സ്വകാര്യ ബസ്സുകൾ 
ഇന്നുമുതൽ ഓടിത്തുടങ്ങും

നടാൽ

ദേശീയപാത 66ൽ നടാൽ ഒകെ യുപി സ്കൂളിന് സമീപം അടിപ്പാത നിർമിക്കണമെന്ന് ആവശ്യപ്പെട്ട് കണ്ണൂർ -തോട്ടട -തലശേരി റൂട്ടിൽ ഏഴുദിവസമായി നടക്കുന്ന സ്വകാര്യ ബസ് സമരം 15 വരെ നിർത്തിവയ്‌ക്കാൻ ധാരണ. നടാൽ അടിപ്പാത ആക്ഷൻ കമ്മിറ്റി അഞ്ചുദിവസമായി നടത്തുന്ന സത്യഗ്രഹ സമരവും അവസാനിപ്പിച്ചു. ബുധൻ മുതൽ സ്വകാര്യ ബസ്സുകൾ ഓടിത്തുടങ്ങും. ​അഡീഷണൽ ജില്ലാ മജിസ്ട്രേറ്റിന്റെ അധ്യക്ഷതയിൽ ചേമ്പറിൽ ചൊവ്വാഴ്ച നടന്ന യോഗത്തിലാണ് തീരുമാനമായത്. ജില്ലാ പൊലീസ് മേധാവി, റൂറൽ, സിറ്റി പൊലീസ് കമീഷണർ, ആർടിഒ, പ്രൊജക്ട് ഡയറക്ടർ ദേശീയപാത അതോറിറ്റി, ജില്ലാ ട്രാൻസ്പോർട്ട് ഓഫീസർ, ബസ് ഓപ്പറേറ്റേഴ്സ് അസോസിയേഷൻ, തൊഴിലാളി സംഘടന, സമരസമിതി പ്രതിനിധികൾ എന്നിവർ ചർച്ചയിൽ പങ്കെടുത്തു. ​നടാൽ ഒകെ യുപി സ്കൂളിനടുത്തുനിന്ന് ദേശീയപാത 66 ലേക്ക് കടക്കുന്ന വഴി ദേശീയപാത അധികാരികൾ കല്ലുവച്ച് അടച്ചിരുന്നു. ധാരണപ്രകാരം റോഡിലെ തടസ്സങ്ങൾ നീക്കി. 11ന് തിരുവനന്തപുരത്ത് മുഖ്യമന്ത്രിയുടെ സാന്നിധ്യത്തിൽ നടക്കുന്ന ദേശിയപാത നിർമാണ പുരോഗതി അവലോകന യോഗത്തിൽ നടാൽ അടിപ്പാത വിഷയം ചർച്ചചെയ്യും. ശേഷം മന്ത്രി രാമചന്ദ്രൻ കടന്നപ്പള്ളിയുടെയും കലക്ടറുടെയും സാന്നിധ്യത്തിൽ കണ്ണൂരിൽ വീണ്ടും യോഗംചേരും. അതുവരെ സമരം നിർത്തിവയ്‌ക്കാനാണ്‌ ധാരണ. ഒകെ യുപി സ്കൂളിനടുത്ത് ദേശിയപാത അടച്ചിടരുതെന്ന് ബന്ധപ്പെട്ട അധികാരികൾക്കും നിർദേശം നൽകി. ​ ദേശീയപാത 66ൽ നടാൽ ഒകെ യുപി സ്കൂളിനടുത്ത് അടിപ്പാത നിർമിക്കാൻ നടപടിയെടുക്കണമെന്ന്‌ ആവശ്യപ്പെട്ട്‌ ചൊവ്വാഴ്ച കോർപ്പറേഷൻ കൗൺസിൽ യോഗത്തിൽ ഐകകണ്ഠ്യേന പ്രമേയം പാസ്സാക്കി. ​ചൊവ്വ രാവിലെ നടാൽ ബൈപ്പാസ് വഴി ഓടിയ കോഴിക്കോട് ബസ്സുകൾ നാട്ടുകാർ തടഞ്ഞു. എടക്കാട് പൊലീസ് എത്തി സമരക്കാരെ നീക്കി. ഇതിനെ തുടർന്ന് സമരക്കാരും പൊലീസും തമ്മിൽ വാക്കേറ്റവും ഉണ്ടായി. ചൊവ്വ ഇതുവഴി ബസ്‌ ഓടിയില്ല. കെഎസ്‌ആർടിസി ബസ്സുകൾ കൂടുതൽ ഓടിയതിനാൽ യാത്രക്കാർ ഏറെ ബുദ്ധിമുട്ടിയില്ല.