മണ്ണുത്തി –ഇടപ്പള്ളി പാതയിൽ 
യാത്രാസുരക്ഷ ആശങ്കയിൽ

തൃശൂർ

മണ്ണുത്തി –ഇടപ്പള്ളി ദേശീയപാതയിൽ യാത്രക്കാരുടെ സുരക്ഷ ആശങ്കയിൽ തുടരുകയാണെന്ന്‌ കലക്ടർ ചെയർമാനായ താൽക്കാലിക ട്രാഫിക്‌ മാനേജ്‌മെന്റ്‌ കമ്മിറ്റിയുടെ റിപ്പോർട്ട്‌ വീണ്ടും. എൻഎച്ച് 544ൽ ആമ്പല്ലൂർ, പേരാമ്പ്ര, മുരിങ്ങൂർ, കൊരട്ടി, ചിറങ്ങര എന്നിവിടങ്ങളിൽ നടക്കുന്ന നിർമാണങ്ങളിൽ ഗുരുതര റോഡ് സുരക്ഷാ ആശങ്കകൾ പ്രകടമാണെന്ന്‌ റിപ്പോർട്ടിൽ പറയുന്നു. ദേശീയപാത അതോറിറ്റിയുടെ വീഴ്‌ചകൾ ചൂണ്ടിക്കാട്ടിയുള്ള റിപ്പോർട്ടിന്റെ അടിസ്ഥാനത്തിലാണ്‌ പാലിയേക്കരയിലെ ടോൾ പിരിവ്‌ വിലക്ക്‌ തുടരാൻ ഹൈക്കോടതി ഉത്തരവിട്ടത്‌. കരാർ കന്പനി നൽകിയ ഹർജി ഹൈക്കോടതി വെള്ളിയാഴ്ച പരിഗണിക്കും. മേൽപ്പാലം, റീ-വാൾ ഫൗണ്ടേഷനുകൾ എന്നിവയ്ക്കായി നടത്തിയ ഖനനം വാഹന ഗതാഗതത്തെ അപകടപ്പെടുത്തുന്ന സാഹചര്യങ്ങൾ സൃഷ്ടിച്ചു. സർവീസ് റോഡുകളിൽ ശക്തമായ സുരക്ഷാ നടപടികൾ ആവശ്യമാണ്‌. മഴവെള്ള സ്തംഭനം, ഹെവി വാഹനങ്ങളിൽ നിന്നുള്ള വൈബ്രേഷൻ, ദുർബലമായ മണ്ണ് എന്നിവയും അപകടസാധ്യത വർധിപ്പിക്കുന്നു. വാഹനയാത്രിക്കാരുടെയും തൊഴിലാളികളുടെയും സുരക്ഷയും അപകടത്തിലാണ്‌. നിലവിലുള്ള -സംരക്ഷണ നടപടികൾ അപകടങ്ങൾ തടയാൻ അപര്യാപ്തമാണ്. പ്രധാനപാതയിൽനിന്ന്‌ ഇടുങ്ങിയ ഒറ്റവരിപ്പാതയിലേക്ക്‌ വാഹനങ്ങൾ പ്രവേശിക്കുന്ന ഭാഗത്ത്‌ ഗതാഗതത്തിരക്ക്‌ രൂക്ഷമാണ്‌. ശബരിമല സീസണിൽ വാഹനങ്ങള്‍ കൂടും. ഇ‍ൗ സാഹചര്യത്തിൽ മുടങ്ങിക്കിടക്കുന്ന പ്രവൃത്തികൾ മുൻഗണനാക്രമത്തിൽ പൂർത്തിയാക്കണം. നിർമാണ മേഖലകൾക്ക് സമീപം വെള്ളക്കെട്ട് തടയാൻ ഡ്രെയിനേജ് സംവിധാനം നവീകരിക്കണം. അടിപ്പാത നിർമാണം വേഗത്തിൽ പൂർത്തിയാക്കുകയാണ് ശാശ്വത പരിഹാരമെന്നും സമിതി റിപ്പോർട്ടിൽ പറയുന്നു. ദേശീയപാതയിൽ കുരുക്കുണ്ടാവുന്പോൾ ചെറിയ വാഹനങ്ങൾ പോവുന്ന പഞ്ചായത്ത് റോഡുകളും തകർന്നു. ഈ റോഡുകളുടെ പുനർനിർമാണവും അറ്റകുറ്റപ്പണിയും ആവശ്യമാണെന്നും റിപ്പോർട്ടിൽ പറയുന്നു. കലക്ടറുടെ നിർദേശപ്രകാരം റ‍ൂറൽ പൊലീസ്‌ മേധാവിയുടെ നേതൃത്വത്തിലുള്ള പൊലീസ്‌ സംഘവും മോട്ടോർ വാഹനവകുപ്പ്‌ ഉദ്യോഗസ്ഥരും ദേശീയപാത വീണ്ടും സന്ദർശിച്ചാണ്‌ റിപ്പോർട്ട്‌ തയ്യാറാക്കിയത്‌.