തിൽ ആർക്കും സംശയമുണ്ടാകില്ല. തുടർ ഭരണത്തിലൂടെ വികസനത്തിന്റെ പുതുയുഗപ്പിറവിയിലേക്കാണ്‌ കൂത്തുപറന്പും മുന്നേറുന്നത്‌. കൈവിട്ട വാർഡുകൾ തിരിച്ചുപിടിച്ച്‌ സമഗ്രാധിപത്യത്തിനാണ്‌ എൽഡിഎഫ്‌ കച്ചമുറുക്കുന്നത്‌. കഴിഞ്ഞ 5 വർഷത്തെ സമാനതയില്ലാത്ത നേട്ടങ്ങൾതന്നെയാണ്‌ ഇടതുപക്ഷത്തിന്റെ ശക്തി. ഒപ്പം സംസ്ഥാന സർക്കാരിന്റെ ക്ഷേമനടപടികളും വികസനവും ഇടതുമുന്നേറ്റത്തിന്‌ കരുത്താവും. അറുപത്‌ കോടി രൂപ ചെലവിൽ നിർമിച്ച 12 നിലയുള്ള താലൂക്ക്‌ ആശുപത്രി വികസനത്തിന്റെ മഹാഗോപുരമായി നഗരത്തിൽ തലയുയർത്തിനിൽക്കുന്നു. 37 കോടി രൂപ ചെലവിൽ പുതിയ ബസ്‌സ്‌റ്റാൻഡ്‌ പണിയുന്നതിനുള്ള പ്രാരംഭ പ്രവർത്തനവും ആരംഭിച്ചു. ട‍ൗൺഹാൾ നിർമാണവും അവസാനഘട്ടത്തിലാണ്‌. ലൈഫ്‌ പദ്ധതിയിൽ 45 വീടുകൾ പൂർത്തിയായി. 30 വീടുകൾ അവസാനഘട്ടത്തിലുമാണ്‌. മാലിന്യനിർമാർജനത്തിലെ കൂത്തുപറന്പ്‌ മാതൃക മലിനീകരണ നിയന്ത്രണ ബോർഡിന്റെ ഗോൾഡൻ പുരസ്‌കാരത്തിനും അർഹമായതാണ്‌. നഗരസഭയിലെ 29 വാർഡിലേക്ക്‌ 91 സ്ഥാനാർഥികളാണ്‌ മത്സരംഗത്തുള്ളത്‌. എൽഡിഎഫിൽ സിപിഐ എം 24 വാർഡിലും സിപിഐ മൂന്നിലും ആർജെഡിയും ഐഎൻഎഎൽ(സ്വത) ഒന്നുവീതം സീറ്റുകളിലും മത്സരിക്കുന്നു. യുഡിഎഫിൽ കോൺഗ്രസ്‌–22, മുസ്ലിംലീഗ്‌–4 എൽജെഡി ഒന്നിലും യുഡിഎഫ്‌ സ്വതന്ത്രർ രണ്ടിലും മത്സരിക്കുന്നു. ബിജെപിക്ക്‌ 24ലും ബിഡിജെഎസ്‌ ഒന്നിലും എസ്‌ഡിപിഐക്ക്‌ രണ്ടിലും സ്ഥാനാർഥികളുണ്ട്‌. നഗരസഭയിലെ നാല്‌ വാർഡിൽ ബിജെപിക്ക്‌ സ്ഥാനാർഥിയില്ല. പിന്താങ്ങുന്ന ആളുടെ വ്യാജഒപ്പിട്ട്‌ നൽകിയ ഇരുപത്തിനാലാം വാർഡിലെ ബിജെപി സ്ഥാനാർഥിയുടെ പത്രിക തള്ളി. നാമനിർദേശകന്റെ വ്യാജ ഒപ്പിട്ട്‌ പത്രിക സമർപ്പിച്ചുവെന്ന പരാതി ഉയർന്നതോടെ 17ാം വാർഡിലെ സ്ഥാനാർഥി പത്രിക പിൻവലിക്കുകയുംചെയ്‌തു. തെരഞ്ഞെടുപ്പ്‌ പ്രചാരണം ഒന്നാംഘട്ടം പിന്നിടുന്പോൾ നഗരസഭയിലെ എല്ലാവാർഡിലും ഇടതുമുന്നേറ്റം പ്രകടമാണ്‌. 25,833 വോട്ടർമാരാണ്‌ നഗരസഭയിലുള്ളത്‌. 11,768 പുരുഷന്മാരും 14065 സ്‌ത്രീകളും.​

നിലവിലെ കക്ഷിനില

ആകെ വാർഡ്‌–28

സിപിഐ എം–22

സിപിഐ– 2

ഐഎൻഎൽ(സ്വത)–1

ആർജെഡി–1

കോൺഗ്രസ്‌–1

ബിജെപി–1